Read Pennsylvania German Jeremia 10 Bible Online

Jeremia 10 - Pennsylvania German bible

Jeremia 10

¹Heichet ab vass da HAH sawkt zu eich, diah fumm haus funn Israel.

²Dess is vass da HAH sawkt: “Diah sellet nett di heida iahra vayya lanna, adda eich feicha veyyich di zaycha im himmel, so vi di heida sich feicha.

³Da vayk vi di heida iahra abgettah deena is nix veaht; si hakka en bohm nunnah im bush, un da shreinah macht en gleichnis mitt en ax.

⁴Si zeeya's ivvah mitt silvah un gold, si macha's fesht mitt en hammah un nekkel, so es es nett um fald.

⁵Vi en butzamann fa fekkel fatt yawwa im goahra, iahra abgettah kenna nett shvetza; si missa gedrawwa sei, veil si nett lawfa kenna. Feichet eich nett veyyich eena; si kenna eich kenn shawda du, un si kenna aw nix goodes du.”

⁶Oh HAH, es is nimmand vi dich; du bisht grohs, un dei nohma is grohs un mechtich.

⁷Veah soll dich nett firchta, oh Kaynich funn di heida? Du bisht's veaht. Unnich awl di heida iahra mennah mitt veisheit, un unnich awl iahra kaynich-reicha, hott's nimmand vi dich.

⁸Si sinn awl dumm un nett ksheit, iahra holsichi abgettah kenna si nix lanna.

⁹Blech gmacht funn silvah vatt bei gebrocht funn Tharsis, un gold funn Uphas. Vass da shreinah un da gold-shmitt gmacht henn, is no ivvah-gezowwa mitt en bloh un purpel glayt. Awl dee abgettah sinn gmacht bei gegawbdi mensha.

¹⁰Avvah da HAH is da recht Gott; eah is da levendich Gott, un da ayvich Kaynich. Vann eah bays vatt, dann shiddeld di eaht; di heida kenna sei zann nett shtenda.

¹¹“Du solsht dess sawwa zu eena: ‘Dee gettah es da himmel un di eaht nett gmacht henn, zayla folshtendich zu nix gmacht vadda uf di eaht un unnich em himmel.’”

¹²Gott hott di eaht gmacht mitt sei graft; eah hott di veld gmacht deich sei veisheit, un di himla deich sei fashtand.

¹³Vann sei shtimm shvetzt, dann doon di vassahra ovvich em himmel roahra; eah macht di volka uf kumma fumm end funn di eaht. Eah shikt gviddah mitt em reyya, un bringd da vind aus sei shtoah-heisah.

¹⁴Alli-ebbah is dumm un vayst nix, da gold-shmitt muss sich shemma mitt sei abgettah. Sei gleichnisa sinn falsh, un henn kenn layva in sich.

¹⁵Si sinn nix veaht un sedda fashpott vadda; vann si moll gricht vadda, gayn si folshtendich zu nix.

¹⁶Da Gott fumm Jakob is nett vi dee; eah is sellah es alles kshaffa hott, un eah hott's kshlecht funn Israel, sei aykni leit gmacht. Sei nohma is da Awlmechtich HAH!

¹⁷Geddahret eiyah shtoft zammah fa's land falossa, diah es umringd sinn bei heida.

¹⁸Fa dess is vass da HAH sawkt: “An deahra zeit zayl ich eich naus shmeisa, diah es im land voonet. Ich zayl eich angsht gevva so es diah's kshpiahret.”

¹⁹Di leit funn Jerusalem greisha naus, “Miah sinn veesht vay gedu, un dess kann nett kayld sei.” Avvah miah henn ksawt, “Dess is unsah granket, un miah missa's ohnemma.”

²⁰Unsah tents sinn fadauva; di shtrikk sinn farissa. Unsah kinnah sinn awl fatt ganga. 'Sis nimmand ivvahrich fa unsah tents viddah uf du, un fa di curtains viddah ufhenka.

²¹Unsah shohf-heedah sinn nett ksheit vadda, un henn da HAH nett kfrohkt; fasell is nix recht ganga fa si, un iahra gansi drubb is ausnannah kshtroit.

²²Heichet, en yacht is am kumma, en grohsi ufruah fumm land funn di natt! Dess zayld di shtett funn Juda fadauva un leah macha, en leahrah blatz vo vildi hund bleiva.

²³Ich vays, oh HAH, es em mensh sei layva nett in sei aykni hend is; 'sis nett een es ausmacht vi eah lawfa sett.

²⁴Shtrohf mich, HAH, avvah yusht vass recht is, nett in deim zann, adda sell veah's end funn miah.

²⁵Leah dei zann aus uf di heida, selli es dich nett kenna, uf di leit es dei nohma nett ohbayda. Fa si henn da Jakob ufkfressa; si henn een folshtendich ufkfressa, un henn sei haymet un land fadauva.