Read Pennsylvania German Jeremia 16 Bible Online

Jeremia 16 - Pennsylvania German bible

Jeremia 16

¹Em HAH sei vatt is zu miah kumma, un hott ksawt,

²“Du solsht nett heiyahra un kinnah havva an demm blatz.”

³Dess is vass da HAH sawkt veyyich di boova un mayt es geboahra sinn in demm land, un veyyich di veibsleit un mansleit es iahra maemm un daett sinn:

⁴“Si zayla shtauva funn shreklichi grank-heida. Nimmand heild ivvah si un si vadda nett fagrawva, si zayla sei vi misht uf em bodda leiya. Si zayla umkumma bei em shvatt un hungahs-noht, un zayla kfressa vadda bei di fekkel funn di luft un di diahra funn di eaht.”

⁵Da HAH sawkt veidah: “Gay nett in en haus vo si am leida sinn fa di dohda; du nett heila adda mitt-leida, veil ich mei fridda un gnawt un shtandhaftichi-leevi vekk gnumma habb funn dee leit.

⁶Di grohsa un di glenna zayla shtauva in demm land. Si zayla nett fagrawva vadda un nimmand zayld heila fa si. Nimmand zayld sich shneida adda sei kobb shayfa fa si.

⁷Nimmand zayld ess-sach bringa fa selli drayshta es am leida sinn, un nimmand gebt eena ebbes zu drinka fa si drayshta, nett even fa sei daett adda maemm.

⁸Du solsht aw nett in en haus gay vo si am en grohs essa havva sinn un dich anna hokka un essa mitt eena.

⁹Fa dess is vass da Awlmechtich HAH, da Gott funn Israel, sawkt: ‘In demm land fannich eiyah awwa un in eiyah layves-zeit, zayl ich en end macha funn di yacht vo leit am en goodi zeit havva sinn un am sich froiya sinn, un di shtimm funn di hochtzich-fraw un da hochtzich-mann.’

¹⁰Vann du leit dess sawksht un si frohwa dich, ‘Favass hott da HAH so en grohs evil auskshprocha geyyich uns? Vass henn miah letz gedu? Vass fa sind henn miah gedu geyyich da HAH unsah Gott?’

¹¹No sawk eena, ‘Es is veil eiyah feddah mich falossa henn,’ sawkt da HAH, ‘un veil si anri gettah nohch ganga sinn, henn si gedeend un ohgebayda. Si henn mich falossa un henn mei ksetz nett kalda.

¹²Avvah diah hend eich noch shlimmah ohkshikt es eiyah feddah. Alli-ebbah funn eich gayt sei fashtokt un evil hatz nohch in blatz funn miah heicha.

¹³So zayl ich eich aus demm land shmeisa in en land es nett diah adda eiyah feddah gekend hend. Datt zaylet diah anri gettah deena dawk un nacht, fa ich zayl nett gnaydich sei zu eich.’

¹⁴Avvah gukket moll, di dawwa sinn am kumma,” sawkt da HAH, “vann leit nimmi sawwa, ‘so shuah es da HAH laybt, deah es di Kinnah-Israel ruff aus Egypta gebrocht hott,’

¹⁵avvah si zayla sawwa, ‘So shuah es da HAH laybt, deah es di Kinnah-Israel aus em land funn di natt gebrocht hott, un aus awl di lendah es eah si anna gedrivva katt hott.’ Fa ich zayl si zrikk bringa in's land es ich iahra foah-feddah gevva habb.

¹⁶Nau gukket moll,” sawkt da HAH, “ich zayl shikka fa feel fishah-mennah es si fanga zayla. Noch sellem shikk fa feel hundah, un si zayla si raus sucha uf alli berg un hivvel un si aus di rissa in di felsa yawwa.

¹⁷Mei awwa sayna alles es si am du sinn. Nix is fashtekkeld funn miah. Iahra sinda sinn nett zu gedekt fannich mei awwa.

¹⁸Ich zayl si zvay moll so feel zrikk betzawla fa iahra ungettlichkeit un sinda, veil si mei land unrein gmacht henn mitt iahra dohdi abgettah, un mei eahbshaft ufkfild henn mitt iahra grausami gleichnisa.”

¹⁹Oh HAH, du bisht mei graft un mei hilf, zu diah kann ich shpringa vann ich in di kfoah binn; di heida zayla zu diah kumma, fumm end funn di eaht kumma si un sawwa, “Unsah feddah henn nix katt es yusht falshi gettah, gleichnisa es eena nett helfa henn kenna.

²⁰Kenna leit iahra aykni gettah macha? Yau, avvah si sinn nett rechti gettah!”

²¹“Fasell, zayl ich si lanna,” sawkt da HAH, “dessamohl zayl ich si vissa lossa funn mei gvald un macht. No zayla si vissa es mei nohma da HAH is.”