Read Pennsylvania German Jeremia 18 Bible Online

Jeremia 18 - Pennsylvania German bible

Jeremia 18

¹Dess is es vatt fumm HAH es zumm Jeremia kumma is:

²“Gay nunnah zumm mann sei haus es heffa macht, un datt gevvich diah vass du sawwa solsht.”

³So binn ich nunnah am heffa-machah sei haus ganga, un datt voah eah am en ksha macha uf sei rawt.

⁴Avvah's ksha es eah am macha voah funn clay voah fadauva in sei hend, so hott da heffa-machah's in noch en ksha gmacht un hott's gmacht vi's eem kfellich voah.

⁵No is em HAH sei vatt zu miah kumma un hott ksawt:

⁶“Oh haus funn Israel, kann ich nett du mitt eich vi deah heffa-machah dutt?” frohkt da HAH. “Vi clay in di hand fumm heffa-machah, so sind diah in mei hand, diah haus funn Israel.

⁷Vann ich ennichi zeit sawk es en land adda en kaynich-reich aus di vatzel gezowwa sei soll, adda nunnah grissa sei soll adda fadauva sei soll,

⁸un's land es ich gvand habb sich drayt funn sei evil, no doon ich nett ausfiahra vass ich im sinn katt habb.

⁹Un vann ich an en anri zeit sawk es en land adda en kaynich-reich ufgebaut sei soll un geblanst vadda,

¹⁰avvah's dutt no evil fannich mei awwa un heicht miah nett, no doon ich's goot ding nett ausdrawwa es ich im sinn katt habb difoah.

¹¹So nau sawk zu di leit funn Juda un selli in Jerusalem, ‘Dess is vass da HAH sawkt: Gukket moll, ich binn am rishta fa eich veeshtahlich shtrohfa mitt sacha es ich ausrichta zayl geyyich eich. So drayyet zrikk funn eiyah evili vayya, yaydahs funn eich, un fabessahret eiyah vayya un vi diah layvet.’

¹²Avvah si zayla sawwa, ‘Sell is kenn goot. Miah zayla ohhalda du vi miah vella; yaydahs funn uns zayld iahra ayya shteibahrich, evil hatz nohch gay.’”

¹³So dess is vass da HAH sawkt: “Frohwet unnich di heida: Veah hott selayva ennich ebbes keaht vi dess? En greislich ding voah gedu beim leddich maydel Israel.

¹⁴Dutt da shnay funn Lebanon ennichi zeit alles shmelsa funn di felsa? Doon di keela vassahra ennichi zeit shtobba lawfa?

¹⁵Doch mei leit henn mich fagessa; si brenna insens zu iahra falshi gettah, gettah es si macha shtolbahra in iahra vayya un uf iahra aldi pawda. Si sinn ab fumm vayk kumma, un lawfa vo kenn vayk is.

¹⁶Si henn iahra land en veeshtah blatz gmacht, en blatz es ayvichlich nix gezayld vatt. Alli-ebbah es fabei gayt is fashtaund, un shiddeld sei kobb.

¹⁷Vi da vind funn di east, zayl ich si ausnannah shtroiya fannich iahra feinda; ich dray mei bukkel geyyich si un nett mei ksicht, uf em dawk es iahra druvvel uf si kumd.”

¹⁸Si henn ksawt, “Kummet, vella ausmacha vass miah du vella geyyich da Jeremia. Es zayla immah preeshtah sei fa uns lanna, mennah mitt veisheit fa uns roht gevva un brofayda fa Gott sei vadda sawwa. Vella een fanga bei sei aykni vadda fadrayya, un vella een nimmi abheicha.”

¹⁹So habb ich gebayda, “Heich mich ab, oh HAH; heich moll vass selli sawwa es geyyich mich sinn!

²⁰Sett goodes zrikk betzawld sei mitt evil? Doch henn si en loch gegrawva es ich nei falla soll. Denk droh es ich fannich diah kshtanna habb un habb kshvetzt fa si, so es du dei zann vekk draysht funn eena.

²¹So nau dray iahra kinnah ivvah zu hungahs-noht, gebb si ivvah zumm gvald fumm shvatt. Loss iahra veivah unni kinnah sei un vitt-veivah sei, loss iahra mennah doht gmacht sei mitt grankeda, un iahra yungi mennah mitt em shvatt im greek.

²²Loss si fagelshtaht naus greisha funn iahra heisah, vann du bletzlich greeks-gnechta uf si bringsht; fa si henn en loch gegrawva es ich nei falla soll, un henn falla kshteld fa mei fees.

²³Avvah du vaysht awl iahra shkeems fa mich doht macha, oh HAH. So fagebb eena nett fa iahra evili sacha, un loss iahra sinda nett ausgrivva sei fannich diah. Loss si nunnah kshtatzt sei fannich diah, un shaff si ivvah in di zeit funn deim zann.”