Read Pennsylvania German Jeremia 2 Bible Online

Jeremia 2 - Pennsylvania German bible

Jeremia 2

¹Es vatt fumm HAH is zu miah kumma un hott ksawt,

²“Gay un breddich zu di oahra funn selli in Jerusalem, un sawk, ‘Dess is vass da HAH sawkt: “Ich meind noch dei shtandhaftichkeit vo du yung voahsht; du hosht mich leeb katt vi en hochtzich-maydel, un bisht miah nohch kumma in di vildahnis, deich en land es nett eiksayt voah.

³Israel voah heilich gvest zumm HAH, es eahsht-frucht funn sei eahn; alli-ebbah es gessa hott difunn hott sich shuldich gmacht, un evil is uf si kumma.”’” So sawkt da HAH.

⁴Heichet's vatt fumm HAH ab, diah haus fumm Jakob, awl diah kshlechtah fumm Israel.

⁵Dess is vass da HAH sawkt: “Vass fa faylah henn eiyah feddah kfunna in miah, es si so veit vekk ganga sinn funn miah? Si sinn abgettah nohch gloffa es nix veaht voahra, un sinn selvaht nix veaht vadda.

⁶Si henn nett kfrohkt, ‘Vo is da HAH es uns ruff aus Egypta gebrocht hott, un es uns deich di vildahnis kfiaht hott, deich's veesht, leah land, un deich's drukka un dunkel land, en land vo nimmand voond un nimmand deich gayt?’

⁷Ich habb eich in en fruchtboah land gebrocht, fa em land sei frucht un ess-sach essa. Avvah diah sind kumma un hend mei land unrein gmacht, un mei eahbshaft grausam gmacht.

⁸Di preeshtah henn nett kfrohkt, ‘Vo is da HAH?’ Selli es acht gevva uf's ksetz henn mich nett gekend; di foah-gengah henn geyyich mich kshaft. Di brofayda henn gebroffetzeit im Baal sei nohma, un sinn abgettah nohch gloffa es nix veaht voahra.

⁹Fasell bring ich dee glawwa geyyich eich,” sawkt da HAH, “un ich bring aw selli glawwa geyyich eiyah kinds-kinnah.

¹⁰Gaynd moll west uf's island funn Cyprus, un shikket ebbah east zumm land funn Kedar, losset si sacha pinklich aussucha, un saynet eb so ebbes selayva blatz gnumma hott.

¹¹Henn di heida selayva iahra gettah fahandeld, even vann si kenn gettah sinn? Doch mei leit henn iahra hallichkeit fahandeld fa abgettah es eena nett helfa kenna.

¹²Seind fashtaund ivvah dess, oh himla, un shidlet mitt angsht,” sawkt da HAH.

¹³“Fa mei leit henn zvay moll ksindicht: Si henn mich falossa— di shpring funn levendich vassah— un si henn sich sistahns gegrawva, fabrochani sistahns, es kenn vassah hayva.

¹⁴Is da Israel en bunds-gnecht vadda, adda voah eah geboahra es en bunds-gnecht, es alli-ebbah een vekk drawkt vi kshtohla shtoft?

¹⁵Di layb henn groaht ivvah een, si henn laut groaht. Si henn sei land veesht gmacht, sei shtett sinn fabrend un leah.

¹⁶Di mennah funn di shtett Memphis un Thachpanhes henn dei kobb fabrocha.

¹⁷Hosht du dess nett uf dich selvaht gebrocht, vo du da HAH dei Gott falossa hosht, an di zeit es eah dich kfiaht hott uf em vayk?

¹⁸Nau vass batt's dich fa noch Egypta gay fa vassah drinka fumm Nile Revvah? Adda vass batt's dich fa noch Assyria gay un vassah drinka fumm Euphrates Revvah?

¹⁹Dei ungettlichkeit is di shuld es du kshlauwa vasht, bei mich falossa vasht du kshtrohft. Denk droh un fameik dess, vi evil un biddah es es is fa dich vann du da HAH dei Gott falosht, un hosht kenn furcht funn miah.” So sawkt da HAH, da Awlmechtich HAH.

²⁰“Lang zrikk hosht du dei yoch abgebrocha, un hosht dei band abgrissa; du hosht ksawt, ‘Ich zayl dich nett deena!’ Uf alli hohchah hivvel un unnich alli greenah bohm, hosht du huahrahrei gedrivva.

²¹Ich habb dich geblanst vi en seesah vei-shtokk, funn rechtah goodah sohma. Vi dann, hosht du geyyich mich gedrayt un bisht en fadauvanah, vildah vei-shtokk vadda?

²²Even vann du dich vesht mitt lawk, un yoosht feel sayf, da blakka funn dei shuld is alsnoch fannich miah.” So sawkt da Awlmechtich HAH.

²³“Vi kansht du sawwa, ‘Ich binn nett unrein; ich binn em Baal nett nohch ganga?’ Gukk moll vass du gedrivva hosht drunna im deich, denk droh vass du gedu hosht. Du bisht vi en yungi kamayla-mah es ivvahrawlich rumm heah shpringd,

²⁴vi en vildi donkey-mah in di vildahnis, es da vind shmakt in iahra zeit, an selli zeit, veah kann see shtobba? Ennichah hengsht es see vill, brauch iahra nett nohch gay; an selli zeit kann eah see finna.

²⁵Israel, shpring du nett rumm biss dei shoo-sohla deich gvoahra sinn, un dei hals drukka is fumm dasht. Avvah du sawksht, ‘'Sis zu shpoht! Ich habb fremdi gettah leeb, un ich muss eena nohch gay.’

²⁶So vi en deeb fashohmd is vann eah kfanga vatt, so is es haus funn Israel fashohmd— si, un iahra kaynicha, iahra evvahshti, iahra preeshtah un iahra brofayda.

²⁷Si sawwa zu en shtikk hols, ‘Du bisht mei daett,’ un zu en shtay, ‘Funn diah binn ich geboahra.’ Si henn iahra bikkel geyyich mich gedrayt un nett iahra ksichtah. Doch vann si in druvvel kumma, dann sawwa si, ‘Kumm un helf uns!’

²⁸Vo sinn di gettah es diah eich gmacht hend? Loss selli kumma un eich helfa an di zeit es diah in druvvel sind! Fa du, oh Juda, hosht so feel gettah es du shtett hosht.

²⁹Favass faglawwa diah eich zu miah? Diah sind awl geyyich mich gedrayt,” sawk da HAH.

³⁰“Mei shtrohf uf eiyah kinnah voah fa nix; si henn's nett ohgnumma. Eiyah shvatt hott eiyah brofayda ufkfressa vi en rawsichah layb.

³¹Oh diah leit funn deahra zeit, heichet ab zumm vatt fumm HAH: Voah ich vi en vildahnis zu Israel, adda vi en land mitt grohsi dunkelheit? Favass sawwa mei leit, ‘Miah doon vi miah vella; miah zayla diah nimmi nohch kumma’?

³²Dutt en yung maydel fagessa iahra shay sach ohdu, adda en hochtzich-maydel iahra hochtzich glaydah? Doch mei leit henn mich fagessa, fa may dawwa es ma zayla kann.

³³Vi goot bisht du droh am aybrechichi leevi sucha! Even di ungettlicha veibsleit kenna lanna funn diah.

³⁴Uf dei glaydah sinn bloot-blakka kfunna funn di unshuldicha un di oahma, even vann du si nett kfanga hosht am in dei haus nei brecha. Doch, mitt awl demm

³⁵sawksht du, ‘Ich binn unshuldich; da HAH is nett zannich mitt miah.’ Avvah ich zayl dich richta veil du sawksht, ‘Ich habb nett ksindicht.’

³⁶Vi leicht nemsht du dess, un gaysht anri lendah iahra gettah nohch! Du zaylsht yusht so oahrich nunnah glost sei bei Egypta, es du voahsht bei Assyria.

³⁷Du falosht sellah blatz in shohm, mitt dei hend ivvah dei kobb. Fa da HAH hott selli nunnah gedrayt, es du dei hofning nei dusht. Si zayla diah nett helfa.”