Read Pennsylvania German Jeremia 21 Bible Online

Jeremia 21 - Pennsylvania German bible

Jeremia 21

¹Dess is es vatt fumm HAH es zumm Jeremia kumma is vo da Kaynich Zedekia da Pashhur, em Malchia sei boo, un da preeshtah Zephania, em Maaseia sei boo, zu eem kshikt hott. Si henn ksawt,

²“Frohk da HAH fa uns, veil da Nebukadnezar, da kaynich funn Babylon, am greek macha is mitt uns. Fleicht dutt da HAH vundahboahri sacha fa uns vi eah eahshtah gedu hott, un unsah feind gayt zrikk haym.”

³Avvah da Jeremia hott eena ksawt, “Gaynd un sawwet zumm Zedekia,

⁴‘Dess is vass da HAH, da Gott funn Israel, sawkt: Ich zayl di greeks-ksharra es in dei hend sinn zrikk geyyich dich drayya, selli es du am yoosa bisht fa da kaynich funn Babylon un sei greeks-gnechta fechta, selli es uf di annah seit funn di vand sinn am eich eishpadda. Ich zayl dei greeks-ksha zammah samla in di mitt funn di shtatt.

⁵Ich selvaht zayl fechta geyyich dich mitt en naus-kshtrekti hand un en mechtichah oahm, gans rawsich bays un mitt en gleedichah zann unni bamhatzichkeit.

⁶Ich zayl alli-ebbah es in di shtatt voond shlauwa mitt en shreklichi granket so es si awl shtauva, mensha un diahra.

⁷Noch sellem, sawkt da HAH, awl dee zayl ich ivvah-drayya zumm Kaynich Nebukadnezar funn Babylon, un zu eiyah feinda es eich doht macha vella—da Zedekia, da kaynich funn Juda, sei evvahshti un awl di leit in di shtatt es noch ivvahrich sinn funn di granket, fumm em shvatt un funn di hungahs-noht. Eah zayld si awl doht macha mitt em shvatt unni bamhatzichkeit adda si davvahra.’

⁸Du solsht aw di leit sawwa, ‘Dess is vass da HAH veidah sawkt: Nau gukket moll, ich binn am da vayk funn layva un da vayk fumm doht fannich eich setza.

⁹Veah-evvah es in di shtatt bleibt zayld doht gmacht sei beim shvatt, di hungahs-noht adda di granket. Avvah alli-ebbah zayld layva es naus gayt un sich ivvah-drayt zu di leit funn Babylon es eich eikshpatt henn.

¹⁰Ich habb ausgmacht fa dee shtatt shawda du un nett goot sei zu iahra, sawkt da HAH. Di shtatt zayld ivvah-gevva sei in di hend fumm kaynich funn Babylon, un eah zayld si ufbrenna mitt feiyah.’

¹¹Un veidah, sawk zumm kaynich-haus funn Juda, ‘Heichet ab zumm HAH sei vatt,

¹²diah es fumm Dawfit sei nohch-kummashaft sind, dess is vass da HAH sawkt: Vann ebbah grawbt vatt, dann gevvet eem sei recht geyyich da rawvah; doond dess alli meiya es eahsht ding, adda mei zann gayt naus vi en gleedich feiyah, un brend so es nimmand's ausmacha kann, veil diah dess evil gedu hend.

¹³Ich binn geyyich dich, du es ovvich em deich voonsht vi en felsa is raus shtekt ovvich em ayvana,’ sell sawkt da HAH. ‘Diah mennah sawwet, “Veah kann geyyich uns kumma? Veah kann do in unsah shteikah blatz nei kumma?”

¹⁴Ich zayl eich shtrohfa fa vass diah gedu hend; ich shtekk eiyah busha oh mitt feiyah, un ich fabrenn alles um eich rumm.’” So sawkt da HAH.