Read Pennsylvania German Jeremia 27 Bible Online

Jeremia 27 - Pennsylvania German bible

Jeremia 27

¹Glei noch demm es da Zedekia, em Josia sei boo, da kaynich funn Juda vadda is, is dess vatt zumm Jeremia kumma fumm HAH:

²Dess is vass da HAH ksawt hott zu miah: “Mach en yoch aus leddah shtraebs un shtikkah hols un henk's an dei hals.

³No shikk vatt zu di kaynicha funn Edom, Moab, Ammon, Tyrus, un Sidon deich iahra mennah es si an Jerusalem zumm Kaynich Zedekia funn Juda kshikt henn.

⁴Sawk eena es si iahra meishtah sawwa sella, ‘Dess is vass da Awlmechtich HAH, da Gott funn Israel, sawkt: “Sawwet eiyah meishtah dess:

⁵Mitt mei grohsi graft un naus kshtrektah oahm habb ich di eaht, di leit un di diahra es druff sinn gmacht, un ich gebb si zu ennich ebbah es ich vill.

⁶Nau zayl ich awl eiyah lendah ivvah-gevva zu meim gnecht, da Nebukadnezar, da kaynich funn Babylon; even di diahra fumm feld zayla unnich eem sei.

⁷Awl di lendah zayla een, sei boo un sei kinds-kind deena biss an di zeit vann sei ayya land fald. No zayla feel lendah un grohsi kaynicha een macha si deena.

⁸Avvah vann ennich land adda kaynich-reich's nett dutt fa da Nebukadnezar, da kaynich funn Babylon, deena un da hals unnich sei yoch du, dann shtrohf ich sell land mitt em shvatt, hungahs-noht un grankeda biss ich sell land gans unnah gay mach bei sei hand, sawkt da HAH.

⁹So heichet nett ab zu eiyah brofayda, voah-sawwah, drohma-deidah, zaycha-deidah un zaubahrah, dee es eich sawwa, ‘Diah zaylet da kaynich funn Babylon nett deena.’

¹⁰Si broffetzeiya leeya zu eich un sell zayld macha es diah veit vekk funn eiyah lendah gedrawwa vaddet. Ich dreib eich raus un diah kummet um.

¹¹Avvah ennichi leit es iahra hals bikka unnich's yoch fumm kaynich funn Babylon un een deena, selli leit loss ich in iahra ayya land bleiva fa's land shaffa un datt voona, sawkt da HAH.”’”

¹²Ich habb selli sayma vadda gevva zumm Zedekia, da kaynich funn Juda. Ich habb ksawt, “Beeyet eiyah hals unnich's yoch fumm kaynich funn Babylon; deenet een un sei leit, no kennet diah levendich bleiva.

¹³Favass setsht du un dei leit shtauva beim shvatt, hungahs-noht un grankeda, sell es da HAH gedroit hott fa du zu ennichi leit es da kaynich funn Babylon nett deena?

¹⁴Heichet nett ab zu di vadda funn di brofayda es sawwa zu eich, ‘Diah zaylet da kaynich funn Babylon nett deena,’ fa si broffetzeiya leeya zu eich.

¹⁵‘Ich habb si nett kshikt,’ sawkt da HAH, ‘si sinn am leeya broffetzeiya in meim nohma. Fasell zayl ich eich ausdreiva un diah zaylet umkumma, diah un di brofayda es am broffetzeiya sinn zu eich.’”

¹⁶No habb ich ksawt zu di preeshtah un awl dee leit, “Dess is vass da HAH sawkt: Doond di brofayda nett abheicha es sawwa, ‘Heichet moll, adlich glei nau vadda di ksharra fumm HAH sei haus zrikk gebrocht funn Babylon.’ Si sinn am leeya broffetzeiya zu eich.

¹⁷Heichet si nett ab. Deenet da kaynich funn Babylon un diah bleivet levendich. Favass sett dee shtatt nunnah grissa sei?

¹⁸Vann si brofayda sinn un's vatt fumm HAH henn, loss si da Awlmechtich HAH ohbayda es di ivvahricha ksharra im HAH sei haus, im kaynich-haus funn Juda un in Jerusalem nett vekk gnumma vadda zu Babylon.

¹⁹Fa dess is vass da Awlmechtich HAH sawkt veyyich di poshta, da Say, di shtaends un awl di anra ksharra fumm tempel es ivvahrich sinn in dee shtatt,

²⁰selli es da Nebukadnezar, da kaynich funn Babylon nett vekk gnumma hott vo eah da Jechonia vekk gedrawwa hott funn Jerusalem zu Babylon. Da Jechonia voah em Joiakim sei boo es aw als kaynich funn Juda voah. Awl di evvahshti funn Juda un Jerusalem voahra mitt em Jechonia zu Babylon gnumma an selli zeit.

²¹Dess is vass da Awlmechtich HAH, da Gott funn Israel, sawkt veyyich di sacha es ivvahrich sinn im HAH sei haus un im kaynich-haus funn Juda un Jerusalem:

²²‘Si zayla noch Babylon gnumma sei un zayla datt bleiva biss ich kumm fa si,’ sawkt da HAH. ‘No zayl ich si zrikk bringa un si in deah blatz du.’”