Read Pennsylvania German Jeremia 28 Bible Online

Jeremia 28 - Pennsylvania German bible

Jeremia 28

¹Sell saym yoah, im fimfda moonet fumm fiahda yoah es da Zedekia kaynich funn Juda voah, hott da Hanania, em Assur sei boo un en brofayt funn Gibeon, kshvetzt zu miah im HAH sei haus. Fannich awl di preeshtah un di leit hott eah ksawt:

²“Dess is vass da Awlmechtich HAH, da Gott funn Israel, sawkt: ‘Ich habb em kaynich funn Babylon sei yoch fabrocha.

³In zvay yoah's zeit zayl ich awl's ksha fumm HAH sei haus zrikk bringa es da Nebukadnezar, da kaynich funn Babylon, funn do noch Babylon gnumma hott.

⁴Ich zayl da Jechonia, em Joiakim sei boo es kaynich funn Juda voah, aw zrikk bringa mitt awl di anra leit funn Juda es zu Babylon gnumma voahra,’ sawkt da HAH, ‘veil ich em kaynich funn Babylon sei yoch fabrecha zayl.’”

⁵No hott da brofayt Jeremia kshvetzt zumm brofayt Hanania fannich awl di preeshtah un di leit es datt kshtanna henn im HAH sei haus.

⁶Eah hott ksawt, “Amen! Ich hoff da HAH dutt sell! Ich hoff da HAH macht di vadda voah kumma es du gebroffetzeit hosht veyyich's ksha im HAH sei haus voah un awl di leit es vekk gnumma voahra zrikk do heah bringa funn Babylon.

⁷Doch, heich ab vass ich zu sawwa habb fannich diah un awl di leit:

⁸Di brofayda es glaybt henn eb ich un du in aldi zeida henn gebroffetzeit veyyich greek, hungahs-noht un grankeda geyyich feel lendah un kaynich-reicha.

⁹Avvah da brofayt es fridda broffetzeiya dutt, vatt yusht ohgnumma es eah funn Gott kshikt voah vann sei vadda voah kumma.”

¹⁰No hott da brofayt Hanania's yoch ab fumm brofayt Jeremia sei hals gnumma un hott's fabrocha.

¹¹Eah hott ksawt fannich awl di leit, “Dess is vass da HAH sawkt: ‘Grawt so zayl ich's yoch fabrecha es da Nebukadnezar, da kaynich funn Babylon, uf di hels funn awl di lendah gedu hott. Dess nemd blatz in zvay yoah's zeit.’” No is da Jeremia datt vekk ganga.

¹²Noch demm es da brofayt Hanania's yoch abgebrocha katt hott fumm brofayt Jeremia sei hals, is dess vatt fumm HAH zumm Jeremia kumma:

¹³“Gay un sawk em Hanania, ‘Dess is vass da HAH sawkt: Du hosht's holsich yoch fabrocha, avvah deich sell kumd nau en eisich yoch.

¹⁴Dess is vass da Awlmechtich HAH, da Gott funn Israel, sawkt: Ich zayl en eisich yoch uf da hals funn awl dee lendah du un si zayla da Nebukadnezar, da kaynich funn Babylon, deena. Si missa een deena, un even di diahra im feld sinn unnich eem.’”

¹⁵No hott da brofayt Jeremia ksawt zumm brofayt Hanania, “Heich moll, Hanania! Da HAH hott dich nett kshikt, avvah du hosht gmacht es dee leit sich falossa uf leeya.

¹⁶So dess is vass da HAH sawkt: ‘Ich zayl dich ab funn di eaht nemma. Dess yoah zaylsht du shtauva, veil du gebreddicht hosht es di leit geyyich da HAH gay sella.’”

¹⁷Un im sivvada moonet funn sellem yoah is da brofayt Hanania kshtauva.