Read Pennsylvania German Jeremia 42 Bible Online

Jeremia 42 - Pennsylvania German bible

Jeremia 42

¹No is da Johanan, em Kareach sei boo, da Jesania, em Hosaia sei boo, awl di anra hauptmennah un awl di leit fumm glenshta zumm grayshta kumma,

²un henn ksawt zumm brofayt Jeremia, “Miah bidda dich es du zumm HAH dei Gott baytsht fa awl dee es ivvahrich sinn. Du kansht sayna, miah voahra als feel, avvah nau sinn nett feel ivvahrich.

³Bayt es da HAH dei Gott uns sawkt vo miah anna gay sella un vass miah du sella.”

⁴Da brofayt Jeremia hott ksawt, “Ich habb eich keaht, un ich zayl bayda zumm HAH eiyah Gott vi diah kfrohkt hend. Ich zayl eich alles sawwa es da HAH sawkt un zayl nix zrikk halda funn eich.”

⁵No henn si ksawt zumm Jeremia, “Loss da HAH en shtandhaftichah un en voahhaftichah zeiya geyyich uns sei vann miah nett alles doon es da HAH dei Gott diah sawkt fa uns sawwa.

⁶Es macht nix aus eb's goot adda shlecht is, miah zayla em HAH unsah Gott heicha, deah es miah dich am shikka sinn ditzu. Miah vella havva es es goot gayt mitt uns, vann miah em HAH unsah Gott heicha.”

⁷Zeyya dawk shpaydah is es vatt fumm HAH zumm Jeremia kumma.

⁸So hott da Jeremia da Johanan, em Kareach sei boo, awl di hauptmennah es bei eem voahra un awl di leit bei groofa fumm glenshta zumm grayshta.

⁹Eah hott ksawt zu eena, “Dess is vass da HAH, da Gott funn Israel sawkt, deah es diah mich ditzu kshikt hend, so es ich eiyah gebayt zu eem bringa soll. Eah sawkt:

¹⁰‘Vann diah in demm land bleivet, dann bau ich eich uf un reis eich nett nunnah; ich blans eich un reis eich nett aus di vatzel, fa ich binn bedreebt ivvah's shreklich fadauves es ich uf eich gebrocht habb.

¹¹Feichet eich nett veyyich em kaynich funn Babylon, deah es diah eich nau feichet diveyya. Feichet eich nett veyyich eem, sawkt da HAH, ich zayl bei eich sei fa eich frei macha un eich aus sei hand halda.

¹²Ich veis eich bamhatzichkeit so es eah bamhatzich is zu eich un eich viddah in eiyah land bringd.’

¹³Nau avvah, vann diah sawwet, ‘Miah zayla nett in demm land bleiva,’ un doond em HAH eiyah Gott nett heicha deich sell,

¹⁴un vann diah sawwet, ‘Nay, miah zayla gay un in Egypta voona vo miah kenn greek sayna, vo's blohs-hann nett geblohsa vatt un vo miah nett hungahrich vadda fa broht,’

¹⁵no heichet's vatt fumm HAH, diah es ivvahrich sind funn Juda. Dess is vass da Awlmechtich HAH, da Gott funn Israel, sawkt: ‘Vann diah eiyah meind uf gmacht hend fa noch Egypta gay, un gaynd datt nunnah fa datt voona,

¹⁶no zayld's shvatt es diah eich feichet diveyya eich ivvah-nemma datt, di hungahs-noht es diah angsht hend difunn kumd eich nohch in Egypta un diah zaylet shtauva datt.

¹⁷Awl selli es iahra meind uf gmacht henn fa noch Egypta gay fa datt voona zayla shtauva beim shvatt, hungahs-noht un peshtelens; nett ayns zayld ivvahrich bleiva fumm fadauves es ich uf si bring.’

¹⁸Dess is vass da Awlmechtich HAH, da Gott funn Israel, sawkt: ‘So vi mei veeshtah zann ausgleaht voah uf selli es in Jerusalem gvoond henn, so zayld mei zann ausgleaht sei uf eich vann diah noch Egypta gaynd. Diah vaddet en fluch, en kshpott, en shand un sind grausam; diah zaylet deah blatz nee nimmi sayna.’

¹⁹Da HAH hott eich ksawt, diah es ivvahrich sind funn Juda, ‘Gaynd nett noch Egypta.’ Fashtaynd dess, es ich eich heit gvand habb.

²⁰Diah hend eiyah layva in di kfoah gedu vo diah mich zumm HAH, eiyah Gott, kshikt hend un ksawt hend, ‘Bayt zumm HAH unsah Gott fa uns; sawk uns alles es eah sawkt, no doon miah's.’

²¹Ich habb eich's ksawt heit, avvah diah hend alsnoch nett alles gedu es da HAH eiyah Gott mich kshikt hott fa eich sawwa.

²²Avvah nau kennet diah shuah sei veyyich demm: Diah zaylet shtauva beim shvatt, hungahs-noht un peshtelens am blatz es diah anna gay vellet fa voona.”