Read Pennsylvania German Jeremia 47 Bible Online

Jeremia 47 - Pennsylvania German bible

Jeremia 47

¹Dess is es vatt fumm HAH es zumm brofayt Jeremia kumma is veyyich di Philishtah eb da Pharao Gaza kfochta hott.

²Dess is vass da HAH sawkt: “Gukk moll vi di vassahra funn di natt am ruff kumma sinn; si kumma ruff un lawfa shteik. Si lawfa ivvah's gans land un filla's uf, un awl di shtett un selli es drinn voona. Di leit greisha naus; awl di leit im land zayla heila,

³vann si di geil heahra kumma zu shpringa, un di yacht funn di greeks-veyya, mitt iahra reddah am rabla. Di feddah zayla sich nett zu iahra kinnah drayya fa eena helfa; iahra hend henka nunnah un sinn matt.

⁴Fa da dawk is kumma vann awl di Philishtah folshtendich ausgrivva vadda, un nimmand bleibt ivvahrich es Tyrus un Sidon helfa kann. Da HAH zayld di Philishtah umbringa, selli vass ivvahrich sinn am say nohch funn Kaphthor.

⁵Gaza heild un shayft sei kobb; di leit funn Askalon sinn gans shtill. Vi lang zaylet diah eich shneida, diah es ivvahrich sind funn di valley?

⁶‘Oh du shvatt fumm HAH, vi lang zayld's sei biss du roowa zaylsht? Gay zrikk in dei leddah-sakk un hayb dich shtill.’

⁷Avvah vi kann's shvatt roowa vann da HAH's gebott gevva hott, vann eah's gebott gevva hott fa Askalon shlauwa am say nohch?”