Read Pennsylvania German Jeremia 51 Bible Online

Jeremia 51 - Pennsylvania German bible

Jeremia 51

¹Dess is vass da HAH sawkt: “Gukket moll, ich zayl en vind ufsetza geyyich Babylon es fadaubt, un geyyich iahra leit es geyyich mich sinn.

²Ich zayl fremdi leit an Babylon shikka vi en vind es shprau vekk blohst, si kumma geyyich see funn alli seida uf em dawk funn fadauves.

³Gevvet di sheesah nett zeit fa iahra bow beeya, losset si iahra greeks-ksha nett ohdu. Hend kenn mitt-leides mitt di yunga mennah, machet awl iahra greeks-leit doht.

⁴Si falla doht nunnah in Babylon, si vadda deich kshtohsa in di shtrohsa.

⁵Israel un Juda voahra nett falossa glost bei Gott, iahra Awlmechtichah HAH, even vann iahra land ksindicht hott geyyich da Heilich Gott funn Israel.

⁶Shpringet vekk funn Babylon, diah leit funn Israel un Juda, un haldet eich funn doht gmacht sei bei em shtrohf funn iahra sinda. 'Sis em HAH sei zeit fa auseeva, eah gebt iahra zrikk vass see fadeend hott.

⁷Babylon voah en goldich kobli im HAH sei hand, see hott di gans eaht ksoffa gmacht. Di heida henn iahra vei gedrunka un fasell sinn si aus em kobb ganga.

⁸Babylon is bletzlich kfalla un fabrocha vadda. Heilet ivvah see! Bringet shmiah fa iahra shmatza; fleicht kann see kayld sei.

⁹‘Miah henn broviaht Babylon hayla, avvah see hott nett kayld sei kenna; losset see hokka un vella in unsah ayya land gay, fa iahra shtrohf langd nuff in da himmel, so hohch es di volka.

¹⁰Da HAH hott gvissa es miah im rechta voahra; kummet, vella in Zion gay un sawwa vass da HAH, unsah Gott gedu hott.’

¹¹Machet eiyah arrows shauf, un rishtet eich mitt eiyah shields. Da HAH hott di kaynicha funn Media ufkshtatt, veil eah ausgmacht hott fa Babylon folshtendich fadauva. Da HAH zayld auseeva, veil see sei tempel zammah grissa hott.

¹²Gevvet da zaycha fa di vanda funn Babylon nunnah reisa! Doond may vatsh-mennah naus, doond di vatsh-mennah an iahra bletz, rishtet eich fa shlichtich fassich gay! Da HAH hott ausgedrawwa vass eah im sinn katt hott, vass eah auskshprocha katt hott geyyich di leit funn Babylon.

¹³Diah es bei di feel vassahra voonet, un sind oahrich reich, di zeit funn eiyah end is kumma, eiyah layves-fawda vatt abkshnidda.

¹⁴Da Awlmechtich HAH hott kshvoahra bei sich selvaht: ‘Voahlich, ich zayl Babylon filla mitt greeks-mennah vi en shvoahm locusts. Si zayla ivvah eich shtay un laut greisha.’”

¹⁵“Gott hott di eaht gmacht mitt sei graft; eah hott di veld gmacht deich sei veisheit, un di himla deich sei fashtand.

¹⁶Vann sei shtimm shvetzt, dann doon di vassahra im himmel roahra; eah macht da nevvel uf kumma fumm end funn di eaht. Eah shikt gviddah mitt em reyya, un bringd da vind aus sei shtoah-heisah.

¹⁷Alli-ebbah is dumm, un vayst nix, da gold-shmitt es gleichnisa macht muss sich shemma mitt si, sei gleichnisa sinn falsh un henn kenn ohften in sich.

¹⁸Si sinn nix veaht un sedda fashpott vadda; si gayn zu nix vann si moll gricht vadda.

¹⁹Da Gott fumm Jakob is nett vi dee; eah is sellah es alles kshaffa hott, un eah hott's kshlecht funn Israel sei aykni leit gmacht. Sei nohma is da Awlmechtich HAH!”

²⁰“Du bisht mei greeks-hammah, mei greeks-ksha fa fechta— mitt diah brech ich di heida in shtikkah, mitt diah doon ich kaynich-reicha ausreiva,

²¹mitt diah brech ich gaul un reidah in shtikkah, mitt diah brech ich vauwa un fuah-mann in shtikkah,

²²mitt diah brech ich manskal un veibsmensh in shtikkah, mitt diah brech ich da ald mann un da yung mann in shtikkah, mitt diah brech ich boova un mayt in shtikkah,

²³mitt diah brech ich da shohf-heedah un di drubb shohf in shtikkah, mitt diah brech ich da bavvah un sei fuah in shtikkah, mitt diah brech ich roolahs un feddahshti in shtikkah.”

²⁴“Fannich eiyah awwa zayl ich Babylon un selli es drinn voona zrikk betzawla fa di evili sacha es si gedu henn zu Zion,” sawkt da HAH.

²⁵“Nau gukk moll, Babylon, ich binn geyyich dich, du berg es alles fadaubsht, du es di gans eaht fadaubsht,” sawkt da HAH. “Ich shtrekk mei hand naus geyyich dich, un roll dich ivvah di felsa-vanda nunnah; ich mach dich vi en fabrendah berg.

²⁶Kenn shtay vatt gnumma funn diah fa en ekk-shtay, un aw nett fa en mavvah; du solsht en leahrah, veeshtah blatz sei fa'immah,” sawkt da HAH.

²⁷“Gevvet da zaycha im land! Blohset's blohs-hann unnich di heida! Rishtet di heida fa fechta geyyich Babylon; roofet di kaynich-reicha funn Ararat, Minni un Askenas geyyich see. Setzet en greeks-hauptmann uf fa foah gay, shikket greeks-geil geyyich see vi en shvoahm locusts.

²⁸Rishtet di heida fa greek macha geyyich see— di kaynicha funn Media, awl iahra feddahshti un evvahshti, un awl di lendah es unnich eena sinn.

²⁹Es land ziddaht un shiddeld, fa em HAH sei gedanka geyyich Babylon vadda folfild; naymlich, fa's land Babylon in en vildahnis macha, nimmand zayld datt voona.

³⁰Babylon iahra greeks-gnechta henn ufkeaht fechta, si missa in iahra fashteikti bletz bleiva. Si henn kenn grefta may un sinn matt, si sinn vadda vi veibsleit. Babylon iahra heisah sinn ohkshtekt mitt feiyah, iahra doah-rikla sinn fabrocha.

³¹Selli es vatt drawwa gayn aynah noch em anra, zumm kaynich funn Babylon, un sawwa eem es sei shtatt ivvah-gnumma is,

³²es di vayya deich di revvahra ivvah-gnumma sinn, es es shvamb-graws ohkshtekt is, un es sei greeks-gnechta fagelshtaht sinn.”

³³Dess is vass da Awlmechtich HAH, da Gott funn Israel, sawkt: “Di Dochtah funn Babylon is vi en dresha-floah, an di zeit vann eah nunnah kshtamd vatt; sell maynd di zeit funn iahra eahn zayld glei kumma.”

³⁴“Da Kaynich Nebukadnezar funn Babylon hott uns kfressa, un uns in di shtatt funn Jerusalem umgebrocht, eah hott uns ausgleaht vi en leahrah tsheah. Eah hott uns kshlukt vi en shlang, un hott sei mawwa kfild mitt unsah besht sach, no hott eah's ivvahricha raus kshpautzt.”

³⁵Loss di leit funn Zion sawwa, “Babylon muss zrikk betzawld vadda fa da unfashtand es gedu voah zu uns.” Loss selli in Jerusalem sawwa, “Di leit in Babylon missa goot shtay fa unsah bloot es gegossa voah.”

³⁶Fasell sawkt da HAH dess zu di leit funn Jerusalem: “Ich zayl ufshtay fa eich, un eiyah feinda folshtendich zrikk betzawla. Ich zayl iahra revvahra leah macha, un iahra shpringa uf-drikla.

³⁷Babylon zayld en shtay haufa vadda, en blatz fa vildi hund. See vatt en blatz funn seishi angsht un shpott, nimmand zayld datt voona.

³⁸Iahra leit zayla roahra vi di layb doon, un gnarra vi yungi layb doon.

³⁹Diveil es si ufkshtatt sinn, dann setz ich en grohs essa fannich si, un mach si ksoffa so es si fraylich vadda, eishlohfa, un nee nimmi ufvekka.” So sawkt da HAH.

⁴⁰“Ich bring si nunnah vi lemmah fa kshlachta vadda, vi shohf-bekk un gays-bekk.

⁴¹Vi is Sheshach kfalla, dee shtatt es uf gebraekt voah bei di gans eaht! Vi is Babylon so en shreklichah vundah vadda unnich di heida!

⁴²Da say kumd ruff ivvah Babylon, sei vella dekka see zu.

⁴³Iahra shtett vadda leah, vi en drukka land in di vildahnis, en land es nimmand drinn voond, un es kenn mensh deich gayt.

⁴⁴Ich zayl Babylon iahra gott Bel shtrohfa; ich mach een raus shpautza vass eah kshlukt hott. Di heida zayla nimmi lengah zu eem lawfa; di mavvahra funn Babylon sinn nunnah kfalla.

⁴⁵Kummet raus funn datt, mei leit, shpringet fa eiyah layva, shpringet vekk fumm HAH sei gleedichah zann.

⁴⁶Faliahret nett moot un feichet eich nett, vann diah kshvetzah heahret im land; ay kshvetz vatt rumm ksawt dess yoah, un en anres neksht yoah, veyyich unfashtand im land, un veyyich ay roolah geyyich da annah fechta.

⁴⁷Nau gukket, di dawwa sinn am kumma vann ich di abgettah funn Babylon shtrohf; iahra gans land vatt fashohmd un awl iahra dohdi leiya datt drinn rumm.

⁴⁸No zayld da himmel un di eaht un alles es drinn is greisha mitt frayt ivvah Babylon, veil iahra feinda funn di natt runnah kumma fa see fechta.” So sawkt da HAH.

⁴⁹“Babylon muss falla veil see so feel leit funn Israel doht gmacht hott, un aw veil see so feel leit doht gmacht hott ivvah di gans veld.”

⁵⁰“Diah es nett doht gmacht voahret mitt em shvatt, falosset sell land grawt nau, doond's nett ab! Fagesset da HAH nett in sellem land veit ab, un denket an Jerusalem.

⁵¹Diah sawwet, ‘Miah sinn fashohmd veil miah fashpott vadda sinn; miah dekka unsah ksichtah zu mitt shohm veil fremdi nei in di heilicha bletz fumm HAH sei haus ganga sinn.’”

⁵²Avvah da HAH sawkt, “Di dawwa sinn am kumma vann ich di abgettah funn Babylon shtrohfa zayl, un selli es vay gedu sinn zayla yammahra ivvahrawlich im land.

⁵³Even vann Babylon so hohch es da himmel gay kend, un see dayt iahra mavvahra shteik un hohch in di hay macha, doch shikk ich leit fa see faveeshta,” sawkt da HAH.

⁵⁴“Ma heaht Babylon am greisha fa hilf, un di yacht funn en veesht fadauves kumd funn di Chaldayah iahra land.

⁵⁵Da HAH is am Babylon nunnah reisa un is am di shtatt shtill macha. Di feinda gayn nei vi vella funn en grohs vassah; di yacht funn iahra shtimma is keaht.

⁵⁶Di feinda sinn kumma Babylon faveeshta, iahra greeks-gnechta vadda kfanga gnumma, un iahra bows vadda fabrocha. Fa da HAH is en Gott es zrikk betzawld, un eah zayld folshtendich zrikk betzawla.

⁵⁷Ich mach iahra feddahshti un mennah mitt veisheit ksoffa, un aw iahra evvahshti un hauptmennah un greeks-gnechta; si shlohfa ei un vekka nimmi uf.” So sawkt da Kaynich es Awlmechtich HAH hayst.

⁵⁸Dess is vass da Awlmechtich HAH sawkt: “Babylon iahra dikki mavvahra vadda nunnah grissa, iahra hohchi doahra vadda ohkshtekt mitt feiyah. Di leit shaffa hatt, alles fa nix; di heida veahra sich aus, avvah doch vatt alles fabrend.”

⁵⁹Dess is es vatt es da Jeremia kshikt hott mitt em Seraia es em Neria sei boo voah, un eah voah em Machseia sei boo. Da Seraia hott acht gevva uf em kaynich sei sach fa da kaynich. Eah is mitt em Kaynich Zedekia funn Juda noch Babylon ganga im fiaht yoah funn sei reich.

⁶⁰Da Jeremia hott in en buch kshrivva katt alles veeshtes es blatz nemma zayld veyyich Babylon; naymlich, alles es ufkshrivva voah veyyich Babylon.

⁶¹Da Jeremia hott ksawt zumm Seraia, “Vann du moll in Babylon kumsht, sei shuah es du awl dee vadda laut laysht zu di leit.

⁶²No sawk, ‘Oh HAH, du hosht ksawt es du deah blatz folshtendich fadauva zaylsht, so es kenn mensh adda diah drinn layva zayld, es zayld leah sei fa'immah.’

⁶³Vann du faddich bisht's buch laysa, binn en shtay droh un shmeis es in da Euphrates Revvah.

⁶⁴No sawk, ‘So zayld Babylon unnah gay un nee nimmi ruff kumma deich's veesht fadauves es ich uf see bringa zayl. Un iahra leit macha sich meet un matt.’” Dess is es end fumm Jeremia sei vadda.