Read Pennsylvania German Jeremia 7 Bible Online

Jeremia 7 - Pennsylvania German bible

Jeremia 7

¹Dess is es vatt fumm HAH es zumm Jeremia kumma is un hott ksawt:

²“Shtay an's doah fumm HAH sei haus un breddich dee vadda datt: ‘Heichet's vatt fumm HAH ab, awl diah leit funn Juda es deich dee doahra gayn fa da HAH deena.

³Dess is vass da Awlmechtich HAH, da Gott funn Israel, sawkt: Fabessahret eiyah vayya un di sacha es diah doond, no loss ich eich voona an demm blatz.

⁴Falosset eich nett uf fafiahrichi vadda un sawwet, “Dess is em HAH sei tempel, dess is em HAH sei tempel, dess is em HAH sei tempel!”

⁵Vann diah eiyah vayya un eiyah verka folshtendich fa'ennahret un doond recht zu nannah,

⁶vann diah di fremda, selli unni eldra un di vitt-veivah nett nunnah dreddet, un doond nett unshuldich bloot fageesa an demm blatz, un doond eich nett shawda bei anri gettah nohch gay,

⁷no loss ich eich in demm blatz voona, im land es ich eiyah foah-feddah gevva habb fa'immah un immah.

⁸Avvah gukket moll, diah sind am eich falossa uf fafiahrichi vadda es nix veaht sinn.

⁹Zaylet diah shtayla un maddahrei dreiva, aybrecha un falsh shveahra, opfahra macha zumm Baal un fremdi gettah nohch gay es diah nett kennet,

¹⁰un no kumma un fannich miah shtay in demm haus, es meim Nohma nohch gnohmd is, un sawwa, “Miah sinn frei”—frei fa awl dee grausami sacha du?

¹¹Is dess haus es mei Nohma drawkt, en loch foll rawvah vadda zu eich? Avvah ich voah am vatsha, sawkt da HAH.

¹²Gaynd nau moll an da blatz in Silo, datt vo mei Nohma eahshtah gvoond hott, un saynet vass ich gedu habb zu sellem blatz veil mei leit, di Kinnah-Israel, so ungettlich voahra.

¹³Nau veil diah awl dee sacha gedu hend, sawkt da HAH, habb ich ivvah un ivvah zu eich kshvetzt avvah diah hend mich nett abkeicht. Ich habb eich groofa avvah diah hend miah kenn andvat gevva.

¹⁴Fasell, vass ich gedu habb zumm blatz an Silo, zayl ich nau du zumm haus es mei Nohma drawkt, deah tempel es diah eich falosset druff, un da blatz es ich eich un eiyah foah-feddah gevva habb.

¹⁵Ich zayl eich vekk shtohsa funn meim ksicht so vi ich awl eiyah breedah, di leit fumm Ephraim, vekk kshtohsa habb.’

¹⁶Avvah du solsht nett bayda fa dee leit. Roof mich nett oh fa si, un hald nett oh an miah, fa ich zayl dich nett abheicha.

¹⁷Saynsht du nett vass si am du sinn in di shtett funn Juda un in di shtrohsa funn Jerusalem?

¹⁸Di kinnah geddahra feiyah-hols, di feddah shtekka's feiyah oh un di veibsleit shaffa da dayk un bakka kucha fa di kaynich-fraw fumm himmel. Si leahra drink-opfahra aus zu anri gettah yusht fa mich fa'eiyahra.

¹⁹Avvah is es mich es si am fa'eiyahra sinn? frohkt da HAH. Sinn si nett am sich selvaht vay du un sich selvaht fashohma?

²⁰Fasell sawkt da Awlmechtich HAH dess: ‘Mei baysah zann zayld ausgleaht vadda uf deah blatz, uf di mensha, uf di diahra, uf di baym im feld un uf's frucht fumm grund. Mei zann zayld brenna un nett ausgmacht vadda.’

²¹Dess is vass da Awlmechtich HAH, da Gott funn Israel sawkt: ‘Gaynd un doond eiyah brand-opfahra zu eiyah anri opfahra un esset's flaysh selvaht!

²²Vo ich eiyah foah-feddah aus Egypta gebrocht habb, habb ich nett yusht kshvetzt zu eena un eena gebodda gevva veyyich brand-opfahra un anri opfahra,

²³avvah ich habb eena dess gebott gevva: Heichet miah, no zayl ich eiyah Gott sei un diah zaylet mei leit sei. Lawfet folshtendich im vayk es ich eich gebodda habb. No zayld's goot gay mitt eich.

²⁴Avvah si henn nett keicht un acht katt. In blatz funn sell sinn si iahra ayknah roht nohch gloffa, un sinn iahra shteibahrich un evil hatz nohch ganga. Si sinn hinnahsich un nett fassich gloffa.

²⁵Fumm dawk es ich eiyah foah-feddah aus Egypta kfiaht habb biss nau, habb ich ohkalda mei gnechta di brofayda zu eich shikka dawk noch dawk.

²⁶Avvah si henn mich nett abkeicht adda mich acht katt. Si henn sich kshteibaht un henn may evil gedu es iahra foah-feddah.’

²⁷Vann du eena awl dess sawksht, zayla si dich nett abheicha; vann du si roofsht, zayla si diah kenn andvat gevva.

²⁸Fasell, sawk zu eena, ‘Dess is es folk es di shtimm fumm HAH iahra Gott nett keicht hott, un es sei shtrohf nett ohgnumma hott. Di voahheit is kshtauva, un is nimmi uf iahra leftz.

²⁹Shneit dei hoah ab un shmeis see vekk, heil drovva uf di bludda hivla. Fa da HAH hott dee leit es eah zannich is mitt, falossa un si vekk kshtohsa.

³⁰Di leit funn Juda henn evil gedu fannich mei awwa, sawkt da HAH. Si henn grausami abgettah ufketzt im haus es mei Nohma drawkt un henn's unrein gmacht.

³¹Si henn en hohchah awldah gebaut es Thopheth hayst in di Valley funn Ben-Hinnom fa iahra boova un mayt fabrenna mitt feiyah. Dess is ebbes es ich si nett gebodda habb fa du, un so ebbes is miah nett im sinn kumma.

³²So gevvet acht, di zeit kumd, sawkt da HAH, vann di leit's nimmi Thopheth adda di Valley funn Ben-Hinnom haysa zayla, avvah di Valley funn Shlachtes. Leit zayla iahra dohdi fagrawva in Thopheth veil's kenn anri bletz may hott.

³³Di dohda mensha zayla ess-sach sei fa di fekkel fumm himmel un di diahra uf di eaht, un nimmand yawkt si vekk.

³⁴In di shtett funn Juda un in di shtrohsa funn Jerusalem zayl ich en end bringa zu di shayna yachta funn frayt un kshpass, un aw di fraylicha shtimma fumm hochtzich-mann un di hochtzich-fraw. Es land zayld alles fadauva vadda.’”