Read Pennsylvania German Jeremia 8 Bible Online

Jeremia 8 - Pennsylvania German bible

Jeremia 8

¹“An selli zeit,” sawkt da HAH, “zayla di gnocha funn di kaynicha un di evvahshti funn Juda, di gnocha funn di preeshtah un di brofayda un di gnocha funn di leit funn Jerusalem aus iahra grayvah gnumma vadda.

²Si zayla ausnannah kshtroit sei unnich di sunn un da moon un unnich awl di shtanna fumm himmel—dee es si leeb katt henn un gedeend henn, un dee es si nohch gloffa sinn, iahra roht kfrohkt henn un si ohgebayda henn. Si zayla nett zammah gnumma sei un fagrawva vadda, avvah zayla uf em grund leiya vi misht.

³Vo-evvah es ich si anna yawk, zayla awl selli es ivvahrich sinn funn demm evila folk, vinsha si veahra doht, leevah es noch levendich sei,” sawkt da Awlmechtich HAH.

⁴“Sawk zu eena, ‘Dess is vass da HAH sawkt: Vann ebbah anna fald, dutt eah nett viddah uf shtay? Vann ebbah letz drayt, dutt eah nett viddah zrikk gay?

⁵So favass drayya dee leit vekk unni viddah zrikk drayya? Favass dutt Jerusalem immah vekk drayya? Si henka oh zu di falshheit, un doon's nett fa zrikk kumma.

⁶Ich habb si goot abkeicht, avvah ich heah si nett sawwa vass recht is. Nimmand macht sei sach recht fa sei sinda, un sawkt, “Vass habb ich doch gedu?” Yaydah funn eena gayt sei ayknah vayk, vi en greeks-gaul fassich shpringd fa in da greek.

⁷Da stork in di luft vayst vann's zeit is fa zrikk gay. Di daddel-daub, da shvalma un da crane gayn zrikk un faddi an di recht zeit fumm yoah. Avvah mei leit doon di gebodda fumm HAH nett vissa.

⁸Vi kennet diah sawwa, “Miah henn veisheit, fa miah henn's ksetz fumm HAH?” Avvah vass eiyah shrift-geleahrah kshrivva henn is deicha vekk en leek.

⁹Eiyah mennah mitt veisheit vadda fashohmd, si zayla engshtlich sei un kfanga vadda. Si henn em HAH sei vatt nunnah gedrayt, so vass fa veisheit henn si nau?

¹⁰Fasell gebb ich iahra veivah zu anri mennah, un iahra feldah zu neiyi ayknah, veil fumm vennichshta zumm grayshta sinn si awl greedich fa uneahlich sach; fumm brofayt zumm preeshtah sinn si awl uneahlich.

¹¹Si achta mei leit es am vay du sinn, es vann's ebbes leichtes veah, si sawwa, “Fridda, fridda,” un doch hott's kenn fridda.

¹²Doon si sich shemma bei awl dee sacha du? Nay, si henn kenn shohm; iahra ksichtah vadda nett even roht. Fasell zayla si falla unnich di kfallana; si vadda nunnah gebrocht vann ich si moll shtrohf,’ so sawkt da HAH.

¹³‘Ich zayl si vekk nemma,’ sawkt da HAH, ‘es zayla kenn drauva uf di vei-shtekk sei, un kenn feiya uf di feiya-baym, iahra bleddah falla ab. Vass ich eena gevva habb, vatt vekk gnumma funn eena.’”

¹⁴Di leit sawwa, “Favass hokka miah do? Fasamlet eich! Vella nei in di eigmavvahda shtett gay so es miah datt shtauva kenna! Fa da HAH unsah Gott zayld uns umkumma lossa; eah hott uns giftich vassah gevva fa drinka, veil miah ksindicht henn geyyich een.

¹⁵Miah henn koft fa fridda, avvah's is nix goodes kumma. Miah henn koft fa kayld vadda, avvah miah sinn yusht fagelshtaht vadda.

¹⁶Di feinda iahra geil heaht ma shnaufa funn Dan. Iahra hengshta greisha, un's gans land shiddeld. Si sinn kumma's land uf fressa, un alles es drinn is, di shtatt un awl selli es drinn voona.”

¹⁷“Gukket moll,” sawkt da HAH, “ich zayl shlanga unnich eich shikka, giftichi shlanga es nett gezohmd sei kenna, si zayla eich beisa.”

¹⁸Mei hatz in miah is bedreebt, un's kann nett kayld sei.

¹⁹Heich moll, ich heah mei leit am greisha, funn en land veit ab. Is da HAH nett in Zion? Is iahra kaynich nimmi datt? Da HAH sawkt, “Favass henn si mich fazand mitt iahra gleichnisa, mitt iahra nix-nutzichi, fremdi abgettah?”

²⁰“Di eahn is fabei,” sawwa di leit, “da summah is ivvah, un miah henn kenn hilf grikt.”

²¹Mei hatz is fabrocha, veil mei leit fabrocha sinn; ich heil, un mei hatz is engshtlich.

²²Hott's nix in Gilead fa salba? Is kenn doktah datt? So favass voahra mei leit nett kayld?