Read Pennsylvania German Jeremia 9 Bible Online

Jeremia 9 - Pennsylvania German bible

Jeremia 9

¹Oh, ich vott mei kobb veah en vassah-brunna, un mei awwa en vassah-shpring funn awwa-vassah, so es ich heila kend dawk un nacht fa mei leit es doht gmacht voahra!

²Oh, ich vott ich hett en blatz in di vildahnis, en blatz vo leit bleiva ivvah-nacht, so es ich mei leit falossa kend, un funn eena vekk zeeya; fa si sinn awl aybrechah, un en drubb zvay-ksichtichi leit.

³“Si beeya iahra zunga vi en bow; iahra leeya un di unvoahret henn's land ivvah-gnumma. Si gayn funn ay evil ding zumm nekshta, avvah mich doon si nett achta.” So sawkt da HAH.

⁴“Gevvet acht veyyich eiyah nochbah un drauwet eiyah broodah nett. Veil alli broodah en fafiahrah is, un alli nochbah kshvetzah shtroit.

⁵Alli-ebbah fafiaht sei nochbah, un sawkt di voahret nett; si henn iahra zunga gland leeya sawwa, si macha sich meet am sindicha.

⁶Du voonsht unnich leit es fafiahra; deich iahra fafiahres fa'achta si mich.” So sawkt da HAH.

⁷So dess is vass da Awlmechtich HAH sawkt: “Gukket moll, ich zayl si reinicha mitt feiyah, un si ausbroviahra. Vass shunsht kann ich du, vann ich sayn vass mei leit gedu henn?

⁸Iahra zung is vi en arrow es doht macht; si shvetzt fa fafiahra. Mitt iahrem maul shvetza si freindlich zu iahra nochbah, avvah in iahra hatz setza si en fall fa een.

⁹Sett ich si nett shtrohfa fa dess?” frohkt da HAH. “Sett ich mich nett auseeva, fa so en folk vi dess?”

¹⁰Ich muss heila un veina fa di berga, un mich fayammahra veyyich em vayt-land in di vildahnis. Si sinn leah, un nimmand gayt deich si, un's fee heaht ma nett bladda. Di fekkel in di luft sinn fatt kflowwa, un di diahra sinn aw nimmi datt.

¹¹“Ich mach Jerusalem in en shtay haufa, un en blatz fa vildi hund. Ich reis di shtett funn Juda nunnah so es nimmand drinn voona kann.”

¹²Favass is es land fadauva un leah vi en vildahnis, so es nimmand deich's land gayt? Veah hott genunk veisheit fa dess fashtay? Veah voah gland beim HAH fa dess auslayya?

¹³Da HAH hott ksawt, “Es is veil si mei ksetz falossa henn es ich fannich si ksetzt habb. Si henn miah nett keicht un henn nett glaybt vi mei vatt sawkt.

¹⁴In blatz funn sell, sinn si iahra shteibahrichi hatza nohch ganga. Si sinn di abgettah fumm Baal nohch ganga, so vi iahra feddah si gland henn.”

¹⁵So, dess is vass da Awlmechtich HAH, da Gott funn Israel, sawkt: “Ich zayl dee leit macha biddah ess-sach essa un giftich vassah drinka.

¹⁶Ich zayl si ausnannah shtroiya unnich di heida, dee es si un iahra feddah nett gekend henn, un ich gay eena nohch mitt em shvatt biss ich si gans faddich gmacht habb.”

¹⁷Dess is vass da Awlmechtich HAH sawkt: “Gevvet acht, roofet di veibsleit bei es heila an di leichta, shikket fa di beshta funn eena.

¹⁸Losset si kshvind kumma, un heila ivvah uns, biss unsah awwa foll awwa-vassah sinn, un unsah awwa-dekkel nass sinn funn heila.

¹⁹Di yacht funn leit am heila vatt keaht in Zion: ‘Vi oahrich sinn miah fadauva! Vi grohs is unsah shohm! Miah henn's land falossa missa, veil si unsah heisah nunnah grissa henn.’”

²⁰Nau, diah veibsleit, heichet's vatt fumm HAH ab; machet eiyah oahra uf zumm vatt funn seim maul. Lannet eiyah mayt vi zu heila; lannet nannah en glawk-leet.

²¹Da doht is deich unsah fenshtahra rei kumma, un is in unsah kaynich-heisah kumma; da doht hott di kinnah abkshnidda funn di shtrohsa, un di yunga mennah funn di market-bletz.

²²Nau sawk, “Dess is vass da HAH sawkt: ‘Di dohdi mensha zayla uf em bodda leiya, vi misht draus im feld, vi di shayb hinnich em abshneidah, un's hott nimmand fa si zammah samla.’”

²³Dess is vass da HAH sawkt: “Loss da mann mitt veisheit nett braekka veyyich sei veisheit, adda da shteik mann veyyich sei graft, adda da reich mann veyyich sei geld.

²⁴Avvah veah braekka vill, loss een braekka veyyich demm: es eah mich fashtayt un kend, es ich da HAH binn, deah es bamhatzichkeit, eahlich richtes un gerechtichkeit uf di eaht bringd. Dee sinn di sacha es mich froh macha.” So sawkt da HAH.

²⁵“Di dawwa sinn am kumma,” sawkt da HAH, “vann ich selli shtrohfa zayl vo nett beshnidda sinn im hatz—

²⁶Egypta, Juda, Edom, di Ammoniddah, Moab un awl selli es veit ab in di vildahnis voona, un doon iahra hoah katz sheahra. Awl selli heida sinn nett beshnidda, un's gans haus funn Israel is nett beshnidda im hatz.”