Read Pennsylvania German Glawk-Leedah 3 Bible Online

Glawk-Leedah 3 - Pennsylvania German bible

Glawk-Leedah 3

¹Ich binn da mann es aylend ksenna hott, bei di shtrohf funn sei zann.

²Eah hott mich gedrivva un mich gmacht lawfa, im dunkla un nett im licht.

³Yau, eah hott sei hand geyyich mich gedrayt, ivvah un ivvah da gans dawk lang.

⁴Eah hott mei flaysh un haut ald gmacht, un hott mei gnocha fabrocha.

⁵Eah is geyyich mich kumma, un hott mich umringd mitt biddahnis un dreebsawl.

⁶Eah hott mich gmacht im dunkla voona, vi selli es shund lang doht sinn.

⁷Eah hott mich eigmavvaht so es ich nett raus kann, un hott shveahri kedda an mich gedu.

⁸Even vann ich roof un frohk fa hilf, macht eah sei oahra zu zu mei gebayt.

⁹Eah hott mei vayk zu gmavvaht mitt kakti shtay, un hott mei pawt grumm gmacht.

¹⁰Vi en beah am leiya un voahra, vi en layb am sich fashtekla,

¹¹hott eah mich ab fumm vayk kshlayft un mich farissa, un hott mich glost unni hilf.

¹²Eah hott sei bow gezowwa, un mich da zeel gmacht funn sei arrows.

¹³Eah hott in mei hatz nei kshossa, mitt di arrows funn sei arrow-sakk.

¹⁴Awl mei leit lacha ivvah mich, ich binn iahra shpott-leet da gans dawk.

¹⁵Eah hott mich kfild mitt biddahnis, un mich gmacht dreebsawl drinka.

¹⁶Eah hott mei zay fabrocha mitt shtay; eah hott mich gmacht in di esh hokka.

¹⁷Ich voah kalda funn fridda havva; ich habb fagessa vi zu fraylich sei.

¹⁸So sawk ich, “Mei hallichkeit is fatt, un so is mei hofning fumm HAH.”

¹⁹Denk droh vi aylendich un falossa es ich binn, so biddah es gall un gift.

²⁰Yoh, mei sayl denkt an dess, un ich binn innahlich bedreebt.

²¹Avvah mei hofning kumd zrikk, vann ich an dess denk:

²²Em HAH sei shtandhaftichi-leevi heaht nee nett uf, sei bamhatzichkeit hott kenn end.

²³See is nei alli meiya. Grohs is dei shtandhaftichkeit.

²⁴Mei sayl sawkt, “Da HAH is mei dayl, fasell doon ich mei hofning in een.”

²⁵Da HAH is goot zu selli es voahra uf een, zu sellah es een sucht.

²⁶Es is en goot ding fa hofning havva, un fa geduldich voahra uf em HAH sei saylichkeit.

²⁷Es is en goot ding fa en mann, es eah geduldich is in sei yungi yoahra.

²⁸Eah sett laynich hokka un shtill sei, veil da HAH's uf een glaykt hott.

²⁹Eah sett sei maul in da shtawb du, fleicht hott's alsnoch hofning.

³⁰Eah sett sich uf da bakka shlauwa lossa, un's ohnemma vann eah faniddaht vatt.

³¹Da Hah is gnaydich un drayt leit nett ayvichlich nunnah.

³²Even vann eah dreebsawl bringd, doch veist eah bamhatzichkeit, so grohs is sei shtandhaftichi-leevi.

³³Eah hott kenn blesiah in leit bedreebt macha,

³⁴bei di kfangana im land unnich sei fees fadredda,

³⁵bei en mann sei recht zrikk hayva fannich em Awlmechticha,

³⁶adda bei en mann sei sacha fadrayya in di court. Da Hah alawbt so sacha nett.

³⁷Veah kann shvetza un's kumd voah, unni es da Hah so gebodda hott?

³⁸Is es nett aus em maul fumm Alli-Haychshta es goodi sacha un evili sacha blatz nemma?

³⁹Favass sett ennichah levendichah mensh glawwa vann eah kshtrohft vatt fa sei sinda?

⁴⁰Vella unsah layves-lawf ivvah-denka un unnah-sucha, un no zrikk drayya zumm HAH.

⁴¹Vella unsah hatz un hend uf hayva zumm Gott im himmel, un sawwa,

⁴²“Miah henn ksindicht un uns kshteibaht, un du hosht uns nett fagevva.

⁴³Du hosht dich bedekt mitt deim zann, un bisht uns nohch kumma; du hosht doht gmacht unni bamhatzichkeit.

⁴⁴Du hosht dich zu gedekt mitt en volk, so es kenn gebayt deich kumma kann.

⁴⁵Du hosht uns gmacht vi drekk un misht unnich di heida.

⁴⁶Awl unsah feinda macha iahra meilah uf un shvetza geyyich uns.

⁴⁷Angsht un shrekk is ivvah uns kumma, miah sinn fafolkt un fadauva.”

⁴⁸Awwa-vassah lawft funn mei awwa, ivvah's fafolkes funn mei leit.

⁴⁹'S vassah lawft runnah di gans zeit, unni shtobba,

⁵⁰biss da HAH runnah gukt fumm himmel un's saynd.

⁵¹Vass mei awwa sayna, dutt mei sayl vay, ivvah di veibsleit funn mei shtatt.

⁵²Unni grund henn mei feinda mich kund vi en fokkel.

⁵³Si henn mich levendich in en deef loch gedu, un henn shtay an mich kshmissa;

⁵⁴'s vassah is ivvah mei kobb kumma un ich habb ksawt, “Ich binn faddich.”

⁵⁵Ich habb dei nohma ohgroofa, oh HAH, drunna im deefa loch.

⁵⁶Du hosht mei shtimm keaht sawwa, “Mach dei oahra nett zu zu meim roof fa hilf.”

⁵⁷Du bisht nayksht kumma vo ich groofa habb; du hosht ksawt, “Feich dich nett.”

⁵⁸Du hosht kshvetzt fa mich un mei sayl, oh Hah, du hosht miah mei layva zrikk gevva.

⁵⁹Oh HAH, du hosht ksenna vi si miah letz gedu henn; helf miah mei recht greeya.

⁶⁰Du hosht ksenna vi si auseeva vella, un awl di shkeems es si ufkokt henn geyyich mich.

⁶¹Oh HAH, du hosht di veeshta sacha keaht es si sawwa, un awl iahra shkeems geyyich mich—

⁶²vass mei feinda pishbahra geyyich mich da gans dawk lang.

⁶³Gukk an si! Vann si hokka adda shtayn, dann doon si mich fashpodda diveil es si singa.

⁶⁴Betzawl si zrikk vass si fadeend henn, oh HAH, fa sell vass iahra hend gedu henn.

⁶⁵Mach iahra hatz sich shteibahra, un loss dei fluch uf si kumma.

⁶⁶In deim zann gay eena nohch un butz si vekk unnich di himla fumm HAH.