Read Pennsylvania German Glawk-Leedah 5 Bible Online

Glawk-Leedah 5 - Pennsylvania German bible

Glawk-Leedah 5

¹Denk an uns, oh HAH, denk vass es gevva hott zu uns; gukk un sayn unsah shohm.

²Unsah eahbshaft is ivvah-gedrayt vadda zu fremdi, un unsah heisah zu auslendah.

³Miah sinn kinnah unni eldra, unni en daett, unsah maemma sinn vi vitt-veivah.

⁴Miah missa's vassah kawfa es miah drinka, un missa betzawla fa unsah hols.

⁵Mitt en yoch um unsah hals sinn miah gedrivva, miah sinn meet un finna kenn roo.

⁶Miah henn missa di hand naus hayva zu Egypta un Assur, so es miah genunk broht henn.

⁷Unsah feddah henn ksindicht un layva nimmi, un miah missa iahra shtrohf nemma.

⁸Gnechta roola ivvah uns, nimmand kann uns frei macha funn iahra hend.

⁹Im kfoah funn unsah layva, greeya miah unsah broht, veil di shvatt draus in di vildahnis is.

¹⁰Unsah haut is fabrend es vi in en offa, funn demm shreklicha hungah.

¹¹Veibsleit sinn fashohmd vadda in Zion, un leddichi mayt in di shtett funn Juda.

¹²Di evvahshti sinn kanka vadda, un di eldishti greeya kenn eah.

¹³Di yunga mennah missa mawla an di meel-shtay, un di boova shtolbahra unnich di gvicht funn feiyah-hols.

¹⁴Di alda mennah hokka nimmi am shtatt-doah, un di yungi leit henn ufkeaht iahra harfa shpeela.

¹⁵Di frayt in unsah hatza is fatt; unsah danses is zu dreebsawl gedrayt.

¹⁶Da krohn is funn unsah kobb kfalla; vay zu uns, veil miah ksindicht henn.

¹⁷Deich dess is unsah hatz shvach, deich dee sacha sinn unsah awwa dunkel.

¹⁸Veil da Berg Zion so en veeshtah, leahrah blatz is, dann doon di faxa drivvah shpringa.

¹⁹Du, oh HAH, roolsht fa'immah, un dei kaynich-shtool bleibt funn kshlecht zu kshlecht.

²⁰Favass dusht du uns immah fagessa? Favass dusht du uns so lang hokka lossa?

²¹Bring uns zu diah, oh HAH, so es miah zrikk gay kenna; Mach unsah dawwa nei vi als difoah.

²²Adda hosht du uns gans falossa? Zayld dei haysah zann geyyich uns nee nett shtobba!