Read Pennsylvania German Ezekiel 14 Bible Online

Ezekiel 14 - Pennsylvania German bible

Ezekiel 14

¹No sinn edlichi eldishti funn Israel zu miah kumma un henn sich fannich mich kokt,

²un's vatt fumm HAH is zu miah kumma un hott ksawt:

³“Mensha-kind, dee mennah henn abgettah ufkokt in iahra hatza un henn ungettlichi shtolbah-shtay fannich iahra ksichtah gedu. Sett ich si lossa mich ennich ebbes frohwa?

⁴So shvetz zu eena un sawk eena, ‘Dess is vass da Awlmechtich HAH sawkt: Ennich ebbah fumm haus funn Israel es abgettah ufhokt in seim hatz un es en ungettlichah shtolbah-shtay fannich sei ksicht dutt, un kumd no zumm brofayt, demm zayl ich, da HAH, selvaht andvadda so vi eah's fadeend hott mitt sei abgettah.

⁵Ich du dess fa di hatza funn di leit funn Israel zrikk greeya, dee es mich falossa henn fa iahra abgettah.’

⁶So sawk zumm haus funn Israel, ‘Dess is vass da Awlmechtich HAH sawkt: Doond boos, drayyet vekk funn eiyah abgettah; drayyet vekk funn eiyah vayya es grausam sinn zu miah.

⁷Vann en Israeliddah adda en fremdah es in Israel voond sich funn miah vekk drayt, un abgettah ufhokt in seim hatz, un en ungettlichah shtolbah-shtay fannich sei ksicht dutt, un gayt no zumm brofayt fa ebbes frohwa funn miah, dann doon ich da HAH selvaht eem andvadda.

⁸Ich setz mei ksicht geyyich sellah mann un mach es eah en vanning un en kshvetz vatt. Ich shneit een ab funn mei leit. No visset diah es ich da HAH binn.

⁹Vann da brofayt sich fafiahra lost fa en vatt broffetzeiya, dann habb ich, da HAH, een fafiaht. Un ich shtrekk mei hand geyyich een, un butz een gans vekk funn mei leit.

¹⁰Si zayla awl zvay iahra sind drawwa, da brofayt is yusht so shuldich es sellah es kumd een frohwa.

¹¹Sellah vayk lanna di leit funn Israel fa nimmi vekk lawfa funn miah, un si macha sich nimmi unrein mitt awl iahra sinda. Si zayla mei leit sei un ich zayl iahra Gott sei.’” So sawkt da Awlmechtich HAH.

¹²No is es vatt fumm HAH zu miah kumma un hott ksawt,

¹³“Mensha-kind, vann en land geyyich mich sindicht bei unglawvich sei un ich shtrekk mei hand naus digeyya un nemm iahra ess-sach vekk, shikk hungahs-noht un mach di mensha un's fee doht,

¹⁴no even vann da Noah, da Daniel un da Hiob datt veahra, dann kenda si yusht iahra aykni sayl frei macha bei iahra gerechtichkeit,” sawkt da Awlmechtich HAH.

¹⁵“Adda vann ich vildi diahra deich's land shikk un si di leit doht macha, un's vatt so kfeahlich es nimmand may deich gay kann veyyich di diahra,

¹⁶even vann selli drei mennah datt veahra, so shuah es ich layb,” sawkt da Awlmechtich HAH, “dann kenda si iahra boova un mayt nett levendich halda. Yusht si drei laynich dayda levendich deich kumma, avvah's land veah leah.

¹⁷Adda vann ich's shvatt uf sell land bring un sawk, ‘Loss es shvatt deich's land gay un loss es di mensha un diahra doht macha,’

¹⁸even vann selli drei mennah datt drinn veahra, so shuah es ich layb,” sawkt da Awlmechtich HAH, “dann kenda si iahra boova un mayt nett levendich halda. Yusht si drei laynich dayda levendich deich kumma.

¹⁹Adda vann ich peshtelens uf's land shikk, un loss mei zann sich ausleahra druff deich bloot fageesa, un mach di mensha un diahra doht,

²⁰even vann da Noah, da Daniel un da Hiob datt veahra, so shuah es ich layb,” sawkt da Awlmechtich HAH, “dann kenda si iahra boova un mayt nett levendich halda. Yusht si selvaht dayda levendich bleiva deich iahra gerechtichkeit.”

²¹Nau dess is vass da Awlmechtich HAH sawkt, “Vi feel shlimmah zayld's sei vann ich moll mei fiah shlimmi gerichta uf Jerusalem shikk—es shvatt, hungahs-noht, vildi diahra un peshtelens—un mach awl di mensha un's fee doht!

²²Avvah doch, es zayla dayl levendich bleiva, boova un mayt awl zvay zayla deich kumma. Vann si zu eich kumma un diah iahra vayya saynet un vass si doon, dann zaylet diah gedrohsht sei veyyich demm fadauves es ich uf Jerusalem kumma glost habb, un alles shunsht es ich uf di shtatt gebrocht habb.

²³Diah vaddet gedrohsht vann diah iahra vayya saynet un vass si doon. No zayla diah vissa es ich nix gedu habb unni uahsach.” So sawkt da Awlmechtich HAH.