Read Pennsylvania German Ezekiel 15 Bible Online

Ezekiel 15 - Pennsylvania German bible

Ezekiel 15

¹Es vatt fumm HAH is zu miah kumma un hott ksawt,

²“Mensha-kind, vi is es hols funna drauva-shtokk bessah es en nasht funn di baym im bush?

³Kann ma ennich ebbes macha funn sellem hols? Macht ma en zabba difunn fa sach an di vand henka?

⁴Nay, es vatt yusht gyoost fa feiyah macha. Un vann's feiyah di zvay endah fabrend hott un's fasenkt hott in di mitt, kann's no gyoost sei fa ebbes?

⁵Vann's nix veaht voah vo's gans voah, vi feel vennichah is es veaht vann's feiyah's fabrend un fasenkt hott?

⁶So dess is vass da Awlmechtich HAH sawkt, ‘Vi's hols fumm drauva-shtokk is unnich em hols funn di baym im bush, dess es ich gevva habb fa feiyah macha, so gebb ich di leit uf es in Jerusalem voona.

⁷Ich zayl mei ksicht geyyich si setza. Si sinn aus ay feiyah kumma, avvah doch zayld's feiyah si ufbrenna. Un vann ich mei ksicht moll geyyich si setz dann zaylet diah vissa es ich da HAH binn.

⁸Ich zayl's land leah macha veil si unglawvich voahra!’” So sawkt da Awlmechtich HAH.