Read Pennsylvania German Ezekiel 24 Bible Online

Ezekiel 24 - Pennsylvania German bible

Ezekiel 24

¹Im neinda yoah, im zeyyada moonet uf em zeyyada dawk, is es vatt fumm HAH zu miah kumma un hott ksawt:

²“Mensha-kind, shreib da nohma funn demm dawk anna, deah veiklich dawk, veil da kaynich funn Babylon geyyich Jerusalem kumma is fa fechta uf deah veiklich dawk.

³Sawk en gleichnis zu demm fashtokt haus, un sawk eena, ‘Dess is vass da Awlmechtich HAH sawkt: Du en kessel uf's feiyah; du een druff un leah vassah nei.

⁴Du shtikkah flaysh nei, alli goot shtikk—en shenkel un en shuldah. Fill's uf mitt di beshta gnocha.

⁵Nemm's beshta funn di drubb shohf. Heifel hols unnich da kessel; mach's vassah kocha un koch di gnocha drinn.

⁶So dess is vass da Awlmechtich HAH sawkt: Vay zu di shtatt es bloot fageest, zu sellah kessel is nau farosht, un da rosht gayt nett vekk! Nemm's flaysh raus shtikk bei shtikk; nemm's raus grawt vi's kumd.

⁷Es bloot es see fagossa hott is alsnoch in di shtatt; see hott's uf en bluddah shtay gleaht; see hott's nett uf da grund gleaht, so es da shtawb's zu dekka kann.

⁸Fa mei zann ufshtadda un see shtrohfa, habb ich iahra bloot uf da blutt shtay gleaht, so es es nett zu gedekt vatt.

⁹So dess is vass da Awlmechtich HAH sawkt: Vay zu di shtatt es bloot fageest! Ich zayl aw's hols hohch ufheifla.

¹⁰So heifel's hols uf un mach's feiyah brenna. Koch's flaysh goot, mix es mitt shpeis, un loss di gnocha fabrenna.

¹¹Du da leah kessel uf di gloot so es da kessel hays vatt un sei kubbah roht hays vatt; un so es sell vass unrein is fashmelst un sei rosht fabrend vatt.

¹²Avvah alles es broviaht vatt, shaft nett, da rosht un drekk kumd nett ab, nett even mitt em feiyah.

¹³Da rosht un drekk fumm kessel is dei shand. Ich habb broviaht dich rein macha, avvah du hosht dich nett glost sauvah gmacht sei funn dei unreinichkeit. Fasell, zaylsht du nett viddah rein gmacht sei biss mei zann sich abgekeeld hott.

¹⁴Ich da HAH habb kshvetzt. Di zeit is do, un ich zayl's du. Ich hayb nett zrikk, ich zayl nett bamhatzich sei un ich heah nett uf. So vi du glaybt un gedu hosht zaylsht du gricht vadda, sawkt da Awlmechtich HAH.’”

¹⁵No is es vatt fumm HAH zu miah kumma un hott ksawt:

¹⁶“Mensha-kind, mitt aym shtraych zayl ich selli es di frayt funn dei awwa is vekk nemma funn diah. Avvah du solsht nett glawwa, adda heila un awwa-vassah havva.

¹⁷Shnauf hatt unni yacht macha, avvah du nett veina fa di dohda. Hald dei kobb zu gedekt un hald dei shoo uf dei fees. Du solsht dei maul nett zu dekka un kenn ess-sach essa es leit diah bringa.”

¹⁸No habb ich kshvetzt zu di leit meiyets, un sellah ohvet is mei fraw kshtauva. Da neksht meiya habb ich no gedu vi ich gebodda voah.

¹⁹No henn di leit mich kfrohkt, “Zaylsht du uns nett sawwa vass dee sacha mayna fa uns es du am du bisht?”

²⁰So habb ich ksawt zu eena, “Es vatt fumm HAH is zu miah kumma un hott ksawt:

²¹Sawk em haus funn Israel, ‘Dess is vass da Awlmechtich HAH sawkt: Ich zayl mei tempel unrein macha, deah es diah so shtols sind mitt, deah es diah eiyah gansah fadrauwa druff setzet, un di frayt funn eiyah awwa is. Un di boova un mayt es diah zrikk lossa hend missa, zayla umkumma mitt em shvatt.

²²No zaylet diah du vi ich gedu habb. Diah zaylet eiyah meilah nett zu dekka un kenn ess-sach essa es leit gevva zu selli es veina fa iahra dohdi.

²³Diah haldet eiyah kebb zu gedekt un eiyah shoo uf eiyah fees. Diah zaylet nett veina un heila, avvah diah zaylet shloh ufdadda deich eiyah sinda un zaylet yammahra unnich nannah.

²⁴Da Ezekiel is en zaycha zu eich. Diah zaylet du grawt vi eah gedu hott. Vann dess moll blatz nemd, dann visset diah es ich da Awlmechtich HAH binn.’

²⁵Un du, mensha-kind, uf em dawk es ich iahra shteikah tempel vekk nemm, deah es si so shtols sinn mitt, deah es iahra gansah fadrauwa is un di frayt funn iahra awwa is—nemm ich aw iahra boova un mayt vekk.

²⁶Uf sellah dawk kumd aynah zu diah es nett kfanga voah in Judea un sawkt diah vass blatz gnumma hott datt.

²⁷An selli zeit vatt dei maul uf gmacht, un du solsht shvetza zu eem. No zaylsht du nimmi shtill sei. Du zaylsht en zaycha sei zu eena un si zayla vissa es ich da HAH binn.”