Read Pennsylvania German Ezekiel 25 Bible Online

Ezekiel 25 - Pennsylvania German bible

Ezekiel 25

¹Es vatt fumm HAH is zu miah kumma un hott ksawt:

²“Mensha-kind, setz dei ksicht geyyich di Ammoniddah un broffetzei geyyich si.

³Sawk zu eena, ‘Heichet's vatt fumm Awlmechticha HAH. Dess is vass da Awlmechtich HAH sawkt: Veil diah “Aha!” ksawt hend ivvah mei tempel vo eah unrein gmacht voah, un ivvah's land Israel vo's fadauva vadda is, un ivvah di leit funn Juda vo si vekk gnumma voahra,

⁴dann loss ich di leit funn di East eich ivvah-nemma. Si zayla rei kumma un iahra tents ufhokka unnich eich; si essa eiyah frucht un drinka eiyah millich.

⁵Ich zayl di shtatt Rabba in en vayt-feld macha fa kamayla, un's land Ammon en blatz macha vo shohf roowa. No zaylet diah vissa es ich da HAH binn.

⁶Fa dess is vass da Awlmechtich HAH sawkt: Veil diah eiyah hend zammah kshlauwa hend un eiyah fees kshtambt hend un fraylich voahret ivvah Israel mitt en hass in eiyah hatz,

⁷dann shtrekk ich mei hand naus geyyich eich un gebb eich zu di anra lendah es vi kshtohla sach. Ich shneit eich ab funn anri leit un mach es diah goah nimmi sind unnich di lendah. Ich zayl eich folshtendich zu nix macha. No zaylet diah vissa es ich da HAH binn.’”

⁸“Dess is vass da Awlmechtich HAH sawkt: ‘Veil Moab un Seir ksawt henn, “Gukket moll, es haus funn Juda is grawt vi awl di heida,”

⁹dann loss ich di feinda selli shtett vekk butza an di lein nohch funn Moab. Sell sinn di shtett, Beth-Jesimoth, Baal-Meon un Kiriathaim es si so shtols sinn mitt.

¹⁰Ich zayl Moab un di Ammoniddah ivvah-gevva zu di leit funn di East so es di Ammoniddah gans fagessa vadda unnich di lendah.

¹¹Ich zayl Moab shtrohfa, no zayla si vissa es ich da HAH binn.’”

¹²“Dess is vass da Awlmechtich HAH sawkt: ‘Veil Edom's ausgnumma hott uf's haus funn Juda un sich oahrich shuldich gmacht hott,

¹³dann dess is vass da Awlmechtich HAH sawkt: Ich zayl mei hand naus shtrekka geyyich Edom un iahra mennah un diahra doht macha. Ich faveesht's land un funn Theman biss an Dedan zayla si umkumma deich's shvatt.

¹⁴Ich zayl auseeva ivvah's land funn Edom deich di hand funn mei leit Israel. Si zayla du zu Edom vass mei veeshtah zann foddaht, un si zayla vissa es ich ausgeebt habb, sawkt da Awlmechtich HAH.’”

¹⁵“Dess is vass da Awlmechtich HAH sawkt, ‘Veil di Philishtah ausgeebt henn un's ausgnumma henn mitt ayvichah hass in iahra hatza fa Juda folshtendich vekk butza,

¹⁶dann dess is vass da Awlmechtich HAH sawkt: Ich zayl mei hand naus shtrekka geyyich di Philishtah, zayl di Krethiddah leit abshneida un di ivvahricha leit doht macha es am say nohch voona.

¹⁷Ich zayl veesht auseeva uf si un si shtrohfa in meim zann. No zayla si vissa es ich da HAH binn vann ich moll ausgeebt habb.’”