Read Pennsylvania German Ezekiel 30 Bible Online

Ezekiel 30 - Pennsylvania German bible

Ezekiel 30

¹Es vatt fumm HAH is zu miah kumma un hott ksawt:

²“Mensha-kind, broffetzei un sawk, ‘Dess is vass da Awlmechtich HAH sawkt: Heilet, un sawwet, “Vay, fa sellah dawk!”

³Sellah dawk is nayksht, yau, da dawk fumm HAH is nayksht, en dawk funn volka, en zeit funn druvvel fa di heida.

⁴En shvatt zayld geyyich Egypta kumma; un angsht kumd ivvah Kush vann di kshlauwana falla in Egypta; iahra feel leit vadda vekk gedrawwa un alles vatt zammah grissa.

⁵Kush, Put, Lydia, gans Arabia, Libya un di leit es en bund gmacht henn mitt-nannah zayla falla beim shvatt mitt Egypta.

⁶Dess is vass da HAH sawkt: Awl di lendah mitt Egypta zayla falla, un iahra shtolsi graft lost si nunnah. Funn Migdol biss an Syene zayla si falla beim shvatt. So sawkt da Awlmechtich HAH.

⁷Egypta zayld en leah land sei in di mitt funn leahri lendah; iahra shtett zayla leah sei, unnich anri leahri shtett.

⁸No zayla si vissa es ich da HAH binn, vann ich Egypta ohshtekk mitt feiyah, un awl selli es iahra helfa zu nix gebrocht vadda.

⁹Uf sellah dawk zayld vatt naus kshikt vadda funn miah in shiffah fa's unbekimmaht land Kush fagelshtahra. Angsht zayld ivvah si kumma uf da dawk vann Egypta fald, un sellah dawk zayld geviss kumma.

¹⁰Dess is vass da Awlmechtich HAH sawkt: Ich zayl en end macha funn awl di leit in Egypta bei di hand fumm Kaynich Nebukadnezar funn Babylon.

¹¹Eah un sei greeks-leit—di alli-veeshta unnich di heida— vadda rei gebrocht fa's land fadauva. Si zeeya iahra shvadda geyyich Egypta, un's land vatt kfild mitt di dohda.

¹²Ich zayl da Nile Revvah ufdrikla, un's land fakawfa zu gottlohsi leit; ich zayl's land un alles es drinn is faveeshta bei di hend funn fremdi. Ich da HAH habb kshvetzt.

¹³Dess is vass da Awlmechtich HAH sawkt: Ich zayl di abgettah fabrecha un en end macha funn di gleichnisa in Noph. Es zayld kenn feddahshtah in Egypta may sei, un ich bring furcht ivvah's gans land.

¹⁴Ich zayl Pathros leah macha, di shtatt Zoan ohshtekka mitt feiyah un di shtatt No shtrohfa

¹⁵Ich zayl mei zann ausleahra uf di shtatt, Sin, dee es di graft funn Egypta is, un shneit di feel leit funn No ab.

¹⁶Ich shtekk en feiyah oh in Egypta; di shtatt, Sin, zayld shtravla mitt shmatza. No vatt funn-nannah grissa un Noph hott angsht alli dawk.

¹⁷Di yunga mennah funn di shtett On un Bubastus zayla falla bei em shvatt, un di ivvahricha leit vadda kfanga.

¹⁸An Thachpanhes zayld da dawk dunkel sei vann ich's yoch funn Egypta fabrech; no kumd iahra shtolsi graft zu en end. En volk dekt see zu, un iahra dochtahra vadda kfanga un vekk gnumma.

¹⁹So doon ich mei shtrohf uf Egypta un si zayla vissa es ich da HAH binn.’”

²⁰Im elfta yoah, im eahshta moonet uf em sivvada dawk is es vatt fumm HAH zu miah kumma un hott ksawt:

²¹“Mensha-kind, ich habb em Pharao, da kaynich funn Egypta, sei oahm fabrocha. Sei oahm voah nett gvikkeld fa hayla, so es ah shteik genunk is fa en shvatt hayva.

²²So dess is vass da Awlmechtich HAH sawkt: Ich binn geyyich da Pharao, da kaynich funn Egypta. Ich zayl sei zvay eahm fabrecha, sei goodah oahm un aw sellah es fabrocha is, un ich mach's shvatt aus sei hand falla.

²³Ich zayl di Egypta ausnannah shtroiya unnich di heida un si in di anra lendah yawwa.

²⁴Ich mach di eahm fumm kaynich funn Babylon shteik un du mei shvatt in sei hand, avvah ich fabrech em Pharao sei eahm, un eah zayld yammahra fannich eem vi en mann es veesht vay gedu is.

²⁵Ich mach di eahm fumm kaynich funn Babylon shteik avvah di eahm fumm Pharao falla lummahrich nunnah. No vissa si es ich da HAH binn, vann ich moll mei shvatt im kaynich funn Babylon sei hand du, un eah's naus shtrekt geyyich Egypta.

²⁶Ich zayl di Egyptah ausnannah shtroiya unnich di heida un si in di anra lendah yawwa. No zayla si vissa es ich da HAH binn.”