Read Pennsylvania German Ezekiel 31 Bible Online

Ezekiel 31 - Pennsylvania German bible

Ezekiel 31

¹Im elfta yoah, im dridda moonet un uf em eahshta dawk, is es vatt fumm HAH zu miah kumma, un hott ksawt:

²“Mensha-kind, sawk zumm Pharao, da kaynich funn Egypta un sei leit: ‘Mitt vemm kansht du faglicha sei ditzu in dei hallichkeit?

³Denk an Assyria, es als voah vi en cedar-bohm in Lebanon, mitt shayni nesht es shadda gmacht henn im bush; eah voah oahrich hohch, un hott nuff glangd in di volka.

⁴Vassah hott een gmacht vaxa, mitt deef vassah is eah hohch gvaxa; vassah is fabei gloffa, gans um sei vatzla rumm un dess is naus gloffa zu awl di baym im feld.

⁵So voah eah haychah es awl di baym im feld; sei nesht sinn dikk un lang vadda, un sinn ausnannah gvaxa veil feel vassah datt voah.

⁶Awl di fekkel in di luft, henn neshtah gebaut in sei nesht; awl di diahra im feld henn yungi katt in seim shadda, un in seim shadda henn di leit in awl di lendah gvoond.

⁷Eah voah shay in sei grohsi haych, un mitt awl sei langi nesht, veil sei vatzla nunnah glangd henn vo feel vassah voah.

⁸Di cedar-baym im goahra funn Gott voahra nett so grohs, di pine-baym iahra nesht voahra nett so lang, un di keshta-baym iahra nesht voahra nett so dikk. Kenn bohm im goahra funn Gott voah so shay.

⁹Ich habb deah bohm shay gmacht mitt feel shayni nesht. Awl di baym in Eden henn vella sei vi eah im goahra funn Gott.

¹⁰So dess is vass da Awlmechtich HAH sawkt: Veil eah so hohch voah, un sich nuff in di volka glangd hott, un sei hatz shtols voah ivvah sei haych,

¹¹dann habb ich een ivvah-gedrayt in di hand fumm mechticha funn di heida. Eah gebt eem vass eah fadeend hott mitt sei gottlohsi vayya. Ich habb een vekk kshtohsa,

¹²un di unfashtendishta funn di heida-lendah henn een umgmacht un en leiya glost. Sei fabrochani nesht leiya uf di berga un in di deicha fumm land. Awl di leit funn di eaht sinn unnich seim shadda raus ganga un henn een datt leiya glost.

¹³Awl di fekkel in di luft hokka sich uf deah kfalla bohm, un awl di diahra fumm feld layya sich zvishich sei nesht.

¹⁴Dess is so es kenn anri baym am vassah nohch sich so hohch uf hayva es iahra nesht nuff an di volka langa, adda es selli es feel vassah henn so hohch vadda sella. Fa si missa awl ivvah-gevva sei zumm doht, zu di veld funn dohdi mensha, dee es im grawb sinn.

¹⁵Dess is vass da Awlmechtich HAH sawkt: Uf em dawk vo da bohm nunnah in's grawb gebrocht voah, habb ich di deefa vassahra gmacht heila fa een, un habb di revvahra un glenni vassahra zrikk kohva un zu gedekt. Veil da bohm umkumma is, habb ich's dunkel gmacht in Lebanon un awl di baym im bush sinn fadatt.

¹⁶Ich habb di heida-leit gmacht ziddahra vo si een keaht henn falla an di zeit vo ich een nunnah zu di dohda in's grawb kshmissa habb. Awl di baym funn Eden, awl di beshta baym funn Lebanon, awl selli es vassah drinka, vadda gedrohsht in di veld funn dohdi mensha.

¹⁷Awl selli es im bohm sei shadda gvoond henn, awl di lendah es eem kolfa katt henn, voahra doht gmacht mitt em shvatt un sinn mitt eem nunnah in's grawb ganga.

¹⁸Mitt vels funn di baym in Eden kansht du faglicha sei in dei glitz un hallichkeit? Doch, du zaylsht aw nunnah gebrocht sei mitt di baym funn Eden drunna unnich di eaht. Du zaylsht datt leiya mitt di unbeshniddana, unnich selli es doht gmacht voahra mitt em shvatt. So soll's gay mitt em Pharao un sei leit, sawkt da Awlmechtich HAH.’”