Read Pennsylvania German Ezekiel 35 Bible Online

Ezekiel 35 - Pennsylvania German bible

Ezekiel 35

¹Es vatt fumm HAH is zu miah kumma un hott ksawt:

²“Mensha-kind, dray dei ksicht geyyich da Berg Seir un broffetzei digeyya,

³un sawk: ‘Dess is vass da Awlmechtich HAH sawkt: Ich binn geyyich dich, Berg Seir, un ich zayl mei hand naus shtrekka geyyich dich un dich leah un veesht macha.

⁴Ich zayl dei shtett faveesht macha un du zaylsht leah sei. No zaylsht du vissa es ich da HAH binn.

⁵Veil diah ayvichi feinda sind zu di Kinnah-Israel, un si ivvah-gedrayt hend zumm shvatt vo's eena shlecht ganga is an di zeit funn iahra letshtah shtrohf,

⁶dann, so shuah es ich layb, sawkt da Awlmechtich HAH, zayl ich dich ivvah-drayya fa bloot, un bloot zayld diah nohch kumma. Veil du glusht hosht fa bloot fageesa, dann soll bloot-fageeses diah nohch kumma.

⁷Ich zayl Berg Seir leah un veesht macha, un awl selli abshneida es nei un raus gayn.

⁸Ich fill dei berga mitt selli es doht gmacht sinn; selli es doht gmacht sinn mitt em shvatt zayla nunnah falla in di hivla, di deicha un di gracha.

⁹Ich mach dich fa'immah leah un nimmand zayld in dei shtett voona. No zaylet diah vissa es ich da HAH binn.

¹⁰Veil du ksawt hosht, “Di zvay lendah, Israel un Juda, zayla unsah sei, un miah nemma si ivvah,”—even vann da HAH datt voah—

¹¹fasell, so shuah es ich layb, sawkt da Awlmechtich HAH, zayl ich du zu diah mitt zann un hass vi du gedu hosht zu eena in deim hass, un ich mach mich bekand zu eena vann ich dich moll kshtrohft habb.

¹²No zaylsht du vissa es ich, da HAH, awl di veeshta sacha keaht habb es du ksawt hosht geyyich di berga funn Israel. Du hosht ksawt, “Si sinn faveesht un sinn zu uns gevva fa si fressa.”

¹³Diah hend eich uf gebraekt geyyich mich un kshvetzt geyyich mich, un ich habb's keaht.

¹⁴Dess is vass da Awlmechtich HAH sawkt: Ich zayl dich faveeshta un leah macha, un di gans eaht zayld sich froiya.

¹⁵Veil du dich kfroit hosht vo di eahbshaft fumm haus funn Israel faveesht vadda is, dann zayl ich aw so du zu diah. Du zaylsht faveesht un leah sei, Berg Seir, du un gans Edom. No zayla si vissa es ich da HAH binn.’”