Read Pennsylvania German Ezekiel 47 Bible Online

Ezekiel 47 - Pennsylvania German bible

Ezekiel 47

¹No hott eah mich zrikk gebrocht an's doah fumm tempel, un gukk moll, vassah voah am unnich di shvell raus lawfa geyyich di east. (Es feddahsht end fumm tempel voah geyyich di east.) Un's vassah voah aw am unnich di saut seit fumm tempel raus lawfa, sauda fumm awldah fabei.

²No hott eah mich raus gebrocht deich's natt doah, un hott mich um's ausahsht doah rumm kfiaht es geyyich di east gukt. Un's vassah voah am aus di saut seit kumma.

³Da mann is no geyyich di east ganga mitt en lein fa messa in sei hand. Eah hott fuftzay hunnaht foos abgmessa. No hott eah mich deich's vassah kfiaht, un's vassah is nuff an mei enkels kumma.

⁴Eah hott viddah fuftzay hunnaht foos abgmessa, hott mich deich's vassah kfiaht un's is ruff an mei gnee kumma. No hott eah viddah 1,500 foos abgmessa, hott mich deich's vassah kfiaht un's is ruff an mei hifta kumma.

⁵Eah hott viddah fuftzay hunnaht foos abgmessa un's vassah voah nau en revvah es ich nett deich gay habb kenna veil's vassah zu deef voah. Es voah deef genunk fa drinn shvimma un nimmand hott deich gay kenna.

⁶Eah hott no ksawt zu miah, “Mensha-kind, hosht du dess ksenna?” No hott eah mich zrikk an di revvah-benk kfiaht.

⁷Vi ich zrikk kumma binn, datt fashtaundlich voahra feel baym uf yaydah revvah-benk.

⁸Eah hott ksawt zu miah, “Dess vassah lawft geyyich di east, un gayt nunnah deich di vildahnis un no in da Doht Say. Vi's vassah in da say gayt, dann vatt's vassah im say frish.

⁹Vo-evvah es da revvah anna lawft, datt zayla feel diahra sei. Es zayla feel fish datt sei, fa vo dess vassah anna lawft dann vatt's sals vassah frish. Vo deah revvah anna lawft zayld alles levendich sei.

¹⁰Fishah zayla am revvah nohch shtay. Funn Engedi biss an En-Eglaim zayla bletz sei fa fish-nets ausnannah shpanna. Es zayla alli sadda fish sei, so vi im Grohsa Say.

¹¹Avvah's vassah in di niddahra bletz un shvambs vatt nett frish gmacht, selli bletz bleiva salsich.

¹²Alli-sadda frucht baym zayla vaxa uf yaydah seit fumm revvah. Iahra bleddah doon nett favelka un si henn immah frucht. Si greeya neiyi frucht alli moonet veil's vassah fumm tempel zu eena lawft. Iahra frucht is fa ess-sach un iahra bleddah fa hayla.”

¹³Dess is vass da Awlmechtich HAH sawkt: “Dess sinn di leins es diah's land fadayla sellet dibei fa di eahbshaft funn di zvelf shtamma funn Israel. Da Joseph soll zvay dayla havva.

¹⁴Diah sellet's land gleicha fadayla unnich eich. Ich habb kshvoahra fa's zu eiyah foah-feddah gevva, un dess land soll zu eich falla fa en eahbshaft.

¹⁵Dess sinn di leins es es land nohch gay soll: Uf di natt seit soll di lein shteahra am Grohsa Say un nivvah geyyich Hethlon gay, un no on fabei Lebo-Hamath biss an Zedad.

¹⁶No gayt di lein an Berotha un Sibraim fabei (dee zvay bletz sinn an di lein zvishich Damascus un Hamath) un gayt so veit es zu Hazar-Thiehon. Dess is on di lein funn Hauran.

¹⁷So di lein gayt fumm say zu Hazar-Enon an di lein nohch zvishich Damascus un Hamath in di natt. Dess soll di natt seit sei.

¹⁸Uf di east seit soll di lein zvishich Hauran un Damascus gay, un soll am Jordan Revvah nohch gay zvishich Gilead un Israel nunnah am east say fabei biss an Thamar. Dess soll di east seit sei.

¹⁹Uf di saut seit gayt di lein funn Thamar so veit es di vassahra funn Meribah an Kades, un gayt no an di Egypta Grikk nohch biss an da Grohs Say. Dess soll di saut seit sei.

²⁰Uf di west seit soll da Grohs Say di lein sei biss nuff ayva mitt Lebo-Hamath. Dess soll di west seit sei.

²¹Diah sellet's land fadayla unnich eich selvaht bei di shtamma funn Israel.

²²Diah sellet's fadayla bei's lohs zeeya fa en eahbshaft fa eich, un fa di fremda es unnich eich voona un es kinnah henn unnich eich. Si sella sei zu eich es vi selli es geboahra sinn im land zu di Kinnah-Israel. Si sella en eahbshaft greeya unnich eich vi di shtamma funn Israel.

²³In selli shtamm es di fremda drinn voona, datt sellet diah iahra eahbshaft gevva zu eena,” sawkt da Awlmechtich HAH.