Read Pennsylvania German Hosea 12 Bible Online

Hosea 12 - Pennsylvania German bible

Hosea 12

¹Da Ephraim feedaht sich uf em vind, alli dawk gayt eah em east vind nohch, un macht may leeya un fadauves mitt gvald. Eah macht en bund mitt em land Assur, un shikt ayl zu Egypta.

²Da HAH hott en shuld zu bringa geyyich Juda; eah zayld da Jakob shtrohfa fa sei vayya, eah zayld een zrikk betzawla fa vass eah dutt.

³Im muddahs-leib hott eah hohld gnumma an sei broodah sei feahshta; un vo eah gvaxa voah, hott eah kshtreit mitt Gott.

⁴Eah hott kshtreit mitt em engel un is een ivvah-kumma; eah hott keild un kfrohkt fa en sayya. Eah hott Gott kfunna an Beth-El, un datt hott eah kshvetzt mitt eem.

⁵Sell voah da HAH, da Awlmechtich Gott, sei nohma is Da HAH!

⁶So nau, kumm zrikk zu dei Gott; hayb fesht zu bamhatzichkeit un leit iahra recht, un setz dei hofning immah uf dei Gott.

⁷Di leit sinn vi fakawfah mitt falshi gvichtah in iahra hend, si gleicha uneahlich sei.

⁸Da Ephraim braekt, “Ich binn reich, ich habb feel geld; mitt awl mei geld kann nimmand mich pshuldicha es ich ksindicht habb.”

⁹“Avvah ich binn da HAH dei Gott, deah es dich aus Egypta gebrocht hott; ich mach dich viddah in tents voona, vi in di zeit funn di fesht-dawwa.

¹⁰Ich habb kshvetzt deich di brofayda; ich habb eena feel visions gevva, un habb fagleichnisa gevva deich si.”

¹¹Is abgettahrei in Gilead? So kumma si zu nix. Si opfahra oxa in Gilgal, so vadda iahra awldahra vi shtay-heifa in en geblookt feld.

¹²Da Jakob hott fatt shpringa missa in's land Syria; da Israel hott missa shaffa fa sei fraw greeya, un fa betzawla fa see, hott eah missa shohf heeda.

¹³Deich en brofayt hott da HAH Israel aus Egypta gebrocht, un deich en brofayt hott eah acht gevva uf een.

¹⁴Avvah da Ephraim hott een biddahlich fazand, so lost sei HAH sei bloot-shuld uf een, un betzawld een zrikk fa da shohm es eah uf een gebrocht hott.