Read Pennsylvania German Hosea 6 Bible Online

Hosea 6 - Pennsylvania German bible

Hosea 6

¹“Kummet, vella zrikk zumm HAH gay. Eah hott uns in shtikkah grissa, avvah eah zayld uns hayla; eah hott uns vay gedu, avvah eah bind's viddah zu.

²Noch zvay dawk macht eah uns levendich, un uf em dridda dawk viddah uf shtay, so es miah fannich eem layva kenna.

³Vella fleisich sei un da HAH bekenna; so shuah es di sunn ufkumd zayld eah sich veisa; eah kumd zu uns vi da vindah reyyah, un vi da free-yoah reyyah es di eaht vessaht.”

⁴“Vass soll ich du mitt diah, Ephraim? Vass soll ich du mitt diah, Juda? Eiyah leevi is vi da meiya-nevvel, vi da meiya-dau es fagayt.

⁵Fasell habb ich eich fahakt mitt mei brofayda, ich habb eich umgebrocht mitt di vadda funn mei maul; mei gericht is uf eich kumma vi licht.

⁶Fa ich gukk fa bamhatzichkeit, nett fa opfahra, un es leit Gott bekenna, leevah es brand-opfahra.

⁷Si henn's bund ivvah-gedredda vi mennah, un so vi datt, henn si geyyich mich kshaft.

⁸Gilead is en shtatt foll ivvah-dreddah, un foll bloodichi kshpuahra.

⁹Vi rawvah am voahra, sinn di preeshtah; si maddahra leit uf em vayk noch Sichem, un doon shandlichi sacha.

¹⁰Ich habb grauslichi sacha ksenna, im haus funn Israel. Ephraim dreibt huahrahrei un Israel is unrein.

¹¹Un aw fa dich, Juda, is en eahn ausgevva, vann ich moll mei leit frei mach.”