Read Pennsylvania German Hosea 8 Bible Online

Hosea 8 - Pennsylvania German bible

Hosea 8

¹“Doond's blohs-hann zu eiyah leftz! Da feind kumd ivvah's haus fumm HAH vi en awdlah, veil si mei bund gebrocha henn, un sich geyyich mei ksetz kshteld henn.

²Israel rooft naus zu miah, ‘Du bisht mei Gott, miah in Israel kenna dich!’

³Avvah Israel hott nunnah gedrayt vass goot is; da feind zayld eem nohch kumma.

⁴Di leit henn kaynicha gmacht unni mich, si henn evvahshti eiksetzt unni mich frohwa. Mitt iahra silvah un gold macha si sich abgettah, un shneida sich selvaht ab.

⁵Shmeis dei abgott-kalb naus, oh Samaria! Mei zann brend geyyich si. Vi lang zayld's ummeeklich sei es si rein vadda?

⁶Dess kalb is aus Israel kumma, en shaff-mann hott's gmacht, es is nett Gott. So zayld dess kalb funn Samaria in shtikkah fabrocha sei.

⁷Si sayya da vind un eahnda en vind-veahvel. Iahra frucht im feld grikt kenn kebb, un's macht kenn mayl. Un vann's frucht gevva dayt, dann dayda di fremda's essa.

⁸Israel is uf kshlukt bei di heida, see vatt rumm gedrawwa bei eena, vi en shtikk ksha es nimmand vill.

⁹Si sinn nuff an Assur ganga vi en vildah aysel am laynich rumm lawfa. Ephraim hott sich fakawft fa di leevi es kumd funn huahrahrei.

¹⁰Even vann si sich fakawft henn unnich di heida, doch zayl ich si nau zammah samla. No zayla si ohfanga zu nix gay, unnich di lasht es da mechtich kaynich uf si dutt.

¹¹Ephraim hott sich feel awldahra gmacht fa sind-opfahra, avvah si sinn awldahra vadda fa sindicha.

¹²Ich habb eena feel gebodda kshrivva funn meim ksetz, avvah si henn si gacht vi ebbes fremdes.

¹³Si macha feel opfahra zu miah un essa's flaysh, avvah si sinn em HAH nett kfellich. Nau zayld eah an iahra ungettlichkeit denka, un si shtrohfa fa iahra sinda; si zayla viddah zrikk zu Egypta gay.

¹⁴Israel hott fagessa veah een gmacht hott, un hott kaynich-heisah gebaut; un Juda hott feel eigmavvahdi shtett gmacht. Avvah ich zayl feiyah uf iahra shtett shikka, so es iahra grohsi heisah fabrenna.”