Read Pennsylvania German Joel 1 Bible Online

Joel 1 - Pennsylvania German bible

Joel 1

¹Es vatt fumm HAH es zumm Pethuel sei boo da Joel kumma is.

²Heichet dess, diah eldishti; heichet, awl diah es im land voona. Hott selayva ennich ebbes vi dess blatz gnumma in eiyah zeit, adda in di zeit funn eiyah foah-feddah?

³Sawwet's zu eiyah kinnah, un losset eiyah kinnah's sawwa zu iahra kinnah, un iahra kinnah zu iahra nohch-kummashaft.

⁴Vass di yunga hoi-shrekka ivvahrich glost henn, henn di shvoahm hoi-shrekka kfressa; vass di shvoahm hoi-shrekka ivvahrich glost henn, henn di grohsa hoi-shrekka kfressa; vass di grohsa hoi-shrekka ivvahrich glost henn, henn di ivvahricha hoi-shrekka kfressa.

⁵Vekket uf, diah siffah, un veinet, heilet, awl diah es vei drinket. Heilet veil da sees vei vekk gnumma is funn eiyah maul.

⁶En folk is ruff ivvah mei land kumma, en mechtich folk es nett gezayld sei kann; es hott di zay funn en layb, di fang-zay funn en muddah-layb.

⁷Es hott mei vei-shtekk fadauva, un mei feiya-baym fafressa. Es hott iahra rinna abgrissa un si vekk kshmissa, so es iahra nesht gans veis sinn.

⁸Heilet vi en leddich maydel in sekk-glaydah, es heild ivvah da doht fumm mann es see gezayld hott heiyahra.

⁹Shpeis-opfahra un drink-opfahra sinn abkshnidda fumm haus fumm HAH. Di preeshtah sinn am heila, selli es em HAH sei deenah sinn.

¹⁰Es feld is faveesht, da grund is ufgedrikkeld. Es frucht is fadauva, da vei is fadrikkeld un's is kenn ayl.

¹¹Seind bedreebt, diah bavvah, heilet, diah es vei-goahra hend; veinet fa da vaytza un da geahsht, veil di eahnd im feld fadauva is.

¹²Da vei-shtokk is ufgedrikkeld un da feiya-bohm favelkt; da grannat-abbel-bohm, da palma-bohm un da abbel-bohm— awl di baym im feld sinn ufgedrikkeld. Di frayt fumm mensh is zu dreebsawl gedrayt.

¹³Doond sekk-glaydah oh, diah preeshtah, heilet un veinet, diah deenah fumm awldah! Kummet, leiyet di gans nacht in sekk-glaydah, diah es deenet fannich meim Gott, fa di shpeis-opfahra un drink-opfahra vadda zrikk kohva fumm haus funn eiyah Gott.

¹⁴Gevvet en heilichah fasht-dawk aus, roofet en heilichi fasamling zammah. Fasamlet di eldishti, un alli-ebbah es im land voond. Roofet si an's haus funn eiyah Gott, un roofet da HAH oh.

¹⁵Vay zu uns fa sellah dawk! Fa da dawk fumm HAH is nayksht; da dawk vann da Awlmechtich fadeahvung bringd.

¹⁶Voah nett's ess-sach vekk gnumma fannich unsah awwa, un di frayt un fraylichkeit fumm haus funn unsah Gott?

¹⁷Da sohma drikkeld uf unnich di sholla, di shtoah-heisah shtayn fadauva. Di sheiyahra sinn zammah kfalla, veil's kenn frucht may gebt.

¹⁸Es fee is am bladda! Di kee lawfa draus rumm veil si kenn vayt henn; even di shohf sinn am leida.

¹⁹Oh HAH, ich roof zu diah; feiyah hott di vayt-feldah fabrend, un di flamm hott di baym im feld fabrend.

²⁰Di vilda diahra sinn am greisha zu diah; di vassah-grikka sinn ufgedrikkeld, un's feiyah hott awl's graws fabrend.