Read Pennsylvania German Amos 6 Bible Online

Amos 6 - Pennsylvania German bible

Amos 6

¹Vay zu eich es unbekimmaht sinn in Zion, un zu selli es sich falossa uf da Berg Samaria, diah evvahshti mennah funn demm evvahsht land, es di Kinnah-Israel ditzu kumma!

²Gaynd nivvah in di shtatt Kalne un gukket, un funn datt gaynd in di grohs shtatt Hamath, no gaynd nunnah in di Philishtah shtatt Gath. Sinn si bessah ab es dee zvay kaynich-reicha? Is iahra land graysah es eiyahs?

³Diah doond sellah evil dawk ab, avvah vass diah doond, bringd sellah shreklich dawk yusht naychah.

⁴Diah leiyet in beddah es ivvah-glaykt sinn mitt ivory, un shtrekket eich aus uf feini coucha. Diah esset di beshta lemmah un di fedda kelvah.

⁵Diah shpeelet uf di harfa un shreivet leedah vi da Dawfit.

⁶Diah drinket vei aus bowls, un salbet eich mitt em beshta ayl, avvah diah bekimmahret eich nett es em Joseph sei nohch-kummashaft falla zayld.

⁷Fasell zaylet diah di eahshta sei es kfanga vaddet un vekk kfiaht, un eiyah grohsi essa un rumm lumbes kumd zu en end.

⁸Gott da HAH hott kshvoahra bei sich selvaht—da Awlmechtich Gott, da HAH, sawkt: “Ich hass di hohchmoot fumm Jakob, un sei grohsi heisah aykla miah. Ich gebb di shtatt ivvah un alles es drinn is.”

⁹Vann zeyya mennah ivvahrich sinn in en haus, dann zayla si shtauva.

¹⁰Vann ayns funn di dohda iahra freindshaft kumd fa si aus em haus drawwa un fabrenna, un eah frohkt ebbah es fashtekkeld is datt, “Is ennich ebbah bei diah?” Un eah sawkt, “Nay,” no sawkt eah, “Sei shtill! Miah daufa nett even em HAH sei nohma sawwa.”

¹¹Fa da HAH hott en gebott gevva, un's grohs haus vatt in shtikkah fabrocha, un's glay haus in glenni shtikkah.

¹²Kenna geil shpringa uf felsa? Kann ma datt bloowa mitt oxa? Avvah diah hend leit iahra recht fadrayt zu gift, un di frucht funn gerechtichkeit zu biddahri greidah.

¹³Diah froiyet eich veil diah di shtatt Lo-Debar ivvah-gnumma hend, un sawwet, “Henn miah nett selvaht di shtatt Karnaim ivvah-gnumma?”

¹⁴Avvah da HAH, da Awlmechtich Gott, sawkt, “Ich zayl en folk ufshtay macha geyyich eich, diah haus funn Israel, es eich nunnah drett da gans vayk funn's deich es in Hamath gayt biss an's Deich funn Arabah.”