Read Pennsylvania German Amos 8 Bible Online

Amos 8 - Pennsylvania German bible

Amos 8

¹Da Awlmechtich HAH hott miah en sach gvissa, un datt hott en koahb foll zeidich frucht kshtanna.

²“Vass saynsht du, Amos?” hott eah kfrohkt. “En koahb foll zeidich frucht,” habb ich ksawt. No hott da HAH ksawt zu miah, “Es end is do fa mei leit Israel; ich hayb nimmi zrikk funn si shtrohfa.

³In sellem dawk,” sawkt da Awlmechtich HAH, “zayla di leedah im tempel zu heiles gedrayt vadda. Dohdi leit zayla ivvahrawlich sei; si zayla naus kshmissa vadda un alles vatt shtill!”

⁴Heichet dess, diah es uf leit in di noht dreddet un doond vekk mitt di oahma im land,

⁵un sawwet, “Vann zayld da Nei Moon ivvah sei so es miah frucht fakawfa kenna, un vann end da Sabbat so es miah vaytza uf du kenna fa fakawfa?” No kenna miah letz raus messa un ivvah-tsheahtsha, un falshi gvichtah yoosa.

⁶Miah kenna no di oahma kawfa mitt geld, un selli in noht mitt en poah shoo. Miah kenna no da drekk uf em bodda ufkeahra un en fakawfa mitt em vaytza.

⁷Da HAH hott kshvoahra bei sich selvaht, deah es da Jakob so shtols is mitt, “Ich zayl nee nett fagessa vass si gedu henn.

⁸Fasell, zayld nett's gans land shidla, un awl selli es drinn voona heila? Es gans land zayld ruff kumma vi's vassah im Nile, es vatt ufkshtatt un no vatt's viddah niddah vi da revvah in Egypta.”

⁹“In sellem dawk,” sawkt da Awlmechtich HAH, “mach ich di sunn unnah gay am middawk, un mach's dunkel deich da dawk.

¹⁰Ich dray eiyah feiyah-dawk essa zu veines, un awl eiyah singes zu heiles. Ich mach eich awl sekk-glaydah veahra un mach eich eiyah kebb shayfa. Ich mach selli zeit vi heila fa en aynsishtah boo un da dawk zayld biddah sei biss an's end.

¹¹Di dawwa zayla kumma,” sawkt da Awlmechtich HAH, “es ich en hungahs-noht deich's land shikk— nett en hungah fa ess-sach adda en dasht fa vassah, avvah en hungah fa em HAH sei vadda heahra.

¹²Leit zayla rumm lawfa funn say zu say, un funn di natt zu di east. Si zayla sucha fa's vatt fumm HAH avvah si zayla's nett finna.

¹³In sellem dawk zayla di shayna yungi mayt un di shteika yungi mennah fadashta unni vassah.

¹⁴Selli es shveahra bei di abgettah funn Samaria, un sawwa, ‘Yusht so voah es dei gott laybt, oh Dan,’ adda, ‘so voah es da gott funn Beer-Seba laybt’— selli leit zayla falla un nimmi uf shtay.”