Read Pennsylvania German Obadia 1 Bible Online

Obadia 1 - Pennsylvania German bible

Obadia 1

¹Em Obadia sei vision. Dess is vass Gott da HAH sawkt veyyich Edom: Miah henn keaht fumm HAH, es en zeiya-drawwah naus unnich di heida kshikt voah, fa sawwa, “Rishtet eich, miah vella geyyich Edom gay fa greek macha.”

²“Gukk moll,” sawkt da HAH zu Edom, “ich mach dich glay unnich di heida; du zaylsht gans fa'acht sei.

³Da hohchmoot in deim hatz hott dich fafiaht, du es in di felsa-lechah voonsht, un es dei haymet drovva in di hay hosht, du, es zu diah selvaht sawksht, ‘Veah kann mich nunnah uf da bodda shtohsa?’

⁴Even vann du drovva in di hay fleeksht vi en awdlah, un machsht dei nesht drovva unnich di shtanna, funn datt zayl ich dich runnah bringa,” sawkt da HAH.

⁵“Vann deeb zu diah kumma, un rawvah in di nacht, selli rawvah dayda nett alles nemma, yusht biss si genunk henn. Vann leit kumma dayda drauva pikka, dayda si nett samm ivvahrich lossa? Avvah du vasht gans fafolkt!

⁶Da Esau zayld gans fafolkt sei, sei fashtekkeld un keshtlich sach zayld alles kfunna sei.

⁷Awl dei freind zayla dich aus em land yawwa. Selli es du fridda hosht mitt, zayla dich fafiahra un dich gans ivvah-nemma. Selli es dei broht essa, zayla en fall setza fa dich, avvah du zaylsht's nett fanemma.”

⁸“An selli zeit,” sawkt da HAH, “zayl ich di mennah mitt veisheit in Edom doht macha, di mennah es feel vissa uf em Berg Esau.

⁹Dei greeks-gnechta, oh shtatt Theman, vadda fagelshtaht; alli-ebbah uf em Berg Esau vatt nunnah kshlauwa un doht gmacht.

¹⁰Veil du so veesht voahsht zu deim broodah Jakob, zaylsht du zu gedekt sei mitt shohm, un ayvichlich abkshnidda sei.

¹¹Uf sellah dawk hosht du dibei kshtanna diveil es fremdi leit Israel iahra keshtlich shtoft vekk gedrawwa henn. Auslendah sinn deich di doahra nei ganga, un henn gezowwa im lohs fa sayna vels dayl funn Jerusalem es si greeya. Du voahsht grawt vi ayns funn selli fremda.

¹²Du hetsht nett sedda lacha ivvah's aylend es uf dei broodah kumma is. Du hetsht nett sedda dich froiya ivvah di leit funn Juda, da dawk es si nunnah kshlauwa voahra; un hetsht nett sedda braekka, im dawk funn iahra druvvel.

¹³Du hetsht nett sedda deich di doahra funn mei leit nei gay uf em dawk es si fafolkt vadda sinn, adda nunnah gukka uf si uf em dawk es si fafolkt voahra, adda iahra sach nemma uf em dawk es si fafolkt voahra.

¹⁴Du hetsht nett am greitz-vayk voahra sedda, fa selli nunnah hakka es am fatt shpringa voahra. Du hetsht si nett ivvah-drayya sedda zu di feinda uf em dawk funn iahra druvvel.

¹⁵Da richts-dawk fumm HAH is nayksht fa awl di heida. So vi du gedu hosht, zayld's gedu sei zu diah; vass du fadeend hosht zayld uf dei kobb kumma.

¹⁶So vi diah gedrunka hend uf meim heilicha hivvel, so zayla awl di heida immah drinka. Si zayla drinka un drinka, un zayla sei es vann si nee nett gvest veahra.

¹⁷Avvah uf em Berg Zion zayla samm ivvahrich bleiva; da berg zayld heilich sei. Em Jakob sei leit zayla iahra land zrikk greeya; si greeya zrikk vass zu eena heaht.

¹⁸Em Jakob sei leit zayla sei vi en feiyah, un em Joseph sei leit vi en flamm. Em Esau sei leit zayla sei vi shtubla im feld; si zayla fabrend vadda mitt demm feiyah. Es zayld nimmand ivvahrich sei fumm Esau sei nohch-kummashaft.” Da HAH hott so ksawt.

¹⁹No zayla di leit funn di saut in di berga fumm Esau voona. Selli unna an di berga nohch, zayla's land funn di Philishtah ivvah-nemma. Si zayla di lendah fumm Ephraim un Samaria zrikk greeya, un da Benjamin nemd Gilead ivvah.

²⁰Selli funn di Kinnah-Israel es kfanga vekk gnumma voahra, zayla no's land Kanaan ivvah-nemma biss an Zarphath. Un selli funn Jerusalem es in Sepharad sinn, zayla di shtett in di saut ivvah-nemma.

²¹Di greeks-gnechta gayn nuff uf da Berg Zion; funn datt richta si da Berg Esau. Un's kaynich-reich zayld em HAH seins sei.