Read Pennsylvania German Jona 2 Bible Online

Jona 2 - Pennsylvania German bible

Jona 2

¹Da Jona hott no gebayda zumm HAH, sei Gott, diveil es eah im fish sei bauch voah.

²Eah hott ksawt, “Ich habb groofa zumm HAH in mei dreebsawl, un eah hott miah andvat gevva. Aus em bauch funn di hell habb ich groofa, un du hosht mei shtimm keaht.

³Du hosht mich in's deef vassah kshmissa, in di mitt fumm say. 'S vassah voah gans um mich rumm, un awl dei grohsi vella sinn ivvah mich ganga.

⁴Ich habb gmaynd ich binn funn dei awwa vekk kshtohsa, avvah ich zayl viddah geyyich dei heilichah tempel gukka.

⁵'S vassah voah um mich rumm biss mei layva in di kfoah voah. 'S deef vassah hott mich zu gedekt. Veetz fumm say voah um mei kobb rumm gvikkeld.

⁶Ich binn nunnah ganga biss unna an di berga. Di eaht iahra rikkel henn mich eikshpatt fa'immah. Avvah du, oh HAH, mei Gott, hosht mich levendich aus demm deef loch kfiaht.

⁷Vo mei layva am aus miah gay voah, habb ich an da HAH gedenkt, un mei gebayt is zu diah kumma, zu deim heilicha tempel.

⁸Dee vo sich ufhalda mitt leahri gettah, falossa di gnawt vo iahra sei kend.

⁹Avvah mitt en dankboahri shtimm bring ich en opfah zu diah, Ich betzawl sell es ich fashprocha habb. Di saylichkeit is fumm HAH.”

¹⁰Da HAH hott no kshvetzt zumm fish, un eah hott da Jona naus uf's drukka land kshpautzt.