Read Pennsylvania German 4. Mosi 1 Bible Online

4. Mosi 1 - Pennsylvania German bible

4. Mosi 1

¹Un da HAH hott kshvetzt zumm Mosi im Fasamling-Tent in di Vildahnis funn Sinai uf em eahshta dawk fumm zvedda moonet fumm zvedda yoah noch demm es si aus Egypta kumma sinn. Eah hott ksawt:

²“Zayl di gans fasamling funn di Kinnah-Israel bei iahra kshlechtah, families un nayma. Zayl alli manskal kobb bei kobb

³funn zvansich yoah ald un eldah es in da greek gay kann. Du un da Aaron sellet si zayla bei iahra drubba es si ditzu heahra im greek.

⁴Es soll en mann funn yaydah shtamm eich helfa es da evvahsht is funn sei family.

⁵Dess sinn di nayma funn di mennah es eich helfa sella: funn Ruben, em Sedeur sei boo da Elizur;

⁶funn Simeon, em Zuri-Saddai sei boo da Selumiel;

⁷funn Juda, em Amminadab sei boo da Nahesson;

⁸funn Isachar, em Zuar sei boo da Nathanael;

⁹funn Sebulon, em Helon sei boo da Eliab;

¹⁰fumm Joseph sei boova: funn Ephraim, em Ammihud sei boo da Elisama; funn Manasse, em Pedazur sei boo da Gamliel;

¹¹funn Benjamin, em Gideoni sei boo da Abidan;

¹²funn Dan, em Ammi-Saddai sei boo da Ahieser;

¹³funn Asser, em Ochran sei boo da Pagiel;

¹⁴funn Gad, em Deguel sei boo da Eliasaph;

¹⁵funn Naphthali, em Enan sei boo da Ahira.”

¹⁶Sell voahra di mennah es raus groofa voahra funn di fasamling es di evvahshti voahra funn di shtamma funn iahra foah-feddah, di evvahshti funn di dausends in Israel.

¹⁷Da Mosi un da Aaron henn dee mennah gnumma es gnohmd voahra,

¹⁸un henn awl di leit fasammeld uf em eahshta dawk fumm zvedda moonet. Iahra freindshaft voah ufkshrivva deich iahra kshlechtah, shtamma un families, awl di mennah funn zvansich yoah on nuff, kobb bei kobb,

¹⁹vi da HAH da Mosi gebodda katt hott. So hott eah si gezayld in di Vildahnis funn Sinai.

²⁰Di nohch-kummashaft fumm Ruben, em Israel sei eahsht-geboahranah: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma, kobb bei kobb, noch iahra kshlechtah, shtamma un families.

²¹Selli im Ruben sei shtamm voahra 46,500 mennah.

²²Di nohch-kummashaft fumm Simeon: Awl di mennah funn zvansich yoah on nuff es fechta henn kenna im greek voahra gezayld un nunnah kshrivva bei nohma, kobb bei kobb, noch iahra shtamm un families.

²³Selli im Simeon sei shtamm voahra 59,300 mennah.

²⁴Di nohch-kummashaft fumm Gad: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma noch iahra shtamma un families.

²⁵Selli im Gad sei shtamm voahra 45,650 mennah.

²⁶Di nohch-kummashaft fumm Juda: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma, noch iahra shtamma un families.

²⁷Selli im Juda sei shtamm voahra 74,600 mennah.

²⁸Di nohch-kummashaft fumm Isachar: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma noch iahra shtamma un families.

²⁹Selli im Isachar sei shtamm voahra 54,400 mennah.

³⁰Di nohch-kummashaft fumm Sebulon: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma noch iahra shtamma un families.

³¹Selli im Sebulon sei shtamm voahra 57,400 mennah.

³²Di kinnah fumm Joseph: Di nohch-kummashaft fumm Ephraim: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma noch iahra shtamma un families.

³³Selli im Ephraim sei shtamm voahra 40,500 mennah.

³⁴Di nohch-kummashaft fumm Manasse: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma noch iahra shtamma un families.

³⁵Selli im Manasse sei shtamm voahra 32,200 mennah.

³⁶Di nohch-kummashaft fumm Benjamin: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma noch iahra shtamma un families.

³⁷Selli im Benjamin sei shtamm voahra 35,400 mennah.

³⁸Di nohch-kummashaft funn Dan: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma noch iahra shtamma un families.

³⁹Selli im Dan sei shtamm voahra 62,700 mennah.

⁴⁰Di nohch-kummashaft fumm Asser: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma noch iahra shtamma un families.

⁴¹Selli im Asser sei shtamm voahra 41,500 mennah.

⁴²Di nohch-kummashaft fumm Naphthali: Awl di mennah funn zvansich yoah on nuff es fechta henn kenna im greek voahra nunnah kshrivva bei nohma noch iahra shtamma un families.

⁴³Selli im Naphthali sei shtamm voahra 53,400 mennah.

⁴⁴Sell voahra di mennah es gezayld voahra beim Mosi un em Aaron, un di zvelf feddahshti funn Israel, yaydahs es kshtanna hott fa sei ayknah family-shtamm.

⁴⁵Awl di Kinnah-Israel funn zvansich yoah on nuff es fechta henn kenna im greek voahra gezayld bei iahra families.

⁴⁶Alles zammah voahra's 603,550 mennah.

⁴⁷Avvah di families funn di shtamm fumm Levi voahra nett gezayld mitt di ivvahricha.

⁴⁸Da HAH hott ksawt katt zumm Mosi,

⁴⁹“Du solsht di shtamm fumm Levi nett zayla adda si nei du mitt di anra Kinnah-Israel.

⁵⁰Avvah du solsht di Lefiddah ivvah da tempel-tent fumm zeiknis du, mitt sei ksharra un alles es ditzu heaht. Si sella da tempel-tent drawwa, un alles es ditzu heaht, un acht gevva druff, un iahra aykni tents ufhokka drumm rumm.

⁵¹Vann da tempel-tent funn seim blatz gnumma sei soll, dann sella di Lefiddah en zammah runnah nemma, un vann ah ufksetzt sei soll, sella di Lefiddah's du. Ennich ebbah shunsht es nayksht an da tempel-tent gayt soll doht gmacht sei.

⁵²Di Kinnah-Israel sella iahra tents ufhokka in family-drubba, yaydah mann mitt sei aykni family es gmeikt is mitt iahra flag.

⁵³Avvah di Lefiddah sella iahra tents ufhokka um da tempel-tent rumm, so es kenn zann uf di fasamling funn Israel kumd. Di Lefiddah sella acht gevva uf da tempel-tent fumm Zeiknis.”

⁵⁴Di Kinnah-Israel henn gedu grawt vi da HAH da Mosi gebodda hott.