Read Pennsylvania German 4. Mosi 12 Bible Online

4. Mosi 12 - Pennsylvania German bible

4. Mosi 12

¹Di Miriam un da Aaron henn no ohkfanga shvetza geyyich da Mosi veyyich sei Kushiddah fraw, fa eah hott en Kushiddah fraw keiyaht katt.

²Si henn ksawt, “Hott da HAH yusht kshvetzt deich da Mosi? Hott eah nett aw kshvetzt deich uns?” Un da HAH hott dess keaht.

³(Nau da Mosi voah en daymeedichah mensh, may so es alli mensh uf di eaht.)

⁴Un bletzlich hott da HAH ksawt zumm Mosi, em Aaron un di Miriam, “Awl drei funn eich kummet raus an da fasamling-tent.” So sinn si awl drei naus ganga.

⁵No is da HAH runnah kumma in en volka-poshta, un hott am doah fumm tent kshtanna. Datt hott eah da Aaron un di Miriam groofa. Vo si fassich kumma sinn,

⁶hott eah ksawt, “Heichet mei vadda ab: Vann en brofayt fumm HAH unnich eich is, dann mach ich mich gvissa zu eem in en vision, adda ich shvetz zu eem in en drohm.

⁷Avvah dess is nett so mitt meim gnecht Mosi, eah is shtandhaftich mitt meim gans haus.

⁸Mitt eem shvetz ich maul zu maul, grawt raus, un nett in dunkli kshvetzah; eah saynd da HAH vi eah is. So favass hend diah eich nett kfeicht fa shvetza geyyich mei gnecht da Mosi?”

⁹Em HAH sei zann hott gebrend geyyich si, un eah hott si falossa.

¹⁰Vo di volk nuff ganga is fumm tent, datt hott di Miriam kshtanna, gans aussetzich, veis vi shnay. Da Aaron hott sich noch iahra gedrayt, un hott ksenna es see aussetzich voah.

¹¹No hott eah ksawt zumm Mosi, “Oh mei hah, layk dee sind nett uf uns es miah so unksheit gedu henn.

¹²Loss see nett sei vi ebbah es doht-geboahra is, ebbah es sei flaysh halvah fazeaht is vann eah aus em muddahs-leib kumd.”

¹³No hott da Mosi naus groofa zumm HAH, “Oh Gott, hayl see!”

¹⁴Da HAH hott ksawt zumm Mosi, “Vann iahra daett in iahra ksicht kshpautzt hett, mist see no nett im shohm layva fa sivva dawk? Du see naus aus di camp fa sivva dawk; noch sellem kann see viddah zrikk kumma.”

¹⁵So voah di Miriam naus aus di camp gedu fa sivva dawk, un di leit sinn nett on gezowwa biss see viddah rei gebrocht voah.

¹⁶Noch sellem, henn di leit da blatz Hazeroth falossa, un henn iahra tents uf gedu in di Vildahnis funn Pharan.