Read Pennsylvania German 4. Mosi 15 Bible Online

4. Mosi 15 - Pennsylvania German bible

4. Mosi 15

¹Da HAH hott ksawt zumm Mosi,

²“Shvetz zu di Kinnah-Israel un sawk eena, ‘Vann diah moll in's land gaynd es ich eich gebb fa drinn voona,

³un diah machet en goot-shmakkich opfah mitt feiyah zumm HAH, dann muss es funn eiyah fee sei, eb's kee adda shohf sinn. Vann's en brand-opfah is, en opfah fa en fashpreching halda, en frei-villich opfah adda en opfah an en fasamling-fesht,

⁴dann muss sellah es sei opfah bringd aw en shpeis-opfah zumm HAH macha. Deah opfah soll zvay gvoaht fei mayl sei zammah gmixt mitt en gvoaht ayl.

⁵Mitt alli lamm es en brand-opfah is, dann muss aw en gvoaht vei gevva sei es en drink-opfah.

⁶Mitt en shohf-bokk muss en shpeis-opfah gopfaht sei funn drei gvoaht fei mayl zammah gmixt mitt ay un en faddel gvoaht ayl,

⁷un aw ay un en faddel gvoaht vei fa en drink-opfah. Sell soll en goot-shmakkich opfah sei zumm HAH.

⁸Vann du en yungah bull rishta dusht fa en brand-opfah, adda en opfah fa en fashpreching halda, adda en dank-opfah zumm HAH,

⁹dann muss da shpeis-opfah es mitt gayt fimf gvoaht fei mayl sei, gmixt mitt zvay gvoaht ayl,

¹⁰un's missa zvay gvoaht vei mitt gevva sei fa en drink-opfah. Dess zayld en opfah sei es gmacht is mitt feiyah un es goot-shmakkich is zumm HAH.

¹¹Dess is vi yaydah bull, shohf-bokk, shibli un gaysli grisht sei soll.

¹²Du dess fa yaydah vann, un fa so feel opfahra es du rishta dusht.

¹³Vann diah geboahra sind es Israeliddah, un diah en opfah macha vellet mitt feiyah es goot-shmakkich is zumm HAH, dann sellet diah dee sacha sellah vayk du.

¹⁴In di yoahra zu kumma, vann en ausahrah bei eich voond, un eah vill en feiyah-opfah macha es goot-shmakkich is zumm HAH, dann soll eah du vi diah doond.

¹⁵Es soll yusht ay adning sei fa eich un selli es ausahri sinn unnich eich, un dess aw fa eiyah nohch-kummashaft. Vi diah sind fannich em HAH, so soll da ausahrah sei es unnich eich is.

¹⁶Ay ksetz un ay adning soll sei fa eich un fa da ausahrah unnich eich.’”

¹⁷No hott da HAH ksawt zumm Mosi,

¹⁸“Shvetz zu di Kinnah-Israel un sawk eena, ‘Vann diah in's land gaynd es ich eich nei nemma zayl,

¹⁹un diah esset's ess-sach fumm land, dann gevvet en dayl fa en opfah zumm HAH.

²⁰Fumm eahshta dayk sellet diah en kucha opfahra fa en hayb-opfah fumm dresha-floah.

²¹Diah un eiyah nohch-kummashaft sellet fa'immah fumm eahshta dayk nemma un's gevva fa en hayb-opfah zumm HAH.

²²Nau vann diah unfahoft ennichs funn dee gebodda nett haldet es da HAH em Mosi gevva hott,

²³sell is, ennichs fumm HAH sei gebodda es eah eich gevva hott deich da Mosi fumm dawk es eah's gevva hott, un noch sell on nunnah deich eiyah nohch-kummashaft,

²⁴vann's gebott unfahoft nett kalda voah, un di leit's nett vissa, dann sella awl di leit no en yungah bull bringa fa en brand-opfah fa en goodah kshmakk zumm HAH. Un's shpeis-opfah un drink-opfah es mitt em brand-opfah gayn sella aw gebrocht sei, un aw en gays-bokk fa en sind-opfah.

²⁵Da preeshtah soll dess faseiya fa awl di Kinnah-Israel, un si zayla no fagevva sei, veil dee sind unfahoft gedu voah, un si henn's recht gmacht bei iahra opfah macha zumm HAH mitt feiyah, un iahra sind-opfah.

²⁶Awl di Kinnah-Israel un di ausahrah es unnich eena voona zayla fagevva sei, veil alli-ebbah en dayl katt hott in dee unfahoft sind.

²⁷Vann yusht ay-ebbah unfahoft sindicha dutt, dann soll eah en yoah ald shohf bringa fa en sind-opfah.

²⁸Da preeshtah soll no's opfah macha fannich em HAH fa sellah es unfahoft ksindicht hott. Un vann's opfah moll gmacht voah fa een, dann is eah fagevva.

²⁹Diah sellet yusht ay ksetz havva fa sellah es unfahoft sindicha dutt, fa selli es zu di Kinnah-Israel geboahra sinn, un fa di ausahra es unnich eich voona.

³⁰Avvah ennich ebbah es poahbes un frei-villich sindicha dutt, un dess eb's en Israeliddah is adda en ausahrah, sellah mensh is am leshtahra fannich em HAH un muss gans abkshnidda sei funn sei leit.

³¹Veil eah em HAH sei vatt niddah gezayld hott un sei gebott nett kalda hott, dann muss eah abkshnidda sei, un sei shuld bleibt uf eem.’”

³²Diveil es di Kinnah-Israel in di vildahnis voahra, henn si en mann kfunna am hols geddahra uf em Sabbat-Dawk.

³³Un selli es een kfunna henn am hols geddahra henn een zumm Mosi, Aaron un di ivvahricha leit gebrocht.

³⁴Si henn een kfanga kohva veil si nett gvist henn vass zu du mitt eem.

³⁵No hott da HAH ksawt zumm Mosi, “Da mann muss umgebrocht sei. Di gans fasamling muss een shtaynicha autseit di camp.”

³⁶So hott di gans fasamling een aus di camp gnumma, un si henn een doht kshtaynicht vi da HAH gebodda hott deich da Mosi.

³⁷Da HAH hott ksawt zumm Mosi,

³⁸“Shvetz zu di Kinnah-Israel un sawk eena: ‘Diah un eiyah nohch-kummashaft sellet fransla macha un si an da sohm funn eiyah glaydah du. Binnet yaydah fransel fesht mitt blohwi shnuah.

³⁹Vann diah an dee fransla gukket, soll's eich droh denka macha an awl di gebodda fumm HAH, so es diah si doond, un nett eiyah aykni hatza un awwa nohch gaynd un lushtet noch abgettah.

⁴⁰No denket diah droh fa awl mei gebodda halda so es diah heilich sind zu eiyah Gott.

⁴¹Ich binn da HAH eiyah Gott, deah es eich aus Egypta gebrocht hott fa eiyah Gott sei, ich binn da HAH eiyah Gott.’”