Read Pennsylvania German 4. Mosi 17 Bible Online

4. Mosi 17 - Pennsylvania German bible

4. Mosi 17

¹Da HAH hott ksawt zumm Mosi,

²“Shvetz zu di Kinnah-Israel un grikk zvelf shtekk funn eena, aynah fa yaydah evvahshtah fumm shtamm. Shreib da nohma funn yaydah evvahshtah uf sei shtokk.

³Uf em Levi sei shtokk shreib em Aaron sei nohma, veil's ay shtokk sei muss fa da evvahsht funn yaydah shtamm.

⁴Du si nei in da fasamling-tent fannich di Zeiknis-Lawt vo ich shvetz mitt eich.

⁵Da shtokk es zumm mann heaht es ich raus lays zayld ausshlauwa. Sellah vayk mach ich en end zu demm ayvich gegrummel bei di Kinnah-Israel geyyich dich.”

⁶So hott da Mosi kshvetzt zu di Kinnah-Israel, un iahra evvahshti henn eem zvelf shtekk gevva, ay shtokk fa yaydah evvahshtah funn seim shtamm. Em Aaron sei shtokk voah dibei.

⁷No hott eah di shtekk fannich da HAH gedu im tent fumm zeiknis.

⁸Da neksht meiya is da Mosi in da tent fumm zeiknis ganga, un hott ksenna es em Aaron sei shtokk, deah es datt voah fa da shtamm Levi, auskshlauwa katt hott, gebleet hott un almond frucht druff katt hott.

⁹No hott da Mosi awl di shtekk fannich em HAH vekk gnumma un si zu awl di Kinnah-Israel gebrocht. Si henn si gegukt, un yaydah mann hott sei shtokk gnumma.

¹⁰Da HAH hott no ksawt zumm Mosi, “Du em Aaron sei shtokk viddah nei fannich di Zeiknis-Lawt fa en zeiknis zu selli es sich geyyich mich shtella. Dess dutt en end macha zumm gegrummel geyyich mich, so es si nett shtauva.”

¹¹Da Mosi hott no gedu vi da HAH eem gebodda hott.

¹²Di Kinnah-Israel henn no ksawt zumm Mosi, “Miah zayla shtauva! Miah kumma um, awl funn uns zayla shtauva!

¹³Ennich ebbah es even nayksht an da tempel-tent fumm HAH gayt zayld shtauva. Zayla miah awl umkumma?”