Read Pennsylvania German 4. Mosi 2 Bible Online

4. Mosi 2 - Pennsylvania German bible

4. Mosi 2

¹Da HAH hott ksawt zumm Mosi un em Aaron,

²“Di Kinnah-Israel sella iahra tents ufhokka ausa um da fasamling-tent rumm avvah en shtikk vekk. Yaydah ebbah soll bei sei family-shtamm bleiva un unnich iahra meikah-flag.

³Uf di east seit vo di sunn ufkumd, sella selli es zumm Juda heahra sich ufhokka, gmeikt mitt iahra flag. Di leit funn Juda iahra hauptmann is em Amminadab sei boo da Nahesson.

⁴Eah hott 74,600 greeks-gnechta unnich sich.

⁵Nayvich eena is em Isachar sei nohch-kummashaft. Iahra hauptmann is em Zuar sei boo da Nathanael.

⁶Eah hott 54,400 greeks-gnechta unnich sich.

⁷Nayvich eena is em Sebulon sei nohch-kummashaft. Em Sebulon sei leit iahra hauptmann is em Helon sei boo da Eliab.

⁸Eah hott 57,400 greeks-gnechta unnich sich.

⁹Awl di mennah es zumm Juda heahra sinn 186,400. Si sella fanna heah gay.

¹⁰Uf di saut seit sella selli sei es zumm Ruben heahra, gmeikt mitt iahra flag. Da hauptmann fumm Ruben sei leit is em Sedeur sei boo da Elizur.

¹¹Eah hott 46,500 greeks-gnechta unnich sich.

¹²Nayvich eena is em Simeon sei nohch-kummashaft. Em Simeon sei leit iahra hauptmann is em Zuri-Saddai sei boo da Selumiel.

¹³Eah hott 59,300 greeks-gnechta unnich sich.

¹⁴Nayvich eena is em Gad sei nohch-kummashaft. Em Gad sei leit iahra hauptmann is em Reguel sei boo da Eliasaph.

¹⁵Eah hott 45,650 greeks-gnechta unnich sich.

¹⁶Awl di mennah es zumm Ruben heahra sinn 151,450. Si sella di zvett drubb sei fa gay.

¹⁷No sella di Lefiddah aus di mitt funn di camp gay mitt em tempel-tent. So vi di leit sich ufkokt henn in di camp, so sella si raus zeeya, alli-ebbah an seim blatz unnich sei meikah-flag.

¹⁸Uf di west seit sella selli sei es zumm Ephraim heahra, gmeikt mitt iahra flag. Da hauptmann fumm Ephraim sei leit is em Ammihud sei boo da Elisama.

¹⁹Eah hott 40,500 greeks-mennah unnich sich.

²⁰Nayvich eena is em Manasse sei nohch-kummashaft. Da hauptmann fumm Manasse sei leit is em Pedazur sei boo da Gamliel.

²¹Eah hott 32,200 greeks-gnechta unnich sich.

²²Nayvich eena is em Benjamin sei nohch-kummashaft. Da hauptmann fumm Benjamin sei leit is em Gideoni sei boo da Abidan.

²³Eah hott 35,400 greeks-mennah unnich sich.

²⁴Awl di mennah es zumm Ephraim heahra sinn 108,100. Si sella di dritt drubb sei fa gay.

²⁵Uf di natt seit sella selli sei es zumm Dan heahra, gmeikt mitt iahra flag. Da hauptmann fumm Dan sei leit is em Ammi-Saddai sei boo da Ahieser.

²⁶Eah hott 62,700 greeks-gnechta unnich sich.

²⁷Nayvich eena is em Asser sei nohch-kummashaft. Da hauptmann fumm Asser sei leit is em Ochran sei boo da Pagiel.

²⁸Eah hott 41,500 greeks-gnechta unnich sich.

²⁹Nayvich eena is em Naphthali sei nohch-kummashaft. Da hauptmann fumm Naphthali sei leit is em Enan sei boo da Ahira.

³⁰Eah hott 53,400 greeks-gnechta unnich sich.

³¹Awl di mennah es zumm Dan heahra sinn 157,600. Si sella di letsht drubb sei fa gay gmeikt mitt iahra flag.”

³²Sell sinn awl di Kinnah-Israel es gezayld voahra bei iahra families. Awl selli in di camps un in iahra greeks-drubba voahra 603,550.

³³Avvah di Lefiddah voahra nett gezayld mitt di anra Kinnah-Israel, so vi da HAH da Mosi gebodda katt hott.

³⁴Di Kinnah-Israel henn alles gedu vi da HAH da Mosi gebodda hott. So henn si iahra tents ufkokt unnich iahra meikah-flag, un sell is vi si gezowwa sinn. Alli-ebbah is ganga mitt sei shtamm un family.