Read Pennsylvania German 4. Mosi 23 Bible Online

4. Mosi 23 - Pennsylvania German bible

4. Mosi 23

¹Da Bileam hott no ksawt zumm Balak, “Bau miah sivva awldahra do, un risht sivva bulla un sivva shohf-bekk fa mich.”

²Da Balak hott grawt gedu vass da Bileam ksawt hott, un da Balak un da Bileam henn en bull un en shohf-bokk gopfaht uf yaydah awldah.

³No hott da Bileam ksawt zumm Balak, “Bleib do bei deim opfah, un ich gay vekk. Fleicht kumd da HAH un dreft mich oh. Vass-evvah es eah miah veist dann sawk ich diah.” No is eah nuff uf en bluddah hivvel ganga.

⁴Gott hott da Bileam ohgedroffa datt, un da Bileam hott ksawt zu eem, “Ich habb sivva awldah grisht, un habb en bull un en shohf-bokk ufgopfaht uf yaydah awldah.”

⁵Da HAH hott en vatt im Bileam sei maul gedu un hott ksawt, “Gay zrikk zumm Balak un sawk eem dess.”

⁶So is eah zrikk zumm Balak ganga, un hott een kfunna am nayvich sei opfah shtay mitt awl di evvahshti funn Moab.

⁷No hott da Bileam dess gebroffetzeit: “Da Balak, da kaynich funn Moab, hott mich funn Aram un di berga funn di east gebrocht. ‘Kumm’, hott eah ksawt, ‘fafluch da Jakob fa mich; kumm, vinsh shlechtes uf Israel.’

⁸Vee kann ich selli faflucha es Gott nett faflucht hott? Vee kann ich selli shlecht vinsha es da HAH nett shlecht gvinsht hott?

⁹Funn di hohcha felsa sayn ich si, funn di hivla gukk ich si ivvah. Ich sayn en leit es laynich voona, un henn kenn dayl mitt di heida.

¹⁰Veah kann da shtawb fumm Jakob zayla, adda even en faddel dayl funn Israel? Loss mich da doht shteahva funn di gerechta, un loss mei end sei vi iahres!”

¹¹No hott da Balak ksawt zumm Bileam, “Vass hosht du gedu zu miah? Ich habb dich kohld fa mei feinda flucha, avvah du hosht si yusht ksaykend!”

¹²Avvah da Bileam hott ksawt, “Muss ich nett sawwa vass da HAH in mei maul dutt?”

¹³No hott da Balak ksawt zu eem, “Kumm mitt miah zu en anrah blatz es du si sayna kansht. Du zaylsht si nett awl sayna, yusht en dayl funn eena. Funn datt, du en fluch uf si fa mich.”

¹⁴So hott eah een an's feld fumm Zophim kfiaht ovva uf em Berg Pisga. Datt hott eah sivva awldahra gebaut, un hott en bull un en shohf-bokk gopfaht uf yaydah awldah.

¹⁵No hott da Bileam ksawt zumm Balak, “Shtay do nayvich dei opfah diveil es ich een ohdreff datt drivva.”

¹⁶Da HAH hott da Bileam ohgedroffa un hott en vatt in sei maul gedu. Eah hott ksawt, “Gay zrikk zumm Balak un gebb eem dess vatt.”

¹⁷So is eah ganga un hott een kfunna am nayvich sei opfah shtay mitt di evvahshti funn Moab. Da Balak hott no kfrohkt, “Vass hott da HAH ksawt?”

¹⁸No hott eah dess gebroffetzeit: “Shtay uf, Balak, un heich; heich mich ab, du kind fumm Zippor.

¹⁹Gott is nett en mensh, es eah leeya sett, un aw nett en mensha sohn, es eah nett dutt vass eah in meind hott. Sawkt eah ebbes, un dutt's no nett? Fashprecht eah, un macht's no nett goot?

²⁰Ich habb en gebott fa sayya gevva; eah hott ksaykend, un ich dauf's nett fa'ennahra.

²¹Eah hott nix unheiliches ksenna im Jakob, un aw kenn druvvel in Israel. Da HAH iahra Gott is bei eena, un si greisha naus es eah iahra Kaynich is.

²²Gott hott si aus Egypta gebrocht; eah is shteik vi's hann funn en vildah ox fa si.

²³Zaubahrei gayt nett geyyich da Jakob; un kenn voah-sawwes geyyich Israel. An di recht zeit vatt's ksawt veyyich em Jakob un veyyich Israel, ‘Saynet vass Gott gedu hott!’

²⁴Dee leit shtayn uf vi en muddah-layb, un vi en shteikah layb bleiva si shtay. Eah root nett biss eah kfressa hott, un's bloot gedrunka hott funn seim diah es eah doht gmacht hott.”

²⁵No hott da Balak zumm Bileam ksawt, “Vann du si nett fluchsht, dann du si aw nett saykna!”

²⁶Avvah da Bileam hott ksawt, “Habb ich diah nett ksawt es ich du muss vass da HAH miah sawkt?”

²⁷No hott da Balak ksawt zumm Bileam, “Kumm, loss mich diah an en anra blatz nemma. Fleicht kfald's Gott es du si fluchsht funn datt fa mich.”

²⁸Un da Balak hott da Bileam nuff ovva uf da Berg Peor gnumma es ivvah's veesht-land gegukt hott.

²⁹Da Bileam hott ksawt zumm Balak, “Bau sivva awldahra fa mich do, un risht sivva bulla un sivva shohf-bekk fa mich.”

³⁰Da Balak hott gedu vi da Bileam eem ksawt hott, un hott en bull un en shohf-bokk gopfaht uf yaydah awldah.