Read Pennsylvania German 4. Mosi 26 Bible Online

4. Mosi 26 - Pennsylvania German bible

4. Mosi 26

¹Noch di peshtelens hott da HAH ksawt zumm Mosi un em preeshtah Eleasar, em Aaron sei boo,

²“Zayl di gans drubb Kinnah-Israel bei iahra families. Zayl awl selli es zvansich yoah un eldah sinn es fechta kenna im greek fa Israel.”

³So uf em ayvana land funn Moab nayvich em Jordan Revvah ivvah da revvah funn Jericho, hott da Mosi un da preeshtah Eleasar kshvetzt mitt eena un si henn ksawt,

⁴“Zaylet di leit es zvansich yoah un eldah sinn, vi da HAH da Mosi gebodda hott.” Dess voahra di Kinnah-Israel es aus Egypta kumma sinn:

⁵Di nohch-kummashaft funn Ruben, da eahsht-geboahra boo fumm Israel, voah: da Henoch, vo's Henochiddah kshlecht bei kumd; da Pallu, vo's Palluiddah kshlecht bei kumd;

⁶da Hezron, vo's Hezroniddah kshlecht bei kumd; da Charmi, vo's Charmiddah kshlecht bei kumd.

⁷Sell voahra di kshlechtah fumm Ruben, un's voahra 43,730 mennah unnich eena.

⁸Em Pallu sei boo voah da Eliab,

⁹un em Eliab sei boova voahra da Nemuel, da Dathan un da Abiram. Dess voah sellah Dathan un Abiram es evvahshti voahra funn iahra leit un es sich geyyich da Mosi un da Aaron kshteld henn. Si henn em Korah nohch gmacht vo si sich geyyich da HAH kshteld henn.

¹⁰Di eaht hott iahra maul uf gmacht un hott si kshlukt mitt em Korah. Selli es em Korah nohch ganga sinn, sinn umkumma vo feiyah 250 mennah fabrend hott. Sell voah en vanning gvest zu di ivvahricha.

¹¹Avvah em Korah sei kinnah sinn nett kshtauva.

¹²Dess is di nohch-kummashaft fumm Simeon gezayld bei iahra kshlechtah: da Nemuel, vo's Nemueliddah kshlecht bei kumd; da Jamin, vo's Jaminiddah kshlecht bei kumd; da Jachin, vo's Jachiniddah kshlecht bei kumd;

¹³da Serah, vo's Serahiddah kshlecht bei kumd; da Saul, vo's Sauliddah kshlecht bei kumd.

¹⁴Sell voahra di kshlechtah fumm Simeon, un's voahra 22,200 mennah unnich eena.

¹⁵Dess is di nohch-kummashaft fumm Gad, gezayld bei iahra kshlechtah: da Ziphon, vo's Ziphoniddah kshlecht bei kumd; da Haggi, vo's Haggiddah kshlecht bei kumd; da Suni, vo's Suniddah kshlecht bei kumd;

¹⁶da Osni, vo's Osniddah kshlecht bei kumd; da Eri, vo's Eriddah kshlecht bei kumd;

¹⁷da Arod, vo's Arodiddah kshlecht bei kumd; da Ariel, vo's Arieliddah kshlecht bei kumd.

¹⁸Sell voahra di kshlechtah fumm Gad, un's voahra 40,500 mennah unnich eena.

¹⁹Da Ger un da Onan voahra em Juda sei boova, avvah si sinn kshtauva in Kanaan.

²⁰Un dess sinn di ivvahricha fumm Juda sei nohch-kummashaft es gezayld voah bei iahra kshlechtah: da Sela, vo's Selaniddah kshlecht bei kumd; da Perez, vo's Pereziddah kshlecht bei kumd; da Serah, vo's Serahiddah kshlecht bei kumd.

²¹Em Perez sei nohch-kummashaft voah: da Hezron, vo's Hezroniddah kshlecht bei kumd; da Hamul, vo's Hamuliddah kshlecht bei kumd.

²²Sell voahra di kshlechtah fumm Juda, un's voahra 76,500 mennah unnich eena.

²³Di nohch-kummashaft fumm Isachar, es gezayld voah bei iahra kshlechtah: da Thola, vo's Tholaiddah kshlecht bei kumd; da Phuva, vo's Phuvaiddah kshlecht bei kumd;

²⁴da Jasub, vo's Jasubiddah kshlecht bei kumd; da Simron, vo's Simroniddah kshlecht bei kumd.

²⁵Sell voahra di kshlechtah fumm Isachar, un's voahra 64,300 mennah unnich eena.

²⁶Di nohch-kummashaft fumm Sebulon, es gezayld voah bei iahra kshlechtah: da Sered, vo's Serediddah kshlecht bei kumd; da Elon, vo's Eloniddah kshlecht bei kumd; da Jahleel, vo's Jahleeliddah kshlecht bei kumd.

²⁷Sell voahra di kshlechtah fumm Sebulon, un's voahra 60,500 mennah unnich eena.

²⁸Di nohch-kummashaft fumm Joseph, es gezayld voah bei iahra kshlechtah deich da Manasse un da Ephraim:

²⁹Em Manasse sei nohch-kummashaft voah: da Machir, vo's Machiriddah kshlecht bei kumd (Da Machir voah em Gilead sei daett); da Gilead, vo's Gileadiddah kshlecht bei kumd.

³⁰Di nohch-kummashaft fumm Gilead voah: da Hieser, vo's Hieseriddah kshlecht bei kumd; da Helek, vo's Helekiddah kshlecht bei kumd;

³¹da Asriel, vo's Asrieliddah kshlecht bei kumd; da Sichem, vo's Sichemiddah kshlecht bei kumd;

³²da Semida, vo's Semididdah kshlecht bei kumd; da Hepher, vo's Hepheriddah kshlecht bei kumd.

³³Em Hepher sei boo da Zelophehad hott kenn boova katt, avvah sei mayt iahra nayma voahra, Mahela, Noa, Hogla, Milka un Thirza.

³⁴Sell voahra di kshlechtah fumm Manasse, un's voahra 52,700 mennah unnich eena.

³⁵Di nohch-kummashaft fumm Ephraim, es gezayld voah bei iahra kshlechtah: da Suthelah, vo's Suthelahiddah kshlecht bei kumd; da Becher, vo's Becheriddah kshlecht bei kumd; da Thahan, vo's Thahaniddah kshlecht bei kumd.

³⁶Di nohch-kummashaft fumm Suthelah voah: da Eran, vo's Eraniddah kshlecht bei kumd.

³⁷Sell voahra di kshlechtah fumm Ephraim, un's voahra 32,500 mennah unnich eena. Di kshlechtah fumm Manasse un em Ephraim sinn awl kumma fumm Joseph sei nohch-kummashaft.

³⁸Di nohch-kummashaft fumm Benjamin, es gezayld voah bei iahra kshlechtah: da Bela, vo's Belaiddah kshlecht bei kumd; da Asbel, vo's Asbeliddah kshlecht bei kumd; da Ahiram, vo's Ahiramiddah kshlecht bei kumd;

³⁹da Supham, vo's Suphamiddah kshlecht bei kumd; da Hupham, vo's Huphamiddah kshlecht bei kumd.

⁴⁰Di nohch-kummashaft fumm Bela deich da Ard un da Naaman voahra: da Ard, vo's Ardiddah kshlecht bei kumd; da Naaman, vo's Naamaniddah kshlecht bei kumd.

⁴¹Sell voahra di kshlechtah fumm Benjamin, un's voahra 45,600 mennah unnich eena.

⁴²Di nohch-kummashaft fumm Dan, es gezayld voah bei iahra kshlechtah: da Suham, vo's Suhamiddah kshlecht bei kumd. Sell voahra di kshlechtah fumm Dan.

⁴³Awl di kshlechtah fumm Dan voahra Suhamiddah kshlechtah, un's voahra 64,400 mennah unnich eena.

⁴⁴Di nohch-kummashaft fumm Asser, es gezayld voah bei iahra kshlechtah: da Jimna, vo's Jimnaiddah kshlecht bei kumd; da Jisvi, vo's Jisviddah kshlecht bei kumd; da Beria, vo's Beriaiddah kshlecht bei kumd.

⁴⁵Di nohch-kummashaft fumm Beria voahra: da Heber, vo's Heberiddah kshlecht bei kumd; da Melchiel, vo's Melchieliddah kshlecht bei kumd.

⁴⁶Da Asser hott aw en maydel katt es Sarah kaysa hott.

⁴⁷Sell voahra di kshlechtah fumm Asser, un's voahra 53,400 mennah unnich eena.

⁴⁸Di nohch-kummashaft fumm Naphthali es gezayld voah bei iahra kshlechtah: da Jahzeel, vo's Jahzeeliddah kshlecht bei kumd; da Guni, vo's Guniddah kshlecht bei kumd;

⁴⁹da Jezer, vo's Jezeriddah kshlecht bei kumd; da Sillem, vo's Sillemiddah kshlecht bei kumd.

⁵⁰Sell voahra di kshlechtah fumm Naphthali, un's voahra 45,400 mennah unnich eena.

⁵¹Alles zammah voahra's 601,730 mennah unnich di Kinnah-Israel.

⁵²Da HAH hott no ksawt zumm Mosi,

⁵³“Es land soll ausgedayld sei zu eena fa en eahbshaft bei vi feel nayma es es sinn.

⁵⁴Zu en grohsi drubb gebb en grohsi eahbshaft, un zu en glenni drubb gebb en glenni eahbshaft. Si sella iahra eahbshaft greeya bei vi feel es es sinn funn eena.

⁵⁵Sei shuah es es land fadayld vatt bei's lohs zeeya. Si sella iahra eahbshaft greeya bei di nayma funn iahra foah-feddah iahra kshlechtah.

⁵⁶Alli eahbshaft soll gevva sei bei's lohs zeeya unnich di grohsi un glenni drubba.”

⁵⁷Dess sinn di Lefiddah es gezayld voahra bei iahra kshlechtah: da Gerson, vo's Gersoniddah kshlecht bei kumd; da Kahath, vo's Kahathiddah kshlecht bei kumd; da Merari, vo's Merariddah kshlecht bei kumd.

⁵⁸Dess voahra aw Lefiddah kshlechtah: es Libniddah kshlecht, es Hebroniddah kshlecht, es Maheliddah kshlecht, es Musiddah kshlecht, es Korahiddah kshlecht. Da Kahath voah da foah-faddah fumm Amram.

⁵⁹Da nohma fumm Amram sei fraw voah Jochebed. See voah funn di nohch-kummashaft fumm Levi un voah geboahra zu di Lefiddah in Egypta. Da Amram un di Jochebed voahra di eldahra fumm Aaron, em Mosi un di Miriam.

⁶⁰Da Aaron voah da daett fumm Nadab, Abihu, Eleasar un em Ithamar.

⁶¹Avvah da Nadab un da Abihu sinn kshtauva vo si fremd feiyah gopfaht henn fannich em HAH.

⁶²Es voahra 23,000 Lefiddah mansleit es en moonet adda drivvah ald voahra. Si voahra nett gezayld mitt di anra Kinnah-Israel veil see kenn eahbshaft grikt henn unnich di Israeliddah.

⁶³So dess voahra selli es gezayld voahra beim Mosi un em preeshtah Eleasar uf em ayvana land funn Moab am Jordan Revvah ivvah em revvah hivva funn Jericho.

⁶⁴Nett ayns funn eena voah unnich selli es da Mosi un da preeshtah Aaron gezayld katt henn vo si in di Vildahnis funn Sinai voahra.

⁶⁵Fa da HAH hott selli Israeliddah ksawt katt es si zayla shtauva in di vildahnis, un nett ayns funn eena voah ivvahrich vi yusht da Kaleb, em Jephunne sei boo, un da Joshua, em Nun sei boo.