Read Pennsylvania German 4. Mosi 33 Bible Online

4. Mosi 33 - Pennsylvania German bible

4. Mosi 33

¹Dess sinn di bletz es di Kinnah-Israel kshtobt henn uf iahra vayk aus Egypta mitt iahra greeks-leit unnich em Mosi un em Aaron.

²Da HAH hott em Mosi gebott gevva fa di bletz nunnah shreiva vo si kshtobt henn uf iahra vayk. Dess is vi si ganga sinn funn blatz zu blatz:

³Di Kinnah-Israel sinn naus kshteaht funn Raemses uf em fuftzayda dawk fumm eahshta moonet, da dawk noch Ohshtah. Si henn falossa, grawt fannich di awwa funn awl di Egyptah.

⁴Di Egyptah voahra am awl iahra eahsht-geboahrani boova fagrawva es da HAH umgebrocht katt hott unnich eena. An selli zeit hott da HAH aw iahra gettah gricht.

⁵Di Kinnah-Israel henn Raemses falossa un henn kshtobt an Sukkoth.

⁶No henn si Sukkoth falossa un henn kshtobt an Etham, es an di vildahnis nohch is.

⁷No henn si Etham falossa un sinn zrikk gedrayt zu Pihachiroth east funn Baal-Zephon, un henn kshtobt nayksht an Migdol.

⁸No henn si Pihachiroth falossa, un sinn deich da say ganga naus in di vildahnis. Si sinn drei dawk deich di Vildahnis funn Etham ganga, un henn no kshtobt an Mara.

⁹Si henn Mara falossa un sinn an Elim kumma vo zvelf shpringa un sivvatzich palma-baym voahra. Datt henn si kshtobt.

¹⁰Si henn no Elim falossa un henn kshtobt am Rohda Say.

¹¹No henn si da Roht Say falossa un henn kshtobt an di Vildahnis funn Sin.

¹²Si henn di Vildahnis funn Sin falossa un henn kshtobt an Dophka.

¹³No henn si Dophka falossa un henn kshtobt an Alus.

¹⁴Si henn no Alus falossa un henn kshtobt an Raphidim. Un's voah kenn vassah datt es di leit's drinka henn kenna.

¹⁵No henn si Raphidim falossa un henn kshtobt in di Vildahnis funn Sinai.

¹⁶Si henn no di Vildahnis funn Sinai falossa un henn kshtobt an Kibroth-Hattaavah.

¹⁷Si henn Kibroth-Hattaavah falossa un henn kshtobt an Hazeroth.

¹⁸No henn si Hazeroth falossa un henn kshtobt an Rithma.

¹⁹Si henn Rithma faloss un henn kshtobt an Rimmon-Perez.

²⁰Si henn no Rimmon-Perez falossa un henn kshtobt an Libna.

²¹No henn si Libna falossa un henn kshtobt an Rissa.

²²Si henn Rissa falossa un henn kshtobt an Kehelatha.

²³No henn si Kehelatha falossa un henn kshtobt am Berg Sepher.

²⁴Si henn da Berg Sepher falossa un henn kshtobt an Harada.

²⁵No henn si Harada falossa un henn kshtobt an Makheloth.

²⁶Si henn Makheloth falossa un henn kshtobt an Thahat.

²⁷Si henn no Thahat falossa un henn kshtobt an Tharah.

²⁸No henn si Tharah falossa un henn kshtobt an Mithka.

²⁹Si henn Mithka falossa un henn kshtobt an Hasmona.

³⁰Si henn no Hasmona falossa un henn kshtobt an Moseroth.

³¹Si henn Moseroth falossa un henn kshtobt an Bene-Jaakan.

³²No henn si Bene-Jaakan falossa un henn kshtobt an Horgidgad.

³³Si henn Horgidgad falossa un henn kshtobt an Jotbatha.

³⁴No henn si Jotbatha falossa un henn kshtobt an Abrona.

³⁵Si henn Abrona falossa un henn kshtobt an Ezeon-Geber.

³⁶No henn si Ezeon-Geber falossa un henn kshtobt an Kades in di Vildahnis funn Zin.

³⁷Si henn no Kades falossa un henn kshtobt am Berg Hor an di lein nohch fumm land Edom.

³⁸No am HAH sei gebott is da preeshtah Aaron nuff uf da Berg Hor ganga un is datt kshtauva. Dess voah da eahsht dawk fumm fimfda moonet im fatzichsht yoah noch demm es di Kinnah-Israel aus Egypta kumma sinn.

³⁹Da Aaron voah en hunnaht un drei un zvansich yoah ald vo eah kshtauva is uf em Berg Hor.

⁴⁰Da Kanaaniddish kaynich funn Arad es im sauda-land funn Kanaan gvoond hott, hott keaht es di Kinnah-Israel am kumma voahra.

⁴¹Si henn no da Berg Hor falossa un henn kshtobt an Zalmona.

⁴²No henn si Zalmona falossa un henn kshtobt an Phunon.

⁴³Si henn Phunon falossa un henn kshtobt an Oboth.

⁴⁴No henn si Oboth falossa un henn kshtobt an Iye-Abarim, an di lein nohch fumm land Moab.

⁴⁵No henn si Iyim falossa un henn kshtobt an Dibon-Gad.

⁴⁶Si henn no Dibon-Gad falossa un henn kshtobt an Almon-Diblathaim.

⁴⁷No henn si Almon-Diblathaim falossa un henn kshtobt in di berga funn Abarim, nayksht an Nebo.

⁴⁸Si henn no di berga funn Abarim falossa un henn kshtobt uf em ayvana funn Moab am Jordan ivvah da revvah funn Jericho.

⁴⁹Si henn iahra camp ufkokt am Jordan Revvah nohch funn Beth-Jesimoth biss an Abel-Sittim uf em ayvana land in Moab.

⁵⁰Datt im ayvana land in Moab am Jordan ivvah da revvah funn Jericho hott da HAH ksawt zumm Mosi,

⁵¹“Shvetz zu di Kinnah-Israel un sawk eena: ‘Vann diah ivvah da Jordan nivvah gaynd in's land Kanaan,

⁵²dann sellet diah awl di leit im land ausdreiva fannich eich. Diah misset awl iahra abgettah-gleichnisa un gegossani gleichnisa fabrecha un awl iahra hohchi-bletz zammah reisa.

⁵³Nemmet's land ivvah un zeeyet nei, fa ich habb's land zu eich gevva fa's aykna.

⁵⁴Diah sellet's land ausdayla deich's lohs unnich eiyah kshlechtah. En grohs shtamm soll en grohsi eahbshaft greeya, un en glay kshlecht en glenni. Vass-evvah es zu eena fald deich's lohs soll iahra sei. Daylet's aus noch di shtamma funn eiyah feddah.

⁵⁵Avvah vann diah di leit fumm land nett ausdreivet, selli es diah ivvahrich losset vadda danna in eiyah awwa un shtachla in eiyah seida. Si gevva eich druvvel datt im land vo diah voonet.

⁵⁶Un no doon ich zu eich vass ich im sinn habb fa du zu eena.’”