Read Pennsylvania German 4. Mosi 6 Bible Online

4. Mosi 6 - Pennsylvania German bible

4. Mosi 6

¹Da HAH hott ksawt zumm Mosi,

²“Shvetz zu di Kinnah-Israel un sawk zu eena: ‘Vann en mann adda en veibsmensh sich en fashprechnis macht fa en Nazaraynah vadda, un en fashprechnis macht fa sich heilich halda fannich em HAH,

³dann dauf eah adda see kenn vei adda shteik drinkes drinka, un aw kenn essich es gmacht is funn vei adda annah shteik drinkes. Si daufa kenn bree es gmacht is funn drauva drinka adda drauva un reseina essa.

⁴So lang es si en Nazaraynah sinn, daufa si nix essa es gmacht is fumm vei-shtokk, kenn sohma adda shawla.

⁵Diveil es si sich fashvoahra henn fa en Nazaraynah sei, dann dauf kenn shayf-messah uf iahra kebb kumma. Si missa heilich sei biss di zeit ivvah is es si Nazaraynah sinn, un missa di hoah uf iahra kebb vaxa lossa.

⁶Deich di gans zeit es si heilich sinn fannich em HAH daufa si nett nayksht zu ebbah dohdes gay.

⁷Even vann iahra daett, maemm, broodah adda shveshtah shteahbt, dann daufa si sich nett unrein macha deich si, veil sell vass si heilich veist zu Gott, is uf iahra kebb.

⁸Deich di gans zeit es si dee fashprechnis gmacht henn sinn si heilich zumm HAH.

⁹Vann ebbah bletzlich un unfahoft shteahbt bei eena, un iahra kebb unrein vadda, dann sella si iahra kebb shayfa sivva dawk shpaydah vann si viddah rein vadda.

¹⁰No uf em achta dawk missa si zvay daddel-dauva adda zvay anri yungi dauva zumm preeshtah bringa am doah fumm tempel-tent.

¹¹Da preeshtah soll ayni opfahra es en sind-opfah un di annah es en brand-opfah veil si ksindicht henn deich ebbah dohdes. Sellah dawk sella si iahra kebb viddah heilich macha.

¹²Si missa sich viddah heilich macha zumm HAH fa di gans zeit es si en fashprechnis gmacht katt henn difoah un missa en yoah ald lamm bringa fa en shuld-opfah. Di eahshta dawwa es si sich heilich gmacht katt henn doon nimmi zayla, veil si unrein vadda sinn deich di zeit funn iahra fashprechnis.

¹³Dess is es ksetz fa da Nazaraynah vann sei zeit funn fashprechnis moll ivvah is. Eah soll an's doah fumm tempel-tent gebrocht sei.

¹⁴Datt soll eah sei opfahra gevva zumm HAH: en yoah ald shohf-bekli unni faylah fa en brand-opfah, en yoah ald shohf unni faylah fa en sind-opfah un en gvaxanah shohf-bokk unni faylah fa en dank-opfah,

¹⁵un en koahb mitt unksavvahdi kucha gmacht funn fei mayl un ayl, unksavvahdi panna-kucha kshmiaht mitt ayl un aw shpeis un drink-opfahra.

¹⁶Da preeshtah soll dee opfahra fannich da HAH bringa un soll sei sind-opfah un brand-opfah macha.

¹⁷Eah soll aw da shohf-bokk opfahra fa en dank-opfah zumm HAH, mitt em koahb funn unksavvahdi kucha un di shpeis un drink-opfahra.

¹⁸Da Nazaraynah soll no am doah fumm tempel-tent sei hoah abshayfa es eah heilich gmacht hott. No soll eah di hoah nemma un si in's feiyah du es unnich em dank-opfah brend.

¹⁹Noch demm es da Nazaraynah sei hoah abkshayft hott es eah heilich gmacht hott, dann soll da preeshtah en gekochtah shuldah fumm shohf-bokk in sei hend du mitt en unksavvahdah kucha un panna-kucha aus em koahb.

²⁰Da preeshtah soll si no shvinga fannich em HAH fa en shving-opfah. Dee daylah sinn heilich un heahra zumm preeshtah un aw di brusht es gopfaht voah bei shvinga un di hift es nuff kohva voah. Noch sellem dauf da Nazaraynah vei drinka.

²¹Dess is es ksetz fumm Nazaraynah es en fashprechnis-opfah macht zumm HAH fa sich rein macha, nayvich ennich ebbes shunsht es eah gevva kann. Vi eah fashprocha hott, so muss eah du fa's ksetz fumm Nazaraynah halda.’”

²²Da HAH hott ksawt zumm Mosi,

²³“Sawk zumm Aaron un sei boova, ‘Dess is vi diah di Kinnah-Israel saykna sellet. Sawwet zu eena:

²⁴“Da HAH soll dich saykna un dich heeda;

²⁵da HAH soll sei ksicht macha uf dich sheina un gnaydich sei zu diah;

²⁶da HAH soll sei ksicht zu diah drayya un diah fridda gevva.”’

²⁷So sella si mei nohma uf di Kinnah-Israel du, un ich zayl si saykna.”