Read Pennsylvania German 4. Mosi 8 Bible Online

4. Mosi 8 - Pennsylvania German bible

4. Mosi 8

¹Da HAH hott ksawt zumm Mosi,

²“Shvetz zumm Aaron un sawk eem, ‘Vann du di sivva lichtah ufhoksht, sella si helling macha fannich em lichtah-shtaend.’”

³Da Aaron hott no sell gedu. Eah hott di lichtah ufkokt so es si fassich ksheind henn uf em lichtah-shtaend, grawt vi da HAH em Mosi ksawt hott.

⁴Nau dess is vi da lichtah-shtaend gmacht voah: Eah voah gmacht funn kemmaht gold fumm foos biss an sei blumma. Da lichtah-shtaend voah gmacht grawt vi da HAH em Mosi gvissa katt hott.

⁵Da HAH hott viddah ksawt zumm Mosi,

⁶“Nemm di Lefiddah raus aus di Kinnah-Israel un mach si rein.

⁷Dess is vass du du solsht zu eena fa si rein macha: Shpritz si mitt reinich vassah. Un si sella di hoah absheahra funn iahra gans leib un iahra glaydah vesha. No sinn si rein.

⁸No loss si en yungah bull nemma mitt sei shpeis-opfah funn fei mayl gmixt mitt ayl. Un du solsht noch en yungah bull nemma fa en sind-opfah.

⁹Bring di Lefiddah fannich da tempel-tent, un bring di gans fasamling funn di Kinnah-Israel zammah.

¹⁰Bring di Lefiddah fannich da HAH, un di Kinnah-Israel sella iahra hend uf si layya.

¹¹Da Aaron soll di Lefiddah fannich da HAH bringa es en shving-opfah funn di Kinnah-Israel. Dess is so es si da deensht fumm HAH faseiya kenna.

¹²Di Lefiddah sella no iahra hend uf di kebb funn di bulla du, aynah is fa en sind-opfah un da annah is fa en brand-opfah fa di Lefiddah iahra sinda vekk nemma.

¹³No mach di Lefiddah fannich da Aaron un sei boova shtay, un gebb si zumm HAH es en shving-opfah.

¹⁴In sellah vayk dusht du di Lefiddah raus aus di anra Kinnah-Israel setza; di Lefiddah sella mei sei.

¹⁵Vann du di Lefiddah moll rein gmacht hosht un si gevva hosht es en shving-opfah, dann sella si kumma un iahra eahvet du im tempel-tent.

¹⁶Si sinn di Israeliddah es gans ivvah-gevva sei sella zu miah. Ich habb si gnumma in blatz fumm eahsht-geboahrana fumm leib, da eahsht-geboahra boo funn awl di Kinnah-Israel.

¹⁷Alli eahsht-geboahranah in Israel is mei, eb's en mann is adda en diah. Ich habb si raus ksetzt fa mei sei vo ich awl di eahsht-geboahrana boova in Egypta umgebrocht habb.

¹⁸Ich habb di Lefiddah gnumma in blatz funn awl di eahsht-geboahrana boova in Israel.

¹⁹Ich habb di Lefiddah gevva es en kshenk zumm Aaron un sei boova aus di Kinnah-Israel. Si sella da deensht ausfiahra fa di Kinnah-Israel am fasamling-tent, un sella's recht macha mitt Gott fa si, so es kenn grankheit ausbrecht unnich di Kinnah-Israel vann si nayksht an da tempel-tent kumma.”

²⁰Da Mosi, da Aaron un di gans Israeliddah fasamling henn gedu mitt di Lefiddah grawt vi da HAH em Mosi ksawt hott.

²¹Di Lefiddah henn sich rein gmacht un henn iahra glaydah gvesha. No hott da Aaron si fannich da HAH gedu es en shving-opfah, un hott gmacht es si recht shtayn mitt eem fa si rein macha.

²²Noch sellem sinn di Lefiddah kumma fa iahra eahvet du am tempel-tent unnich em Aaron un sei boova; si henn gedu grawt vi da HAH da Mosi gebodda hott veyyich di Lefiddah.

²³Da HAH hott ksawt zumm Mosi,

²⁴“Dess is vass zu du hott mitt di Lefiddah: Mennah es fimf un zvansich yoah adda eldah sinn sella zumm deensht kumma un iahra eahvet ausdrawwa im tempel-tent.

²⁵Avvah vann si moll fuftzich yoah ald sinn missa si ufheahra shaffa in iahra deensht.

²⁶Si kenna iahra breedah helfa iahra deensht ausdrawwa im tempel-tent avvah si selvaht daufa di eahvet nett du. So solsht du di eahvet gevva zu di Lefiddah, so es si iahra deensht ausdrawwa kenna.”