Read Pennsylvania German 4. Mosi 9 Bible Online

4. Mosi 9 - Pennsylvania German bible

4. Mosi 9

¹Im eahshta moonet fumm zvedda yoah noch demm es si aus Egypta kumma sinn, hott da HAH kshvetzt zumm Mosi in di Vildahnis funn Sinai. Eah hott ksawt,

²“Loss di Kinnah-Israel's Passa-Fesht halda an di zeit es kfoddaht is.

³Haldet's an di recht zeit, ohvets an dushbah uf em fatzayda dawk funn demm moonet. Haldet's grawt vi awl di gebodda un adnunga ausglaykt sinn.”

⁴So hott da Mosi di Kinnah-Israel ksawt fa's Passa-Fesht halda.

⁵Un si henn's Passa-Fesht kalda in di Vildahnis funn Sinai ohvets an dushbah uf em fatzayda dawk fumm eahshta moonet. Si henn alles gedu grawt vi da HAH da Mosi gebodda hott.

⁶Avvah edlichi mennah henn's Passa-Fesht nett halda kenna uf sellah dawk veil si unrein voahra funn en dohdah mensh ohrayya. So sinn si zumm Mosi un em Aaron kumma sellah dawk,

⁷un henn ksawt zumm Mosi: “Miah sinn unrein deich en dohdah mensh ohrayya, avvah favass sedda miah zrikk kalda sei funn unsah kshenk zumm HAH opfahra mitt di anra Kinnah-Israel an di recht zeit?”

⁸Da Mosi hott no ksawt zu eena, “Voahdet biss ich ausfinn fumm HAH vass sei gebodda sinn veyyich eich.”

⁹No hott da HAH ksawt zumm Mosi,

¹⁰“Sawk di Kinnah-Israel: ‘Vann ennich's funn eich adda eiyah nohch-kummashaft unrein sinn deich en dohdah mensh ohrayya, adda nett dihaym sinn an di zeit fumm Passa-Fesht, dann daufa si alsnoch's Passa-Fesht halda.

¹¹Si missa's halda im zvedda moonet uf em fatzayda dawk ohvets an dushbah. Si missa's lamm essa mitt unksavvaht-broht un biddahri greidah.

¹²Si daufa nix ivvahrich lossa biss da neksht meiya un aw kens funn di gnocha fabrecha. Vann si's Passa-Fesht halda, dann missa si awl di adninga halda.

¹³Avvah vann en mann rein is un nett eiyets fatt is, un dutt doch's Passa-Fesht nett halda, dann soll eah abkshnidda sei funn sei leit. Dess is veil eah nett em HAH sei opfah gopfaht hott an di recht zeit. Sellah mann soll sei sind drawwa.

¹⁴Vann en ausahrah es unnich eich voond em HAH sei Passa-Fesht halda vill, dann muss eah's du grawt vi di gebodda un adnunga ausglaykt sinn. Diah sellet yusht ay adning havva fa eich un fa di ausahra.’”

¹⁵Uf da dawk es da tempel-tent ufkokt voah, is di volk ivvah da tent kumma, sell is da Zeiknis-Tent. Funn ohvets biss meiyets is di volk es gegukt hott vi feiyah ovvich em tempel-tent geblivva.

¹⁶Sell is vi's geblivva is, di volk voah ovva drivvah deich da dawk, un nachts hott see gegukt vi feiyah.

¹⁷Vann di volk ufkohva voah fumm tempel-tent, sinn di Kinnah-Israel uf un sinn nohch ganga, un vann di volk eiyets runnah kumma is, datt henn si sich viddah ufkokt.

¹⁸Am HAH sei gebott sinn di Kinnah-Israel naus gezowwa, un an sei gebott henn si kshtobt un viddah ufkokt. So lang es di volk ivvah da tempel-tent voah, sinn si datt geblivva.

¹⁹Vann di volk en langi zeit ivvah da tempel-tent geblivva is, dann henn di Kinnah-Israel em HAH sei gebott kalda un sinn nett vekk gezowwa.

²⁰Alsamohl is di volk yusht poah dawk ivvah da tempel-tent geblivva, un am HAH sei gebott henn si datt ufkokt, no an sei gebott sinn si viddah on gezowwa.

²¹Alsamohl is di volk yusht funn ohvets biss meiyets geblivva, un vann di volk ufkohva voah meiyets, sinn si nohch gezowwa. Eb's dawk adda nacht voah, vann di volk ufkohva voah, sinn si nohch ganga.

²²Eb di volk ivvah da tempel-tent geblivva is fa zvay dawk, en moonet adda en gans yoah, dann sinn di Kinnah-Israel datt geblivva un sinn nett vekk gezowwa. Avvah vann di volk ufkohva voah, sinn si nohch gezowwa.

²³Am HAH sei gebott, henn si kshtobt un ufkokt, un am HAH sei gebott sinn si viddah gezowwa. Si henn em HAH keicht deich em HAH sei gebott zumm Mosi.