Read Pennsylvania German Micha 5 Bible Online

Micha 5 - Pennsylvania German bible

Micha 5

¹Nau geddah dei greeks-gnechta zammah, du dochtah funn Zion; si henn uns umringd. Mitt en root shlauwa si da richtah funn Israel uf da bakka.

²“Avvah du, Bethlehem Ephratha, du bisht glay unnich di shtett fumm land Juda, doch aus diah zayld aynah raus kumma fa mich es Israel roola zayld. Sei ausgang voah funn vay zrikk, funn zrikk in di ayvichkeit.”

³Fasell zayld eah Israel ufgevva zu iahra feinda, biss di fraw es am en kind havva is, iahra kind hott. No zayla di ivvahricha funn sei breedah viddah zrikk zu di Kinnah-Israel kumma.

⁴Eah zayld uf shtay un sei leit fiahra in di graft fumm HAH, in di macht fumm nohma fumm HAH, sei Gott. No zayla si aus di kfoah layva, veil eah hohch gacht sei zayld biss an's end funn di eaht.

⁵Eah zayld fridda bringa. An di zeit es di leit funn Assyria in unsah land kumma fa greek macha, un brecha in unsah heisah nei, dann shtella miah sivva heedah uf geyyich si, even acht evvahshti foah-gengah funn di mennah.

⁶Si zayla's land funn Assyria roola mitt em shvatt, es land fumm Nimrod mitt em shvatt in di hand. Eah zayld uns frei macha fumm land Assyria, vann si kumma unsah land fechta, un in unsah land nei kumma.

⁷No zayla selli es ivvahrich sinn fumm Jakob naus unnich feel leit kshtroit sei, vi da dau fumm HAH, un vi da reyyah uf em graws, da reyyah es nett voaht fa ennich ebbah, es nett voaht uf di mensha.

⁸Selli es ivvahrich sinn aus em Jakob zayla unnich di heida kshtroit sei, unnich feel leit vi en layb unnich di diahra fumm bush, vi da yung layb unnich di shohf-drubba es si famawld un fareist vi eah gayt, un es nimmand shtobba kann.

⁹Dei hand zayld uf kohva sei geyyich selli es geyyich dich sinn, awl dei feinda vadda abkshnidda.

¹⁰“In sellah dawk,” sawkt da HAH, “zayl ich awl eiyah geil doht macha unnich eich, un awl eiyah greeks-veyya fabrecha.

¹¹Ich zayl di shtett funn eiyah land nunnah reisa, un awl eiyah shteiki vanda nunnah brecha.

¹²Ich zayl eiyah zaubahrei shtobba, un diah zaylet kenn zaycha foah-sawwah may havva.

¹³Ich zayl di abgott-gleichnisa es diah gmacht hend, un eiyah shtay-poshta nunnah reisa unnich eich. Dess is so es diah eich nimmi nunnah gneeya kennet zu selli sacha es eiyah hend gmacht henn.

¹⁴Ich reis di Ashera-poshta aus em bodda es unnich eich sinn, un reis eiyah shtett nunnah.

¹⁵In mei haysah zann zayl ich awl selli heida shtrohfa es miah nett keicht henn.”