Read Pennsylvania German Nahum 2 Bible Online

Nahum 2 - Pennsylvania German bible

Nahum 2

¹Sellah es ausnannah shtroit is am geyyich dich kumma, shtell dich geyyich een am greeks-haus, vatshet da vayk, machet eich shteik, yooset awl eiyah grefta.

²(Da HAH zayld di hallichkeit fumm Jakob zrikk bringa, vi di hallichkeit funn Israel, even vann di feinda si faveesht henn, un iahra vei-shtekk fadauva henn.)

³Di shields funn di shteiki mennah sinn roht; di greeks-gnechta iahra glaydah sinn roht. Es shtawl uf di greeks-veyya glitzaht, vann si grisht sinn fa fassich gay; iahra holsichi shpiahs sinn grisht fa fechta.

⁴Di greeks-veyya rabla deich di shtrohsa, un yawwa zrikk un faddi uf em vayk. Si gukka vi en feiyahrichi flamm, si gayn zrikk un faddi vi gviddah.

⁵Di hauptmennah vadda bei groofa, si shtolbahra vi si gayn. Si dumla sich nuff an di shtatt vand, un doon's shield ovvich di blekk es di vand nunnah renna.

⁶Di revvah vassah-deahra vadda uf gmacht, un di leit im kaynich-haus sinn fagelshtaht.

⁷Di kaynich-fraw vatt kfanga un vekk gnumma, iahra mawda yammahra vi en daub, un si shlauwa uf iahra brisht.

⁸Nineveh is vi en vassah-loch, un iahra vassah is am fatt lawfa. “Shtobbet, shtobbet,” Roofa si, avvah nimmand drayt zrikk.

⁹Gaynd fa's silvah! Nemmet's gold! Es is kenn end zumm keshtlich sach, alli sadda sach fa em reich macha.

¹⁰Di shtatt is grawbt un leah gmacht! Hatza shmelsa un gnee globba zammah, si ziddahra, un iahra ksichtah vadda blayich.

¹¹Vo is nau da blatz es da layb bleibt, sellah blatz es si di yunga kfeedaht henn, vo da faddah un di muddah-layb anna ganga sinn mitt iahra yungi, un henn sich nett feicha braucha?

¹²Da layb hott genunk diahra doht gmacht fa sei yungi, un hott diahra fashtikt fa di muddah-layb. Sei voon-blatz voah ufkfild mitt dohdi diahra, un sei lechah mitt farissa flaysh.

¹³“Ich binn geyyich dich,” sawkt da Awlmechtich HAH. “Ich zayl dei greeks-veyya ufbrenna in shmohk, un's shvatt zayld dei yungi layb fressa. Ich loss nix uf di eaht fa dich zu fressa. Di shtimma funn dei botshaftah vadda nimmi keaht.”