Read Pennsylvania German Nahum 3 Bible Online

Nahum 3 - Pennsylvania German bible

Nahum 3

¹Vay zu di shtatt funn bloot, foll mitt leeya, foll mitt kshtohla shtoft, un foll keshtlich sach fa gnumma sei bei dei feinda.

²Di yacht funn di fitz, di yacht funn reddah am glebbahra, geil am da jumb gay, un di greeks-veyya am yawwa!

³Leit uf geil am fassich shpringa, mitt sheinichi shvadda, un glitzahrichi shpiahra! Feel kshlauwani uf em bodda, heifa funn dohdi, dohdi leit unni end, un leit am shtolbahra ivvah di dohda.

⁴Di huah Nineveh is am kshtrohft vadda, di shay huah es zaubahrei gedrivva hott, un hott anri lendah gebunna mitt iahra huahrahrei, un anri leit gnechta gmacht mitt iahra zaubahrei.

⁵“Ich binn geyyich dich,” sawkt da Awlmechtich HAH. “Ich zayl dei rokk uf hayva ivvah dei ksicht. Ich veis di heida dei nakkichheit, un di kaynich-reicha dei shohm.

⁶Ich shmeis drekk uf dich un mach dich grausam. Ich mach dich en fashtelling fannich leit.

⁷Alli-ebbah es dich saynd zayld sich zrikk zeeya; si sawwa, ‘Nineveh is fadauva, veah hott mitt-leides mitt iahra?’ Vo soll ich ebbah finna fa dich drayshta?”

⁸Bisht du bessah es di shtatt No-Amon, dee es am Nile Revvah noch is, mitt vassah um sich rumm? Da revvah voah iahra shield, un's vassah iahra vand.

⁹Ethiopia un Egypta voahra iahra grohsi macht, Put un Libya voahra iahra hilf.

¹⁰Avvah doch is see kfanga vadda, un is ausgedrivva vadda. An alli shtrohs-ekk, voahra iahra kinnah doht kshlauwa. Es lohs voah gezowwa fa sayna veah iahra hohch-gachti mennah grikt, un iahra gvaldichi mennah voahra gebunna mitt kedda.

¹¹Nineveh, du zaylsht aw ksoffa vadda, un zaylsht dich fashtekla. Du zaylsht sucha fa en blatz es dei feinda dich nett finna kenna.

¹²Awl dei feshti shtett sinn vi feiya-baym, es zeidichi feiya henn; vann si kshiddeld vadda, falla si in's maul funn demm es si est.

¹³Gukk moll dei greeks-leit; si sinn awl vi veibsleit! Di doahra zu eiyah land sinn grohs uf zu eiyah feinda. Di rikkel ivvah di doahra sinn fabrend mitt feiyah.

¹⁴Shtoahret vassah, fa diah vaddet eikshpatt, fashteiket eiyah vanda! Shaffet da clay un machet mortar-mud, layyet di bakka-shtay ivvah vo di vand fabrocha is.

¹⁵Es feiyah zayld dich fressa datt; es shvatt zayld dich nunnah shneida, un dich uf fressa vi hoi-shrekka. Du hosht dich fameaht vi hoi-shrekka un locusts!

¹⁶Dei leit sinn feel kawfah un fakawfah vadda, biss si may sinn es di shtanna im himmel. Avvah vi locusts doon si's land butza, un fleeya no vekk.

¹⁷Dei greeks-gnechta sinn vi locusts, un dei foah-gengah vi locusts am shvoahma es uf di vand hokka uf en kaldah dawk. Avvah vann di sunn raus kumd dann fleeya si fatt, un nimmand vayst vo si sinn.

¹⁸Dei shohf-heedah sinn am shlohfa, oh kaynich funn Assyria, dei feddahshti sinn am roowa. Dei leit sinn fashtroit ivvah di berga, un's is nimmand fa si zammah bringa.

¹⁹Nix kann dich hayla vo du vay gedu bisht, du kansht nett kayld sei. Alli-ebbah heaht veyyich diah, un shlakt sei hend zammah mitt frayt, fa veah hott nett dei ayvichah unfashtand deich macha missa?