Read Pennsylvania German Habakuk 1 Bible Online

Habakuk 1 - Pennsylvania German bible

Habakuk 1

¹Dess is es vatt es gevva voah zumm brofayt Habakuk.

²Vi lang muss ich roofa fa hilf, oh HAH, un du heichsht mich nett ab? Ich roof zu diah, “Si doon uns vay,” avvah du helfsht uns nett.

³Favass machsht du mich deah druvvel sayna? Favass dusht du dess letza gay lossa? Fadauves un nunnah-dreddes sinn fannich miah, shtreit un en gezah sinn ivvahrawlich.

⁴Fasell is es ksetz fa'acht, un di leit iahra recht nee nett ufkohva. Di gottlohsa fensa di gerechta ei, un iahra recht vatt fadrayt.

⁵“Gukk moll an di heida un vatsh! Un sei folshtendich fashtaund! Fa ich zayl ebbes du in dei dawwa es du nett glawva zaylsht, even vann's diah ksawt vatt.

⁶Nau gukk moll, ich binn am di Chaldayah ufvekka, selli unfashtendicha un ungeduldicha leit, dee es am ivvah di gans eaht gay sinn, un am lendah ivvah-nemma es nett iahra sinn.

⁷Si sinn en grausam un shreklich folk, si doon vi si vella un shaffa yusht fa sich selvaht.

⁸Iahra geil gayn shteikah es leopards, un sinn rawsichah es velf am dushbah. Iahra geil-reidah kumma shteik, si kumma funn veit ab; si fleeya vi en awdlah am runnah kumma fa fressa.

⁹Si kumma awl fa fechta un doht macha. Iahra grohsi drubba kumma vi da vind, un fanga leit vi da sand in di vildahnis.

¹⁰Si fashpodda kaynicha, un lacha ivvah roolahs. Si lacha ivvah awl di zu gvanda shtett, si bauwa da grund uf an di vand nohch, gayn nuff un fanga di leit.

¹¹No gayn si on fabei vi da vind; si zayla shuldich kohva sei, si macha iahra graft iahra gott.”

¹²Oh HAH, bisht du nett funn ayvichkeit heah? Mei Gott, mei Heilichah, hald uns funn shtauva. Oh HAH, du hosht si ufketzt fa uns richta; oh, unsah Felsa, du hosht si groofa fa uns shtrohfa.

¹³Dei awwa sinn zu rein es du evil nett ohgukka kansht, un du kansht's nett shtenda fa leit sayna letz du. Favass alawbsht du dee shlichticha leit gay? Favass bisht du shtill vann di gottlohsa selli ufshlukka es may gerecht sinn es si?

¹⁴Du hosht leit gmacht vi fish im say, vi gradlichi say-diahra es kenn roolah henn.

¹⁵Di Chaldayah zeeya si awl ruff mitt en hohka, si shlayfa si vekk mitt iahra net, si geddahra si zammah in iahra fish-net; no froiya si sich un sinn froh.

¹⁶Fasell macha si en opfah zu iahra net; si brenna insens zu iahra net, veil si reichlich layva deich iahra net, un essa's besht ess-sach.

¹⁷Zayla si ohhalda iahra net ausleahra, un unni bamhatzichkeit anri lendah doht macha?