Read Pennsylvania German Habakuk 2 Bible Online

Habakuk 2 - Pennsylvania German bible

Habakuk 2

¹Ich nemm mei blatz am vatsha, un graddel nuff uf da vatsh-tavvah; ich voaht fa sayna vass eah sawkt zu miah, un vass mei andvat zu eem sei soll veyyich sei glawk zu miah.

²No hott da HAH dess andvat gevva: “Shreib anna vass du ksenna hosht un mach's playn uf babiah so es sellah vo's drawkt, es laysa kann.

³Fa di vision es du ksenna hosht is fa shpaydah naus, dess shvetzt veyyich di end-zeit, un zayld nett letz sei. Even vann's lang gayt, voaht difoah, es zayld fashuah blatz nemma, un zayld nett shpoht sei.

⁴Gukk moll, sellah es shtols is, is nett recht in sei sayl; avvah da gerecht zayld layva bei seim glawva.

⁵Un veidah, vei drinkes dutt da shtols mann fafiahra, so es eah shtols un unruich is. Eah is greedich vi's grawb, un vi da doht, is nee nett zufridda. Eah sammeld awl di heida zu sich selvaht, un geddaht awl di leit zu sich.

⁶Zayla nett awl dee leit een fashpodda un sawwa, ‘Vay zu eem es kshtohla shtoft uf heifeld un macht sich reich bei geld naus layna! Vi lang zayld dess on gay?’

⁷Zayla nett dei layns-leit bletzlich ufshtay geyyich dich? Zayla si nett ufvekka un dich ziddahra macha? No zayla si dich rawva.

⁸Veil du feel lendah grawbt hosht, dann zaylsht du grawbt sei bei di leit es ivvahrich sinn. Fa du hosht mensha-bloot fagossa, un awl di lendah, shtett un leit faveesht un umgebrocht.

⁹Vay zu eem es sei haus baut mitt uneahlich geld, un dutt sei nesht in di hay, fa's sayf halda funn di kfoah.

¹⁰Du hosht feel leit unnah gay gmacht, un hosht dei ayya haus fashohmd, un deich dess hosht ksindicht geyyich dich selvaht.

¹¹Di shtay in di vand roofa naus, un di balka un's hols zayla andvat gevva.

¹²Vay zu eem es en shtatt baut mitt fagossa bloot, un di shtatt shteik macht bei rawva!

¹³Is es nett fumm Awlmechticha HAH es leit iahra eahvet nuff gayt in flamm, un di heida sich meet macha fa nix?

¹⁴Fa di eaht zayld foll sei mitt di eisicht fumm HAH sei hallichkeit, so vi di vassahra da say zu dekka.

¹⁵Vay zu eem es sei nochbahra drinka macht, un leaht fumm gifticha kobli biss si ksoffa sinn, so es eah si no nakkich sayna kann.

¹⁶Du zaylsht foll sei mitt shohm in blatz funn hallichkeit. So drink du nau un veis dei nakkichheit! Es kobli im HAH sei rechtsi hand kumd rumm zu diah, un shohm zayld dei hallichkeit zu dekka.

¹⁷Es veesht sach es du gedu hosht zu Lebanon zayld ivvah dich kumma, un es du di diahra doht gmacht hosht zayld dich fagelshtahra. Fa du hosht mensha-bloot fagossa, un hosht di lendah un shtett fadauva, un awl di leit es drinn voahra.

¹⁸Vass goot is en gleichnis, siddah es en mensh es gmacht hott? Adda en gegossa gleichnis es yusht leeya land zu leit? Fa deah es es macht, draut in sei aykni eahvet, vann eah gleichnisa macht es nett shvetza kenna.

¹⁹Vay zu eem es sawkt zumm hols, ‘Vekk uf!’ Adda zu en dohdah shtay, ‘Shtay uf!’ Kann sell ding roht gevva? Es is ivvah-gezowwa mitt gold un silvah; es hott kenn ohften.

²⁰Avvah da HAH is in seim heilicha tempel; loss di gans eaht shtill sei fannich eem.”