Read Pennsylvania German Habakuk 3 Bible Online

Habakuk 3 - Pennsylvania German bible

Habakuk 3

¹En gebayt fumm brofayt Habakuk fa di unshuldicha.

²HAH, ich habb keaht vi hohch ohksenna es du bisht; un di verka es du dusht macha es ich mich feich, oh HAH. Du si viddah in unsah dawk, in unsah dawk loss si vissa gmacht sei, in dei zann, fagess nett bamhatzichkeit.

³Gott is funn Theman kumma, un Sellah es Heilich is fumm Berg Pharan. (Sela) Sei hallichkeit fild di himla, un sei lohb fild di eaht.

⁴Sei glanz voah vi di sunn am uf kumma, licht shtrawla sinn funn sei hand ganga, datt voah sei graft fashtekkeld.

⁵Peshtelens is fannich eem heah ganga, un dohdes-grankheit is hinnich eem nohch kumma.

⁶Eah is kshtanna, un hott di eaht kshiddeld, eah hott gegukt, un hott di heida gmacht ziddahra. Di ayvicha berga sinn fabrocha, un di alda hivla sinn zammah kfalla. Sei vayya sinn ayvich.

⁷Ich habb di tents funn Kushan in noht ksenna, un di leit funn Midian henn geziddaht.

⁸Voahsht du bays mitt di revvahra, oh HAH? Voah dei zann geyyich di grikka? Voahsht du zannich mitt em say vo du dei geil gridda hosht, uf dei greeks-veyya es ivvah-gnumma henn?

⁹Du hosht dei bow grisht, un dich grisht fa dei arrows sheesa. (Sela) Du hosht di eaht kshpalda mitt revvahra.

¹⁰Di berga henn dich ksenna, un henn kshiddeld. Es hohch vassah is fabei gloffa; es deef vassah hott grohsi yacht gmacht, un iahra vella voahra hohch.

¹¹Di sunn un da moon im himmel henn shtill kshtanna, fumm glanz funn dei arrows am fleeya, fumm licht funn dei glitzahrichah shpiah.

¹²In dei haysah zann bisht du ivvah di eaht gloffa, un voahsht veesht bays vi du di heida fashtambt hosht.

¹³Du bisht kumma fa dei leit frei setza, fa dei ksalbdah raus helfa. Du hosht da foah-gengah fumm gottlohsa haus kshlauwa, un hosht een uf kshpalda funn di hifta biss an da hals. (Sela)

¹⁴Du hosht een in da kobb kshtocha mitt sei ayknah shpiah, vo sei greeks-gnechta raus kshprunga sinn fa uns ausnannah shtroiya. Si henn sich kfroit vi si kumma sinn fa di aylendicha fressa es am sich fashtekla voahra.

¹⁵Du hosht da say uf kshtatt mitt dei geil, un hosht grohsi vella gmacht im vassah.

¹⁶Ich habb dess keaht un mei hatz hott geglobt, mei leftz henn geziddaht funn di yacht; mei gnocha sinn faul gedrayt, un mei bay henn kshiddeld. Ich voaht geduldich fa da dawk es dreebsawl uf di leit kumd es geyyich uns shtreida.

¹⁷Even vann da feiya-bohm nett ausshlakt, un di vei-shtekk kenn frucht henn, even vann di ayl-baym kenn ayl gevva un di feldah kenn ess-sach gevva, even vann kenn shohf in di penn sinn un kenn fee in di shtell,

¹⁸doch zayl ich mich froiya deich da HAH, un zayl fraylich sei in Gott mei Frei-Shtellah.

¹⁹Gott da HAH is mei graft; eah macht mei fees vi hasha fees, un fiaht mich ivvah hohchi bletz. Zumm foah-singah. Fa kshpeeld sei mitt harfa.