Read Pennsylvania German Zephania 2 Bible Online

Zephania 2 - Pennsylvania German bible

Zephania 2

¹Fasamlet eich, fasamlet eich, diah folk unni shohm,

²eb selli zeit voah kumd, un diah vaddet fatt geblohsa vi shprau, eb em HAH sei gleedichah zann uf eich kumd, eb da dawk fumm HAH sei zann uf eich kumd.

³Suchet fa da HAH, diah daymeedichi im land, diah es sei gebodda haldet. Suchet gerechtichkeit, suchet daymoot, fleicht vaddet diah fafayld uf da dawk fumm HAH sei zann.

⁴Di shtatt Gaza vatt falossa, un di shtatt Askalon vatt faveesht. Middawks vadda di leit aus di shtatt Asdod gedrivva un di shtatt Ekron vatt ufgvatzeld.

⁵Vay zu selli es am say nohch voona, zu di Krethiddah leit! Em HAH sei vatt is geyyich eich Oh Kanaan, es land funn di Philishtah. “Ich zayl dich umbringa biss nimmand may ivvahrich is.”

⁶Es land am say nohch vatt vayt-feldah, en blatz fa shohf-heedah un shohf-penna.

⁷Es zayld zu di ivvahricha fumm Haus funn Juda heahra; datt zayla si vayt finna. Ohvets zayla si sich anna layya in di heisah funn Askalon. Da HAH zayld acht gevva uf si, un zayld si viddah frei macha.

⁸“Ich habb's shpoddes keaht funn Moab un's geleshtah funn di Ammoniddah, Dee es mei leit faniddaht henn un gedroit henn fa iahra land funn eena vekk nemma.

⁹Fasell, so shuah es ich layb,” sawkt da Awlmechtich HAH, da Gott funn Israel, “zayld Moab vadda vi Sodom un di Ammoniddah vi Gomorra— en blatz funn veetz un sals-pits, en fadauvanah blatz fa'immah. Mei leit es ivvahrich sinn zayla si rawva, un zayla iahra land eahva.”

¹⁰Dess is vass si greeya in blatz funn iahra hohchmoot, veil si em Awlmechticha HAH sei leit fashpott un faniddaht henn.

¹¹Da HAH zayld shreklich sei zu eena vann eah awl di gettah im land vekk butzt. Di heida ivvahrawlich zayla een ohbayda, alli-ebbah in sei ayya land.

¹²“Diah Kushiddah zaylet aw umkumma bei mei shvatt.”

¹³Eah zayld sei hand naus shtrekka geyyich di natt, un zayld Assyria umbringa. Eah fadaubt di shtatt funn Nineveh un see vatt en drukkani vildahnis.

¹⁴Kee un shohf zayla sich anna layya datt, un aw alli sadda diahra. Di nacht-owls un anri fekkel zayla uf di shtatt shtay-poshta rooshta. Fekkel zayla in di fenshtahra singa, shtay-heifa zayla uf di shvella sei, un's cedar-hols is abgedekt.

¹⁵Dess is di fraylich shtatt es aus di kfoah voah. See hott zu sich selvaht ksawt, “Ich binn ebbes, un's is nimmand vi mich.” Vi fadauva is si vadda, en blatz fa vildi diahra! Alli-ebbah es fabei gayt, peift ivvah see, haybt sei hand uf un shpott.