Read Pennsylvania German Haggai 2 Bible Online

Haggai 2 - Pennsylvania German bible

Haggai 2

¹Uf em ayna zvansishta dawk im sivvada moonet is em HAH sei vatt kumma deich da brofayt Haggai:

²“Shvetz zumm Serubabel, em Sealthiel sei boo es govvenah funn Juda is, zumm Joshua, em Jehozadak sei boo es hohchen-preeshtah is, un zu di leit es zrikk kumma sinn. Frohk si,

³‘Vi feel funn eich sinn ivvahrich es di eahshtah hallichkeit funn demm haus ksenna katt henn? Vi gukt's zu eich nau? Dess seemd vi nix vann's faglicha is zu sellem.

⁴Avvah nau sei gedrohsht, Serubabel,’ sawkt da HAH. ‘Sei gedrohsht, Joshua, em Jehozadak sei boo es hohchen-preeshtah is. Seind gedrohsht awl diah leit fumm land,’ sawkt da HAH, ‘un shaffet. Fa ich binn mitt eich,’ sawkt da Awlmechtich HAH.

⁵‘Dess voah's bund es ich gmacht habb mitt eich vo diah aus Egypta kumma sind, un mei Geisht is alsnoch unnich eich. Feichet eich nett.’

⁶Dess is vass da Awlmechtich HAH sawkt, ‘In en katzi zeit zayl ich viddah di himla un di eaht shidla, un aw da say un's drukka land.

⁷Yau, ich zayl awl di heida shidla, un's keshtlich sach funn awl di heida vatt do heah gebrocht, un ich zayl dess haus foll macha mitt hallichkeit,’ sawkt da Awlmechtich HAH.

⁸‘Es silvah is mei un's gold is mei,’ sawkt da Awlmechtich HAH.

⁹‘Di hallichkeit funn demm nei haus zayld graysah sei es di hallichkeit fumm eahshta haus,’ sawkt da Awlmechtich HAH. ‘Un ich gebb di leit fridda an demm blatz,’ sawkt da Awlmechtich HAH.”

¹⁰Uf em fiah un zvansishta dawk, fumm neinda moonet, im zvedda yoah fumm Darius, is em HAH sei vatt zumm brofayt Haggai kumma:

¹¹“Dess is vass da Awlmechtich HAH sawkt, ‘Frohk di preeshtah vass es ksetz sawkt:

¹²Vann ebbah en shtikk heilich flaysh drawkt in en fald funn sei glaydah un's kumd veddah broht, adda gekocht ess-sach, vei, ayl, adda annah ess-sach, vatt's no aw heilich?’” Di preeshtah henn ksawt, “Nay.”

¹³No hott da Haggai ksawt, “Vann en mensh unrein vatt bei en doht leib ohrayya un eah raykt no ennich funn selli sacha oh, vatt sell no aw unrein?” Di preeshtah henn ksawt, “Yau, es vatt unrein.”

¹⁴No hott da Haggai ksawt, “Da HAH sawkt, ‘Grawt so is es mitt demm folk un dee leit in mei awwa. Vass-evvah es si doon un vass-evvah es si opfahra datt is unrein.

¹⁵Nau denket dess goot ivvah funn demm dawk on. Denket zrikk vi sacha voahra eb diah ay shtay glaykt hend un ohkfanga hend da tempel bauwa.

¹⁶Vann ebbah als an en haufa frucht kumma is, un gmaynd hott's veahra zvansich bushel datt, dann voahra yusht zeyya datt. Vann ebbah an en vei-fass ganga is fa fuftzich galla raus nemma, dann voahra yusht zvansich datt.

¹⁷Ich habb's shtoft es diah kshaft hend mitt eiyah hend kshlauwa mitt haysah vind, grohtz un shlohsa, avvah diah sind alsnoch nett zu miah gedrayt,’ sawkt da HAH.

¹⁸‘Heit is da fiah un zvansisht dawk fumm neinda moonet, un da dawk es di mavvah fumm tempel faddich gmacht voah. Nau gevvet acht un vatshet vass es gevva zayld.

¹⁹Is ennichah sohma ivvahrich in di sheiyah? Biss nau henn di drauva-ranka, da feiya-bohm, da grannat-abbel-bohm, un da ayl-bohm kenn frucht gevva. Avvah funn demm dawk on zayl ich eich saykna.’”

²⁰Sellah saym dawk, uf em fiah un zvansishta dawk fumm moonet, is es vatt fumm HAH es zvett mohl zumm Haggai kumma:

²¹“Sawk em Serubabel, da govvenah funn Juda, es ich zayl di himla un di eaht shidla.

²²Ich zayl di kaynich-shteel funn kaynich-reicha ivvah-drayya un di macht funn di heida iahra kaynich-reicha nunnah reisa. Ich shmeis di greeks-veyya un iahra mennah um, di geil-reidah un iahra geil zayla falla, un si macha nannah doht mitt em shvatt.

²³‘Uf sellah dawk,’ sawkt da HAH, ‘zayl ich dich—mei gnecht Serubabel, em Sealthiel sei boo—uf sellah dawk zayl ich dich nemma un dich macha vi en ring es em kaynich sei vatt seald; ich habb dich groofa fa mei gnecht sei.’ So sawkt da Awlmechtich HAH.”